ចៅក្រមសហព័ន្ធនៅសហរដ្ឋអាមេរិក បានបញ្ជាឱ្យទីក្រុងព្យុងយ៉ាងបង់ប្រាក់ ៥០១លានដុល្លារទៅតាមពាក្យបណ្តឹងមរណភាពរបស់ឱពុកម្តាយនិស្សិតអាមេរិកអូតូ វ៉មបៀ ដែលបានស្លាប់កាលពីឆ្នាំមុន បន្ទាប់ពីត្រូវបានដោះលែងដោយកូរ៉េខាងជើងនៅក្នុងស្ថានភាពរស់ដូចសព។
កាលពីថ្ងៃចន្ទ លោកស្រីចៅក្រម Beryl Howell នៅសហរដ្ឋអាមេរិកបានរិះគន់ខ្លាំងចំពោះកូរ៉េខាងជើង និងបានយល់ស្របជាមួយឱពុកម្តាយនិស្សិតអូតូវ៉មបៀថា ប្រទេសកូរ៉េខាងជើងគួរតែមានទំនួលខុសត្រូវចំពោះមរណភាពរបស់គាត់កាលពីែមិថុនា ឆ្នាំ ២០១៧។
និស្សិត Warmbier អាយុ ២២ឆ្នាំ គឺជានិស្សិតសាកលវិទ្យាល័យរដ្ឋ Virginia ដែលបានធ្វើទស្សនកិច្ចនៅកូរ៉េខាងជើងជាមួយក្រុមទេសចរណ៍ដ៏ទៃទៀត នៅពេលដែលនិស្សិតរូបនោះ ត្រូវបានគេចាប់ខ្លួន ហើយត្រូវបានកាត់ទោសឱ្យជាប់គុករយះពេល ១៥ ឆ្នាំនៅខែមីនាឆ្នាំ ២០១៦ ដោយសង្ស័យថា បានលួចផ្ទាំងផ្សព្វផ្សាយឃោសនា។ គាត់បានស្លាប់នៅខែមិថុនា ២០១៧ ដែលនិស្សិតរូបនោះបានស្លាប់ក្នុងរយៈពេលដ៏ខ្លី បន្ទាប់ពីត្រូវបានបញ្ជូនពីប្រទេសកូរ៉េខាងជើង ក្នុងរូបភាពសន្លប់ស្តូកស្តឹងមិនដឹងអីដូចមនុស្សស្លាប់។
ឱពុកម្តាយគាត់មានភាពស្រឡាំងកាំង នៅពេលដែលបានឃើញកូនរបស់ខ្លួនត្រូវបានបញ្ជូនមកក្នុងភាពមិនប្រក្រតី។ និស្សិតអាយុ ២២ឆ្នាំនេះរូបនេះ មានសភាពភាំង ភ្នែកខ្វាក់ ត្រចៀកថ្លង់ ដៃខ្វេនខ្វង់ និងរញីរញ័រដោយមិនដឹងអ្វីទាំងអស់ដូចមនុស្សស្លាប់។ អ្នកជំនាញបាននិយាយនៅក្នុងតុលាការថា របួសស្នាមរបស់គាត់ត្រូវបានធ្វើទារណ្ឌកម្មនឹងការឆក់ខ្សែភ្លើង។ ក្រោយមកគ្រូពេទ្យសរសៃប្រសាទម្នាក់បានសន្និដ្ឋានថានិស្សិតរូបនេះរងការខូចខាតខួរក្បាល ប្រហែលជាពីការបាត់បង់លំហូរឈាមទៅកាន់ខួរក្បាលពី ៥ ទៅ ២០នាទី៕
Home ព្រឹត្តិការណ៍ថ្មីៗ តុលាការសហរដ្ឋអាមេរិកបញ្ជាឱ្យកូរ៉េខាងជើងបង់ប្រាក់ ៥០០លានដុល្លារចំពោះការសម្លាប់និស្សិតអាមេរិកអូតូ វ៉មបៀ