គ្មាននរណាម្នាក់អាចនិយាយឲ្យបានច្បាស់លាស់នោះទេថាតើហេតុអ្វីបានជាបុរសវ័យ២៩ឆ្នាំម្នាក់ បានឡើងតាមដំបូលភោជនីយដ្ឋានចិន ដោះអាវធំរបស់គាត់ និងចុះតាមរន្ធខ្យល់ខ្លាញ់ដោយគ្រាន់តែពាក់អាវខ្លីស្តើងមួយប៉ុណ្ណោះនោះ។
លោកពលបាល រ៉េ ខេលី គឺជាមន្ត្រីព័ត៌មានរដ្ឋមួយរូបរបស់ការិយាល័យតម្រួតស្រុកអាឡាមេដា របស់សហរដ្ឋអាមេរិក បាននិយាយប្រាប់កាសែត NPRថា មានតែបុរសខ្លួនឯងទេទើបដឹងពីបំណងពិតប្រាកដរបស់គាត់។
លោកខេលី បាននិយាយថា ប្រហែលជាគាត់ជាបុរសរាងស្តើង ហើយដោយជញ្ជាំងសុទ្ធតែខ្លាញ់រួមផ្សំនឹងគាត់ដោះអាវទៀតនោះ ប្រហែលជាគាត់គិតថា គាត់នឹងអាចរអិលចុះក្រោមដល់ជាន់ដីហើយមើលទៅ។ វាប្រហែលជាផែនការដែលរៀបចំយ៉ាងច្បាស់លាស់ រហូតដល់គាត់ជាប់ខ្លួននៅទីនោះ មានអីជាប់ខ្លួននៅទីនោះ២ថ្ងៃ ប៊ិះនឹងក្ស័យជីវ៉ាទៅហើយ។
ពេលជាប់ខ្លួន ហើយមិនអាចរើបំរាស់ទៅណារួច គាត់ក៏ចាប់ផ្តើមហៅឲ្យគេជួយ។ ប៉ុន្តែការស្រែកសុំជំនួយរបស់គាត់ ត្រូវបានផ្ទប់ដោយសារតែស្រទាប់របស់ប្រេងស្អុយដែលរុំគាត់រហូតដល់ព្រឹកថ្ងៃពុធ ពេលដែលគាត់ត្រូវបានគេរកឃើញដោយម្ចាស់ហាងជិតខាងនោះ។
លោកអ៊ីហ្គ័រ កាមប៉ូស គឺជាម្ចាស់ហាង Campos Tax Services ស្ថិតនៅក្នុងទីក្រុងសាន់ ឡូរ៉េនហ្សូ រដ្ឋកាលីហ្វ័រញ៉ា សហរដ្ឋអាមេរិក បាននិយាយប្រាប់ទូរទស្សន៍ KGO TV ថា “ខ្ញុំឮសំឡេងដូចជាអាម៉េចមិនដឹងទេ ហើយក៏សួរថាតើនរណាគេហ្នឹង?” ។
លោកកាមប៉ូស បានពន្យល់ថា សំឡេងនោះបានធ្វើឲ្យគាត់សង្ស័យ ហើយក៏សម្រេចចិត្តឡើងទៅមើល។
ពេលដែលលោកកាមប៉ូស ទូរស័ព្ទទៅលេខ៩១១ លោកបានព្យាយាមកំណត់អត្តសញ្ញាណបុរសម្នាក់នោះ។ លោកកាមប៉ូស បាននិយាយថា “លោកបានព្យាយាមសួរទៅគាត់ថាតើអ្នកឈ្មោះអ្វី? ហើយគាត់ឆ្លើយវិញថា សូមមេត្តាជួយខ្ញុំសិនមក សូមកុំធ្វើបាបខ្ញុំ” ហើយលោកក៏បានឆ្លើយតបវិញថា “ខ្ញុំមិនធ្វើបាបអ្នកទេ ខ្ញុំកំពុងតែជួយអ្នក”។
សម្រាប់ការចោទប្រកាន់ណាមួយពាក់ព័ន្ធនឹងឧក្រិដ្ឋកម្ម មិនទាន់មាននោះទេនៅពេលបច្ចុប្បន្ននេះ សម្រាប់បុរសសង្ស័យម្នាក់នេះ។
ក្រោយកើតហេតុ បុរសម្នាក់នេះត្រូវបាននាំទៅលាងសម្អាតខ្លួនប្រាណ និងទទួលការព្យាបាលនៅក្នុងមន្ទីរពេទ្យ។
លោកខែលី បាននិយាយថា ពេលខ្លះយើងដឹងថាជនសង្ស័យព្យាយាមចូលទៅក្នុងហាង ដើម្បីលួចខ្សែលួស គ្រឿងបរិក្ខាផ្សេងៗ ដើម្បីលក់បានលុយ ហើយករណីលើកនេះ អាចទៅរួចផងដែរ ប៉ុន្តែមិនមែនរាល់ការកាត់ទោស តម្រូវឲ្យជាប់ពន្ធនាគារនោះទេ៕
