អស់រយៈពេលជាងមួយឆ្នាំហើយដែលលោកសុខ ដែន ខានបញ្ចេញទេពកោសល្យក្បាច់គុនវាយតប់នៅក្នុងខ្សែភាពយន្ដបន្ទាប់ពីទទួលភាពល្បីល្បាញក្នុងរឿង«លួងព្រះស្ដេចកន»។ជួបតារាសម្ដែងផ្នែកក្បាច់គុនរូបនេះក្នុងឱកាសក្រុងពាលីរឿង«ពិសស្នហ៍» លោកប្រាប់ថាអវត្ដមានក្នុងសិល្បៈរយៈពេលយ៉ាងយូរដោយ សារមានកត្ដាមួយចំនួន។
ស្ទើរតែមួយប្រទេសទៅហើយដែលគេបានស្គាល់លោកសុខ ដែន ជាតារាសម្ដែងមានទេពកោសល្យក្បាច់គុនយ៉ាងពិសេស រហូតមានអ្នកខ្លះប្រសិទ្ធនាមលោកថា កែងឆេះស្រុកខ្មែរទៀតផង ដោយគេមើលឃើញថា រឿងដែលមានឈុតឆាកវាយតប់ច្រើនមានវត្ដមានលោក ជាក់ស្ដែងដូចជារឿង«ពិសស្នេហ៍» របស់ស្ថានីយទូរទស្សន៍ប៉ុស្ដិ៍លេខ៥អ៊ីចឹង គឺលោកជាតួធំមួយក្នុងការបង្ហាញក្បាច់គុនរបស់ខ្មែរ។
លោកសុខ ដែន បានប្រាប់ថា ថ្វីត្បិតតែទីផ្សារភាពយន្ដនាពេលបច្ចុប្បន្នមានការរីចម្រើន បើប្រៀបធៀបទៅជាង១០ឆ្នាំមុនក៏ដោយ ប៉ុន្ដែទីផ្សារក្បាច់គុនក្នុងវិស័យភាពយន្ដហាក់មិនទាន់ទូលំទូលាយនៅឡើយ។ ដូច្នេះហើយទើបធ្វើឲ្យតារាសម្ដែងដែលមានទេពកោសល្យក្បាច់គុនដូចជារូបលោកពុំសូវមានការងារធ្វើ មមាញឹក។
តារាសម្ដែងរូបនេះបន្ថែមថា បញ្ហាទីផ្សារជាកត្ដាចម្បង ប៉ុន្ដែពេលខ្លះនៅមានផលិតកម្មទាក់ទងរកលោកអោយសម្ដែង លោកក៏មានកិច្ចការផ្ទាល់ខ្លួនត្រូវបំពេញជាចាំបាច់មិនអាចដកឃ្លាបានកត្ដាទាំងនេះហើយដែលធ្វើឲ្យលោកហាក់ចាកឆ្ងាយពីការសម្ដែងវិស័យក្បាច់គុណ។ ទោះយ៉ាងណាប្រាប់ថា កន្លងមកទោះបីជាលោកពុំមានពេលគ្រប់គ្រាន់បានសម្ដែងក្បាច់គុនដោយផ្ទាល់ក្នុងភាពយន្ដ ឬខារ៉ាអូខេក៏ដោយក៏ភាគច្រើនលោកមានតួនាទីជាអ្នករៀបចំក្បាច់គុនឲ្យតារាសម្ដែងដទៃវាយតប់គ្នាក្នុងឈុតឆាកសម្ដែងផងដែរ។
ទោះយ៉ាងណាតារាសម្ដែងសាច់ដុំធំៗរូបនេះបានបញ្ជាក់ថា«យូរមានឱកាសសម្ដែងខ្លួនឯងម្ដង ទើបខ្ញុំប្ដេជ្ញាចិត្ដហើយថា នៅក្នុងរឿង«ពិសស្នេហ៍» ខ្ញុំដើរតួជាទាហានជំនិតរបស់ព្រះជ័យដែលតួឯកនោះ ខ្ញុំនឹងប្រឹងប្រែងរិះរកក្បាច់ថ្មីៗដែលជាចំណីចក្ខុរបស់ពុកម៉ែបងប្អូនមកបង្ហាញតាមរយៈខ្សែភាពយន្ដនេះឲ្យកាន់តែជក់ចិត្ដ»។
ទោះយ៉ាងណាតារាសម្ដែងក្បាច់គុនដែលធ្លាប់គ្រងតំណែងតួឯកមិនក្រោម៤រឿងរូបនេះបានពោលថា ថ្វីត្បិតែការសម្ដែងមានតិច ក៏លោកពុំតូចចិត្ដដែរ ព្រោះស្ថានភាពយន្ដរបស់ខ្មែរហាក់ពុំទាន់ផ្ដោតទៅលើការវាយតប់ខ្លាំង។ ម្យ៉ាងទោះមានការសម្ដែងតិច ប៉ុន្ដែរឿងនីមួយៗដែលមានលោកសម្ដែងក្បាច់គុនគឺទទួលបានការគាំទ្រខ្លាំង ហើយទស្សនិកជនពុំដែលភ្លេចរូបលោកឡើយ។ ចំណុចនេះហើយដែលធ្វើឲ្យលោក នៅតែមានសង្ឃឹមឈរលើវិថីសិល្បៈរងចាំមើលឱកាសទៅអនាគត៕