ក្នុងឆ្នាំ២០១៨ នៅចំពោះមុខសង្គ្រាមពាណិជ្ជកម្មជាមួយអាមេរិក សេដ្ឋកិច្ចចិនមានកំណើន៦.៦ភាគរយ ដែលជាសន្ទុះយឺតបំផុត បើគិតក្នុងអំឡុងពេលជិតបីទសវត្សរ៍កន្លងទៅ។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅកាលពីពេលកន្លងទៅថ្មីៗនេះ ។
បើតាមតួលេខផ្លូវការដែលរដ្ឋាភិបាលចិនបានប្រកាសជាសាធារណៈ នៅថ្ងៃចន្ទនេះ ចិនបានកត់ត្រាកំណើនសេដ្ឋកិច្ចត្រឹមតែ ៦,៦%ប៉ុណ្ណោះ សម្រាប់ឆ្នាំ២០១៨។ ជាកំណើនដ៏ទាបខ្លាំង ដែលចិនមិនធ្លាប់ជួបប្រទះទេ គិតចាប់តាំងពី២៨ឆ្នាំមក។ ភាពទន់ខ្សោយនេះ បានបំផុសឱ្យមានការព្រួយបារម្ភយ៉ាងខ្លាំង ព្រោះចិនជាក្បាលម៉ាស៊ីនអូសទាញសេដ្ឋកិច្ច និងជាតំណាងឱ្យ១ភាគ៣នៃកំណើនពិភពលោក។
កំណើនសេដ្ឋកិច្ចចិន បានបន្ថយល្បឿនយ៉ាងខ្លាំង នៅឆ្នាំ២០១៨។ នេះ បើតាមតួលេខផ្លូវការដែលរដ្ឋាភិបាលចិនទើបបានប្រកាសជាសាធារណៈ នៅព្រឹកមិញ ដោយកត់ត្រាឃើញមានកំណើនសេដ្ឋកិច្ចត្រឹមតែ ៦,៦%ប៉ុណ្ណោះ។
ជាកំណើនសេដ្ឋកិច្ច ដែលមានកំរិតប្រសើរជាងការព្យាករទុក (៦,៥%)បន្តិចផង។ ប៉ុន្តែ ៦,៦% ជាអត្រាដ៏ទាបបំផុត ជាលើកទីមួយ ត្រឹមតែគិតតាំងពីឆ្នាំ១៩៩០ ដែលកាលណោះចិនមានកំណើនសេដ្ឋកិច្ច ធ្លាក់ទាបខ្លាំងដល់៣,៩% (មុននឹងស្ទុះឡើងយ៉ាងខ្លាំងនិងបន្តរហូតមក ក្នុងកំរិតស្ទើរដល់ទៅ១០%ផងនោះ)។
យោងតាមទីភ្នាក់ងារព័ត៌មាន AFP អ្នកនាំពាក្យអង្គភាពស្ថិតិចិន Mao Shengyong បានលើកឡើងថា ចិនបានប្រឈមមុខនឹងបរិយាកាសសេដ្ឋកិច្ចដ៏ស្មុគស្មាញនៅក្រៅប្រទេស ក៏ដូចជាបញ្ហាកំណែទម្រង់ និងការអភិវឌ្ឍនៅក្នុងប្រទេសដែរ។
ពេលនេះក្រុងប៉េកាំងកំពុងផុងខ្លួនក្នុងសង្គ្រាមពាណិជ្ជកម្មជាមួយក្រុងវ៉ាស៊ីនតោន ដោយភាគីទាំងពីរបានបន្តដំឡើងពន្ធប្រឆាំងគ្នាទៅវិញទៅមក ដែលគិតជាទឹកប្រាក់រាប់សិបពាន់លានដុល្លារទៅហើយ។ បញ្ហាទាំងនេះបានបង្កក្តីបារម្ភអំពីឥទ្ធិពលនៃសង្គ្រាមនេះលើសេដ្ឋកិច្ចពិភពលោកទាំងមូល។
មិនត្រឹមតែប៉ុណ្ណោះកំណើនសេដ្ឋកិច្ចដ៏យឺតយ៉ាងនេះក៏បានកើតឡើងចំពេល ក្រុងប៉េកាំងកំពុងខិតខំប្រឹងប្រែងដោះស្រាយការកើនឡើងនៃបំណុលរដ្ឋដ៏ច្រើនលើសលុប ដែលវាកើតឡើងបណ្តាលមកពីការធ្លាក់ចុះនៃការវិនិយោគផ្នែកហេដ្ឋារចនាសម្ព័ន្ធដែរ។
សូមបញ្ជាក់ថា ទំនាក់ទំនងរវាងសហរដ្ឋអាមេរិក និងចិនបានល្អក់កករខ្លាំងក្នុងឆ្នាំនេះ បន្ទាប់ពីប្រធានាធិបតីអាមេរិក ដូណាល់ ត្រាំ ដំឡើងពន្ធនាំចូលជាបន្តបន្ទាប់លើទំនិញ នាំចូលពីចិន។ ភាគច្រើននៃទំនិញទាំងនោះមានដូចជា រថយន្ត, គ្រឿងចក្រ, និងគ្រឿងអេឡិចត្រូនិកជាដើម។ ប៉ុន្តែយ៉ាងណាមិញ លោក Ning Jizhe ប្រធានការិយាល័យជាតិស្ថិតិចិន បានលើកឡើងថា បញ្ហាជម្លោះចិន-អាមេរិកពិតជាកំពុងជះឥទ្ធិពលដល់សេដ្ឋកិច្ចចិនមែន ប៉ុន្តែទំហំនៃការប៉ះពាល់គឺអាចគ្រប់គ្រងបាន៕
Home Uncategorized សន្ទុះសេដ្ឋកិច្ចចិន ចាប់ផ្តើមប្រែប្រួលដើរយឺតបន្ទាប់ពីការប្រឈមមុខសង្គ្រាមពាណិជ្ជកម្មជាមួយអាមេរិក