ទីប្រឹក្សាសន្តិសុខជាតិអាមេរិក លោក ចន បុលថុនបានព្រមានវ៉េណេហ្ស៊ុយអេឡាថា ការគម្រាមកំហែងណាមួយប្រឆាំងមកលើមន្ត្រីការការទូតអាមេរិក ឬមេដឹកនាំគណបក្សប្រឆាំងលោក Juan Guaido នឹងត្រូវជួបជាមួយការឆ្លើយតបដ៏ខ្លាំងក្លាវិញ។
លោកបុថុនបានបង្ហោះសារនៅលើបណ្តាញធ្វីតតឺកាលពីថ្ងៃអាទិត្យថា ការបំផិតបំភ័យបែបនេះ គឺជាការវាយប្រហារដ៏ខ្លាំងក្លាទៅលើច្បាប់។
ការព្រមានបែបនេះពីសំណាក់ទីប្រឹក្សាសន្តិសុខជាតិអាមេរិក លោកចន បុលថុននេះ បានធ្វើឡើងបន្ទាប់ពីសហរដ្ឋអាមេរិក និងបណ្តាប្រទេសជាច្រើនទៀតបានទទួលស្គាល់មេដឹកនាំគណបក្សប្រឆាំងជាប្រធានាធិបតីស្តីទីរបស់ប្រទេសនេះ។ បណ្តាប្រទេសទាំងនោះបានចោទប្រកាន់លោកម៉ាឌូរ៉ូថា បានលួចបន្លំសន្លឹកឆ្នោត។ កាសែត The New York Times បានសរសេរកាលពីថ្ងៃសៅរ៍សប្តាហ៍មុនថា ប្រធានាធិបតីវ៉េណេហ្ស៊ុយអេឡាបច្ចុប្បន្ននេះ បើតាមការស្ទង់មតិ ទទួលបានការគាំទ្រត្រឹមតែ ២០ភាគរយប៉ុណ្ណោះ។
ស្ថានការណ៍ប្រទេសនេះ បច្ចុប្បន្ននេះបានឡើងកម្តៅកាន់តែខ្លាំង ខណៈដែលគណបក្សប្រឆាំងកំពុងបង្កើតកិច្ចខិតខំប្រឹងប្រែងរបស់ខ្លួន ដើម្បីទម្លាក់ប្រធានាធិបតីប្រទេសនេះ។ គណបក្សប្រឆាំងបានប្រកាសឲ្យមានការធ្វើបាតុកម្មនៅទូទាំងប្រទេស ដើម្បីប្រឆាំងរដ្ឋាភិបាលប្រទេសនេះ។
កាលពីព្រឹកថ្ងៃអាទិត្យ មន្ត្រីតំណាងយោធាជាន់ខ្ពស់វ៉េណេហ្ស៊ុយអេឡាប្រចាំសហរដ្ឋអាមេរិក លោក Col Jose Luis Silva ដែលបានផ្តាច់ខ្លួនចេញពីរដ្ឋាភិបាលវ៉េណេហ្ស៊ុយអេឡា បាននិយាយថា លោកទទួលស្គាល់លោក ជាន់ហ្កៃដូ ជាប្រជានាធិបតី។ ការលើកឡើងបែបនេះហើយ ជាហេតុនាំឲ្យលោកចន បុលថុនប្រកាសប្រឆាំងទៅនឹងគ្រប់ទម្រង់ទាំងអស់នៃអំពើហិង្សា និងការបំផិតបំភ័យ។
កាលពីថ្ងៃសៅរ៍ មានបណ្តាប្រទេសជាច្រើនដែលចេញមុខគាំទ្រដល់គណបក្សប្រឆាំងពេញទំហឹង ក្នុងនោះមានដូចជា៖ បារាំង អាល្លឺម៉ង់ អង់គ្លេស អេស្ប៉ាញ និងបណ្តាប្រទេសអឺរ៉ុបជាច្រើនផ្សេងទៀត។ ប៉ុន្តែទោះបីយ៉ាងនេះក្តី លោកម៉ាឌូរ៉ូ បាននិយាយថា ប្រទេសរបស់លោកមិនមានចំណងទំនាក់ទំនងជាមួយប្រទេសលោកខាងលិចនោះទេ។ លោកម៉ាឌូរ៉ូបានប្រជុំជួរទាហានធ្វើសមយុទ្ធយោធាមួយ ដើម្បីបង្រួបបង្រួមកម្លាំងត្រៀមទប់ទល់ទៅនឹងអ្វីដែលលោកហៅថា គឺជាការប៉ុនប៉ងធ្វើរដ្ឋប្រហារ។
ចំពោះប្រទេសដែលគាំទ្រលោកម៉ាឌូរ៉ូវិញមានដូចជាចិន រុស្ស៊ី ម៉ិកស៊ិក និងទួរគី។ ផ្ទុយពីនេះ បណ្តាប្រទេសអាមេរិកឡាទីនលើស ១២ប្រទេសដែលគាំទ្រប្រធានគណបក្សប្រឆាំងជាប្រធានាធិបតី ហើយការណាដាបានរាំងខ្ទប់លោកម៉ាឌូរ៉ូជាប្រធានាធិបតី។ នៅថ្ងៃចន្ទទី២៨នេះ អ៊ីស្រាអែលទើបបានប្រកាសទទួលស្គាល់ប្រធានគណបក្សប្រឆាំងជាប្រធានាធិបតីស្របច្បាប់។
មូលហេតុដែលប្រធានាធិបតីវ៉ែណេហ្ស៊ុយអេឡាមិនមានប្រជាប្រិយភាព គឺដោយសារតែវិបត្តិសេដ្ឋកិច្ច អតិផរណា និងកង្វះខាតនូវសារៈសំខាន់នៅមូលដ្ឋាន ដែលញ៉ាំងឲ្យប្រជាជនរាប់លាននាក់ភៀសខ្លួនទៅក្រៅប្រទេស។ រូបិយវត្ថុអន្តរជាតិបានព្យាករណ៍ថា នៅឆ្នាំ ២០១៩នេះ អតិផរណាប្រទេសនេះឡើងដល់ ១០លានភាគរយ។ ប្រធានាធិបតីវ៉េណេហ្ស៊ុយអេឡាប្រឈមទៅនឹងការប្រឆាំងផ្ទៃក្នុង និងការរិះគន់ពីសំណាក់អន្តរជាតិដោយសាតែការរំលោភសិទ្ធមនុស្ស និងបញ្ហាសេដ្ឋកិច្ច។
លោកម៉ាឌូរ៉ូបានជាប់ឆ្នោតសាជាថ្មីនៅក្នុងអណ្តត្តិថ្មីរបស់លោកកាលពីពេលថ្មីៗនេះ ដោយការបោះឆ្នោតនេះត្រូវបានគេមើលឃើញថា គឺមានភាពចម្រូងចម្រាស់យ៉ាងខ្លាំង ដោយសារតែបេក្ខជនមកពីគណបក្សប្រឆាំងត្រូវបានរារាំង ដោយសារនិរទ្ទេសខ្លួន និងត្រូវចាប់ដាក់ពន្ធធនាគារ។ ចៅក្រមតុលាការកំពូល លោក Christian Zerpa បានភៀសខ្លួនចេញពីប្រទេសនេះនៅក្នុងខែមករានេះ ដោយបាននិយាយប្រាប់អ្នកកាសែតថា ការបោះឆ្នោតនៅប្រទេសនេះ គឺមិនស៊េរី និងមិនយុត្តិធម៌ឡើយ៕
Home ព្រឹត្តិការណ៍ថ្មីៗ សហរដ្ឋអាមេរិកប្រកាសធ្វើការឆ្លើយទៅលើរដ្ឋាភិបាលវ៉េណេហ្ស៊ុយអេឡា ក្នុងករណីណាដែលហ៊ានប៉ះពាល់មកលើមន្ត្រីរបស់ខ្លួន និងសភាវ៉េណេហ្ស៊ុយអេឡា