(រដ្ឋធានីវ៉ាស៊ីនតោន)៖ កងកម្លាំងយោធាសហរដ្ឋអាមេរិកបានប្រកាសពីគម្រោងទិញ និងធ្វើការសាកល្បងប្រព័ន្ធការពារមីស៊ីលអ៊ីស្រាអែលអាយអិនដូម។
ប្រព័ន្ធដែលប្រើរ៉ាដា និងមីស៊ីលស្ទាក់ប្រឆាំងនឹងការគម្រាមកំហែងដែលបាញ់មករកខ្លួន ត្រូវបានប្រើប្រាស់ចាប់តាំងពីឆ្នាំ ២០១១។
ក្រសួងការពារជាតិអាមេរិកបាននិយាយថា ប្រព័ន្ធនេះនឹងត្រូវបានប្រើប្រាស់នៅលើមូលដ្ឋាននៃការធ្វើតេស្តមួយ ខណៈដែលវាវាយតម្លៃជម្រើសសម្រាប់តម្រូវការរយៈពេលយូររបស់យោធា។ នាយករដ្ឋមន្ត្រីអ៊ីស្រាអែល លោក Benjamin Netanyahu បានហៅការលក់ប្រព័ន្ធនេះថា «គឺជាសមិត្ធផលមួយសម្រាប់ប្រទេសជាតិ»។
ប្រព័ន្ធមីស៊ីល Iron Dome ធ្វើការដោយតាមដាននូវគ្រាប់មីស៊ីលរយៈចម្ងាយជិត ដែលបាញ់មករកខ្លួនដោយរ៉ាដា បន្ទាប់មកវិភាគទិន្នន័យអំពីតំបន់ដែលនឹងប៉ះពាល់ មុននឹងវាយតម្លៃថានឹងត្រូវបាញ់ស្ទាក់ឬអត់។
មន្ត្រីអ៊ីស្រាអែលអះអាងថា ប្រព័ន្ធមីស៊ីលដែលអាចធ្វើការបានគ្រប់កាលៈទេសៈ និងអាកាសធាតុទាំងអស់នេះ មានអត្រាជោគជ័យដល់ទៅ ៩០ភាគរយឯណោះ។ ជាក់ស្តែង វាអាចការពារប្រជាជននៅទីក្រុងធំពីការវាយប្រហារដោយក្រុមជនជាតិប៉ាឡេស្ទីន។
កាលពីពេលថ្មីៗនេះ ចំពេលដែលស្ថានការណ៍ឡើងកម្តៅកាន់តែខ្លាំង ក្រោយអ៊ីស្រាអែលបើកការវាយប្រហារទៅលើមូលដ្ឋានយោធាអ៊ីរ៉ង់នៅស៊ីរី អាមេរិក និងអ៊ីស្រាអែលបានធ្វើការសាកល្បងគ្រាប់មីស៊ីលប្រឆាំងមីស៊ីល Arrow III ដែលមីស៊ីលនេះមានកម្លាំងខ្លាំងជាងអាយអិនដូម។ សហរដ្ឋអាមេរិកបានសរសេរ ប្រព័ន្ធនេះ និងបានទាញការសន្មត់ថា វាអាចយកឈ្នះលើមីស៊ីលល្បឿនលឿន ដូចជាមីស៊ីលអ៊ីរ៉ង់ ចិន និងកូរ៉េខាងជើង ប៉ុន្តែមិនបាននិយាយអំពីមីស៊ីលល្បឿនលឿនជាងសម្លេងដូចជាប្រភេទរបស់រុស្ស៊ីនោះទេ។ វាមានសមត្ថភាពច្បាស់លាស់ជាងប្រភេទមីស៊ីលត្រកូល S- របស់រុស្ស៊ីមួយចំនួន៕
