សារព័ត៌មានស្ពុតនិកបានចេញផ្សាយនៅថ្ងៃទី៩ កុម្ភៈនេះថា ចិនត្រូវបានគេរាយការណ៍ថា បានដាក់ពង្រាយនាវាចម្បាំង ៩៥គ្រឿងបញ្ជូនទៅកាន់កោះ Pag Asa ដែលស្ថិតក្នុងចំណោមប្រជុំកោះនៃតំបន់សមុទ្រចិនខាងត្បូង ដើម្បីបញ្ឈប់ការដ្ឋានសំណង់ដែលធ្វើឡើងដោយរដ្ឋាភិបាលហ្វីលីពីន។
យោងតាមរបាយការណ៍មួយកាលពីថ្ងៃពុធដែលបានចេញផ្សាយដោយមជ្ឈមណ្ឌល Asia Maritime Transparency Initiative ដែលដំណើរការដោយមជ្ឈមណ្ឌលយុទ្ធសាស្ត្រ និងសិក្សាអន្តរជាតិបានឲ្យដឹងថា ទីក្រុងប៉េកាំងថ្មីៗនេះបានបញ្ជូនក្រុមនាវាចម្បាំងពីតំបន់ថ្មប៉ប្រះទឹក Subi Reef ដែលស្ថិតក្នុងចម្ងាយប្រមាណ ១៩គីឡូម៉ែត្រពីកោះ Pag Asa ឬកោះធីទូ។
របាយការណ៍នេះបានកត់សម្គាល់ថា នៅថ្ងៃទី ៣ ខែធ្នូ មុនការចាប់ផ្តើមការដ្ឋានសំណង់នៅលើកោះ Pag Asa ជាច្រើនថ្ងៃ ចិនបានដាក់ពង្រាយនាវាចម្បាំងយ៉ាងហោចណាស់ ២៤គ្រឿងទៅកាន់កោះមានជម្លោះនោះ។ មុននេះ ការដ្ឋានសំណង់នោះត្រូវបានផ្អាកដោយអាកាសធាតុមិនអំណោយផល។
យោងតាមកាសែត Philippine Star ក្រុមនាវាចម្បាំងឆ្មាំឆ្នេរចិន និងទូកនេសាទត្រូវបានប្រទះឃើញនៅជិតតំបន់ទឹករាក់ Sandy Cay ដែលស្ថិតនៅត្រឹម ៤គីឡូម៉ែត្រពីកោះធីទូ ឬហៅថាកោះ Pag Asa ដែលមានការទាមទារពីចិន ហ្វីលីពីន តៃវ៉ាន់ និងវៀតណាម ដែលវាជាកោះធំទីពីរនៅប្រជុំកោះស្ព្រេតលី។
សំណង់ការដ្ឋាននេះ រដ្ឋាភិបាលហ្វីលីពីនចង់សាងសង់ផ្លូវឡើងលើកោះធីទូដ៏ចំណោទ ដើម្បីងាយស្រួលក្នុងការដឹកជញ្ជូន និងពង្រីកផ្លូវយន្តហោះ ដែលអាចឲ្យយន្តហោះធំៗចូលចុះចតបាន។ នេះបើតាមការប្រកាសកាលពីខែមេសា ឆ្នាំ ២០១៧។
ទន្ទឹមនេះ Radio Free Asia (វិទ្យុអាស៊ីសេរីផ្សាយជាភាសាអង់គ្លេស) បាននិយាយថា ហ្វីលីពីននៅតែបន្តការសាងសង់នៅលើកោះធីទូដដែល បើទោះបីជានាវាចម្បាំងចិនត្រូវបានបញ្ជូនទៅក្បែរនោះក៏ដោយ។
លោក Delfin Lorenzana រដ្ឋមន្ត្រីការពារជាតិហ្វីលីពីនបាននិយាយថា ការជួសជុលនិងគម្រោងកែលម្អប្រព័ន្ធសុវត្ថិភាពនៅលើកោះ Pag-asa គឺជាផ្នែកមួយនៃការគាំទ្ររបស់រដ្ឋាភិបាលហ្វីលីពីន។
លោក Lorenzana បានឱ្យដឹងក្នុងសេចក្តីថ្លែងការណ៍មួយថា ការដ្ឋាននោះត្រូវបានធ្វើឡើងដោយការពិចារណា និងធ្វើទៅតាមគម្រោងយ៉ាងប្រុងប្រយ័ត្ន ដោយគោរពទៅតាមច្បាប់អន្តរជាតិ ហើយក៏ស្ថិតក្រោមសិទ្ធក៏ដូចជាអធិបតេយ្យភាពជាតិដែរ។
បច្ចុប្បន្ននេះ ទីក្រុងប៉េកាំងបាននិងកំពុងតែអះអាង អាងយ៉ាង វ៉ាងទីនៅក្នុងតំបន់សមុទ្រចិនខាងត្បូង ព្រមទាំងបង្កើនសមត្ថភាពយោធា ដើម្បីបំភ័យដល់បណ្តាប្រទេសទាំងឡាយណាដែលកំពុងតែទាមទារជាមួយខ្លួន។ កាលពីឆ្នាំ ២០១៦ តុលាការអាជ្ញាកណ្តាលអន្តរជាតិ នាទីក្រុងឡាអេបានចេញសេចក្តីសម្រេចគាំទ្រទីក្រុងម៉ានីលម្តងហើយ ដោយទាត់ចោលការវ៉ាងរបស់ចិន នៅក្នុងតំបន់៕
