(ទីក្រុងការ៉ាកាស)៖ លោកម៉ាឌូរ៉ូ ប្រធានាធិបតីវ៉េណេហ្ស៊ុយអេឡាបានប្តេជ្ញាថានឹងធ្វើការវិនិយោគលើការផ្តល់គ្រឿងសព្វាវុធទំនើបៗដល់កងកម្លាំង និងក្រុមកងជីវពលរបស់ខ្លួន និងបានព្រមានបណ្តាប្រទេសដទៃទៀតប្រឆាំងទៅនឹងការគម្រាមកំហែងមកលើវ៉េណេហ្ស៊ុយអេឡា។
លោកម៉ាឌូរ៉ូបាននិយាយនៅលើបណ្តាញធ្វីតតឺកាលពីថ្ងៃអាទិត្យថា «យើងនឹងធ្វើការវិនិយោគ ដើម្បីឱ្យទាហានទាហាននិងកងជីវពលរបស់យើង មានអាវុធទំនើបបំផុត ... វ៉េណេស៊ុយអេឡានឹងមានអ្វីគ្រប់យ៉ាងពីកាំជ្រួចមីស៊ីល Igla របស់រុស្ស៊ីនៅក្នុងដៃកងជីវពល និងយោធា ពីព្រោះវ៉េណេហ្ស៊ុយអេឡាចង់បានសន្តិភាព»។
លោកម៉ាឌូរ៉ូបានសង្កត់ធ្ងន់ថា ទាហានវេណេស៊ុយអេឡាបានត្រៀមខ្លួនរួចជាស្រេច ដើម្បីស្លាប់សម្រាប់ប្រទេសរបស់ពួកគេ ប៉ុន្តែប្រជាជនរបស់ប្រទេសនេះក៏ជាកងកម្លាំងដ៏សំខាន់មួយ ដែលនឹងក្រោកឈរឡើងដើម្បីមាតុភូមិរបស់ពួកគេផងដែរ។
លោកប្រធានាធិបតីបានព្រមានថា «យើងជាប្រទេសដែលមានសន្តិភាព ហើយយើងមិនមានជម្លោះជាមួយនរណាម្នាក់ទេ ប៉ុន្តែអ្នកដទៃទៀតមិនគួរព្យាយាមប្រឆាំងនឹងយើង ហើយគំរាមកំហែងមកលើយើងនោះទេ»។
កាលពីថ្ងៃអាទិត្យលោកម៉ាឌូរ៉ូបានចាប់ផ្តើមសមយុទ្ធយោធាទ្រង់ទ្រាយធំបំផុតរបស់ប្រទេសវេណេហ្សុយអេឡាដែលមានរយៈពេល ៥ថ្ងៃ។ សមយុទ្ធនេះត្រូវបានគេកត់ត្រាថាជាសមយុទ្ធទ្រង់ទ្រាយធំមិនធ្លាប់មាន ក្នុងរយៈពេល ២០០ឆ្នាំកន្លងទៅនេះ។ ការជះលុយលើការធ្វើសមយុទ្ធ ត្រូវបានមនុស្សជាច្រើនយល់ថា គឺជាការចំណាយឥតប្រយោជន៍ ខណៈដែលប្រជាជនកំពុងអត់អីបរិភោគ មិនតែប៉ុណ្ណោះថែមទាំងបិទច្រកជំនួយមនុស្សធម៌ថែមទៀតផង។ ប្រជាជនប្រទេសនេះកំពុងរស់នៅក្នុងស្ថានភាពដុនដាប ដោយមានប្រជាជនជាច្រើនកំពុងប្រមូលកាកសំណល់បរិភោគ៕
