មេដឹកនាំចិនបានចុះហត្ថលេខាលើបទបញ្ជាមួយ ដើម្បីបញ្ជាក់ពីវិធីបណ្តុះបណ្តាលយោធា និងការកាត់ទោសពីការធ្វើខុសនៅក្នុងកងកម្លាំង ខណៈដែលភាពតានតឹងបន្តឡើងខ្លាំងនៅក្នុងតំបន់សមុទ្រចិនខាងត្បូង។
មេដឹកនាំចិនលោកស៊ីជីនភីងបានចុះហត្ថលេខាលើបទបញ្ជា ដើម្បីបង្កើនការបណ្តុះបណ្តាលដល់សមាជិកពីរលាននាក់នៃកងទ័ពរំដោះប្រជាជនចិន។ អាជ្ញាធរយោធាចិនបានរាយការណ៍ថា បានដាក់ពង្រាយក្រុមអធិការកិច្ច និងប្រព័ន្ធត្រួតពិនិត្យថ្មីមួយ ដែលបានរចនាឡើងដើម្បីបង្កើនការត្រៀមខ្លួនរួចរាល់ក្នុងការប្រយុទ្ធ។
លោកស៊ី ដែលជាប្រធានគណៈកម្មការយោធាមជ្ឈិមបានចុះហត្ថលេខាលើក្រឹត្យមួយ សម្រាប់បទបញ្ជាថ្មីស្តីពីការត្រួតពិនិត្យការហ្វឹកហ្វឺនយោធា ដែលនឹងចូលជាធរមាននៅថ្ងៃទី ១ខែមីនា។
ការបង្កើនការហ្វឹកហាត់ និងការអនុវត្តន៍វិន័យឲ្យបានខ្ជាប់ខ្ជួននេះ បានធ្វើឡើងបន្ទាប់ពីមានរបាយការណ៍រិះគន់ដល់កងទ័ពចិន ដែលមានការខ្វះខាតលើហ្វឹកហាត់ប្រើគ្រឿងសព្វាវុធធុនធ្ងន់។ របាយការណ៍ពីកងកម្លាំងចិនបាននិយាយថា កងទ័ពចិនធ្វើការវិនិយោគលើការបំពាក់អាវុធ ក្នុងទំហំទឹកប្រាក់ ១៧៥ពាន់លានដុល្លារលើកងទ័ពរំដោះប្រជាជនចិន និងកងទ័ពជើងទឹក។
បទបញ្ជាដែលបានចុះហត្ថលេខានេះ គឺជាជំហានមួយទៀតនៅក្នុងកិច្ចខិតខំប្រឹងប្រែងថ្មីៗរបស់ចិន ក្នុងការបង្កើនប្រសិទ្ធភាពយោធា រួមទាំងការដាក់ពង្រាយប្រព័ន្ធរ៉ាដា បណ្តាញដែលមានសមត្ថភាពក្នុងការរកឃើញយន្តហោះបំបាំងកាយ និងអនុវត្តន៍គ្រឿងសព្វាវុធមួយចំនួនផ្សេងទៀត។
បញ្ជានេះបានលេចឡើងក្រោយពេលដែលភាពតានតឹងបានឡើងកម្តៅខ្លាំង នៅក្នុងតំបន់មហាសមុទ្រប៉ាស៊ីហ្វិក ជាពិសេសបន្ទាប់ពីសហរដ្ឋអាមេរិកបានផ្គុំកម្លាំងទ័ពអាកាស ដោយមានការចូលរួមពីយន្តហោះចម្បាំងបំបាំងកាយស៊េរីទំនើបបំផុត និងយន្តហោះទម្លាក់គ្រាប់បែកមហាកំណាចគ្មានគូប្រៀប ទៅធ្វើសមយុទ្ធទ្រង់ទ្រាយធំ នៅក្នុងតំបន់ឥណ្ឌូប៉ាស៊ីហ្វិក បញ្ជូនសារគម្រាមទៅកាន់ទីក្រុងប៉េកាំង៕
Home ព្រឹត្តិការណ៍ថ្មីៗ លោកស៊ី ជិនពីងចុះហត្ថលេខាលើបទបញ្ញតិបង្កើនការហ្វឹកហាត់ដល់កងកម្លាំង