ប្រធានកងកម្លាំងអាកាសអូស្ត្រាលីបាននិយាយថា ទីក្រុងកង់បេរ៉ាគួរតែចំណេញបានពីទីតាំងភូមិសាស្ត្ររបស់ខ្លួន ក្នុងការបង្កើននូវវត្តមានខាងវិស័យអវកាស។
របាយការពីវិទ្យុញូហ្សឺលែនបាននិយាយថា កងកម្លាំងយោធាអូស្ត្រាលីនឹងចូលរួមនៅក្នុងការប្រណាំងប្រជែងខាងវិស័យអវកាសថ្មីមួយ ខណៈដែលវិស័យអវកាសបានក្លាយទៅជាទីលានប្រណាំងប្រជែងគ្នាយ៉ាងស្វិតស្វាញ។
នាយឧត្តមសេនីយ៍ឯក Leo Davies ប្រធានកងទ័ពអាកាសអូស្ត្រាលី (RAAF) បាននិយាយថា ភូមិសាស្ត្រតែមួយគត់របស់ប្រទេសនេះ គឺសាកសមក្នុងការដើរតួ ខណៈដែលលោកទទួលស្គាល់ថា ប្រទេសអូស្ត្រាលីដើរតាមក្រោយប្រទេសមហាអំណាចខាងវិស័យអវកាស។ ប្រធានកងកម្លាំងរូបនោះបានទស្សន៍ទាយថា កងទ័ពអាកាសអូស្ត្រាលីនឹងធ្វើការវិនិយោគយ៉ាងធំធេងខាងវិស័យអវកាស ក្នុងរយៈពេល ២០ឆ្នាំខាងមុខនេះ។
របាយការណ៍នេះបានឱ្យដឹងថា រដ្ឋាភិបាលអូស្ត្រាលីព្យាករថា នៅឆ្នាំ ២០៣០ ឧស្សាហកម្មអវកាសជាតិនឹងតំណាងឱ្យ ១២ពាន់លានដុល្លារ ដល់សេដ្ឋកិច្ច។ អូស្ត្រាលីបានបង្កើតនូវទីភ្នាក់ងារអវកាស កាលពីឆ្នាំមុន។ យ៉ាងណាក៏ដោយ អូស្ត្រាលីមិនមានគម្រោងបង្កើតកងកម្លាំងអវកាសកំណែទម្រង់ថ្មីដូចលោកត្រាំបានប្រកាសនោះទេ៕
