សារព័ត៌មាន Daily Mail បានចេញផ្សាយនៅថ្ងៃទី៨ មីនានេះថា មានករណីគ្រោះរញ្ជួយដីមួយកន្លែងបានកើតឡើងនៅក្នុងទីក្រុងរ៉ែមួយ នាប្រទេសកូរ៉េខាងជើង។
គ្រោះរញ្ជួយដីកម្រិត ២, ១រ៉ិចទ័រត្រូវបានរាយការណ៍នៅក្នុងទីក្រុងតូចមួយរបស់កូរ៉េខាងជើង នៅជិតព្រំដែនជាមួយកូរ៉េខាងត្បូង កាលពីពាក់កណ្តាលថ្ងៃត្រង់នាថ្ងៃព្រហស្បតិ៍ម្សិលមិញ។
អ្នកជំនាញខាងឧត្តុនិយមកូរ៉េខាងត្បូងបាននិយាយថា គ្រោះរញ្ជួយដីនេះទំនងជាបណ្តាលមកពីការផ្ទុះ។ កាសែត Korean Times បានរាយការណ៍ថា គ្រោះរញ្ជួយដីដែលមានលក្ខណៈសិប្បនិម្មិតនេះ គឺស្ថិតនៅផ្ទៃដីខាងលើ។
គ្រោះរញ្ជួយដីនេះបានកើតឡើងបន្ទាប់ពីមានរបាយការណ៍ថា កូរ៉េខាងជើងកំពុងតែសាងសង់ទីតាំងបាញ់បង្ហោះផ្កាយរណបរយៈចម្ងាយឆ្ងាយឡើងវិញ ដែលប្រទេសនេះបានរុះរើកាលពីឆ្នាំមុន។
របាយការណ៍ចុងក្រោយស្តីពីផលិតនុយក្លេអ៊ែរឡើងវិញពីសំណាក់កូរ៉េខាងជើង បានលេចឡើងបន្ទាប់ពីជំនួបកំពូលរវាងសហរដ្ឋអាមេរិក និងកូរ៉េខាងជើងបានទទួលបរាជ័យ នៅក្នុងការចរចា ដែលធ្វើឡើងនាទីក្រុងហាណូយថ្មីៗនេះ។
សហរដ្ឋអាមេរិកបានចាប់ផ្តើមធ្វើសមយុទ្ធឡើងវិញ បើទោះបីជាសមយុទ្ធនេះមានលក្ខណៈទ្រង់ទ្រាយតូចក៏ដោយ ក៏សមយុទ្ធនេះត្រូវបានគេមើលឃើញថា គឺជាការផ្ញើសារមួយថា កងកម្លាំងសហរដ្ឋអាមេរិកនៅតែឃ្លាំមើលកូរ៉េខាងជើងគ្រប់ពេល។
ទីប្រឹក្សាសន្តិសុខជាតិអាមេរិក លោកចន បុលថុនបានព្រមានថា សហរដ្ឋអាមេរិកនឹងដាក់ទណ្ឌកម្មបន្ថែមទៀតទៅលើកូរ៉េខាងជើង បើប្រទេសនេះនៅតែមិនព្រមបោះបង់កម្មវិធីអាវុធនុយក្លេអ៊ែររបស់ខ្លួន៕
Home ព្រឹត្តិការណ៍ថ្មីៗ គ្រោះរញ្ជួយដីវាយប្រហារទៅលើកូរ៉េខាងជើង ខណៈដែលប្រទេសនេះកំពុងសាងសង់មូលដ្ឋានអាវុធនុយក្លេអ៊ែររបស់ខ្លួនឡើងវិញ