កាំភ្លើងរ៉ាឌីកាលថ្មីរបស់អាមេរិក ដែលគេចាត់ទុកថាជាអាវុធក្នុង“សង្គ្រាមពិភពផ្កាយ”និងអាចបាញ់ក្នុងល្បឿនលឿន៧ដងជាងសំឡេងរបស់វានោះ ត្រូវបានដាក់បង្ហាញជូនសាធារណជនជាលើកដំបូង។
កាំភ្លើងដែលត្រូវបានក្រុមអ្នកស្រាវជ្រាវចាត់ទុកថាជា “បច្ចេកវិទ្យាសង្គ្រាមពិភពផ្កាយ”នេះ អាចបាញ់គ្រាប់ក្នុងល្បឿនលឿន៧ដងនៃសំឡេងរបស់វា ហើយថែមទាំងអាចទម្លុះជញ្ជាំងបេតុងនៅចម្ងាយ១៦០គ.មបានបថែមទៀតផង។
កាំភ្លើងមហាប្រល័យដ៏អស្ចារ្យមួយនេះ ត្រូវបានដាក់បង្ហាញជូនសាធារណជនទស្សនាជាលើកដំបូងនៅឯពិព័រណ៍បច្ចេកវិទ្យា និងវិទ្យាសាស្ត្រកម្លាំងអនាគតរបស់កងទ័ពជើងទឹកសហរដ្ឋអាមេរិក នៅឯមជ្ឈមណ្ឌល Walter E. Washington Convention Center ស្ថិតក្នុងទីក្រុងវ៉ាស៊ីងតោន។
ជាមួយនឹងការប្រើប្រាស់ថាមពលអេឡិចត្រូម៉ាញ៉េទិក កាំភ្លើងមួយនេះ អាចបាញ់គ្រាប់ទម្ងន់១០គ.កក្នុងល្បឿន៨.៧០០គ.មក្នុង១ម៉ោងក្នុងរយៈចម្ងាយ១៦០គ.ម ដោយកម្លាំងខ្លាំងបែបនេះ វាអាចទម្លុះជញ្ជាំងបេតុង៣ជាន់ ឬដែកថែបកម្រាស់១៦សង់ទីម៉ែត្រកន្លះ។
គំរូដើមនៃអាវុធនេះ ត្រូវបានអភិវឌ្ឍឡើងដោយសម្រាប់កងទ័ពជើងទឹកសហរដ្ឋអាមេរិក ដែលគំរូដើមទី១ ផលិតឡើងដោយក្រុមហ៊ុនអង់គ្លេស BAE និងគំរូដើមទី២ ដោយក្រុមហ៊ុនអាមេរិក។
លោកអនុឧត្តមនារីឯក Matthew Klunder គឺជាប្រធានក្រុមស្រាវជ្រាវកងទ័ពជើងទឹកសហរដ្ឋអាមេរិក បាននិយាយថា កាំភ្លើងអេឡិចត្រួម៉ាញ៉េទិកដ៏ទំនើបនេះ បានសាកល្បងបាញ់លើដីរួចទៅហើយ ហើយវានឹងត្រូវបំពាក់លើនាវាល្បឿនលឿន USNS Millinocket សម្រាប់ការសាកល្បងក្នុងសមុទ្រ។
លោកបន្តថា ឥឡូវវាក្លាយជាការពិត វាមិនមែនជារឿងប្រឌិតបែបវិទ្យាសាស្ត្រទៀតទេ។
លោកបានបន្តថា កាំភ្លើងមួយនេះ ប្រើប្រាស់តែថាមពលអគ្គិសនីប៉ុណ្ណោះ គ្មានជាតិរំសេវនោះទេ ហើយវាគឺជាអាវុធមហាប្រល័យមួយដែលនឹងត្រូវប្រើប្រាស់ពេលមានសង្គ្រាមជើងទឹក។
លោក Klunder បញ្ជាក់ថា វានឹងជួយពួកយើងការពារដែនអាកាស វានឹងជួយពួកយើងក្នុងការការពារមីស៊ីលរយៈចម្ងាយមធ្យម ហើយវានឹងជួយពួកយើងក្នុងការការពារមីស៊ីលបាលីស្ទិករយៈចម្ងាយឆ្ងាយ ពីព្រោះថា កាំភ្លើងសង្គ្រាមពិភពផ្កាយនេះ ពិតជាមានអានុភាពខ្លាំងណាស់។
សូមបញ្ជាក់ថា នាវាច្បាំងអាចផ្ទុកមីស៊ីលរាប់សិបដើមប៉ុណ្ណោះ ដែលមីស៊ីលក្នុង១ដើមតម្លៃប្រហែល៦សែនផោន ប៉ុន្តែវានឹងអាចផ្ទុកគ្រាប់កាំភ្លើងអេឡិចត្រូម៉ាញ៉េទិករាប់រយគ្រាប់ ដែលក្នុង១គ្រាប់មានតម្លៃ១៥.០០០ផោន៕
