(ទីក្រុងបាងកក)៖ អតីតនាយករដ្ឋមន្ត្រីថៃ លោក អាភិស៊ីត វាចាជីវ៉ា បានលាលែងពីមុខតំណែងជាប្រធានគណបក្សប្រជាធិបតេយ្យ បន្ទាប់ពីការបង្ហាញលទ្ធផលនៃការបោះឆ្នោតកាលពីថ្ងៃទី២៤ មីនាម្សិលមិញ។
គណបក្សនយោបាយដែលមានអាយុចាស់ជាងគេនៅប្រទេសថៃមួយនេះ ស្ថិតនៅលំដាប់លេខរៀងទីបួន ក្នុងការបោះឆ្នោត។
លោកអភីស៊ីត ដែលជានាយករដ្ឋមន្ត្រីថៃពីឆ្នាំ ២០០៨ ដល់ឆ្នាំ ២០១១ បាននិយាយថា «ខ្ញុំត្រូវតែមានទំនួលខុសត្រូវលើរឿងនេះ។ ខ្ញុំលាលែងពីភាពជាអ្នកដឹកនាំរបស់ខ្ញុំនៅក្នុងគណបក្សប្រជាធិបតេយ្យ»។
ការប្រកាសលាលែងពីតំណែងរបស់លោកអភិស៊ីតនាពេលនេះ បានធ្វើឡើងបន្ទាប់ពីការរាប់សន្លឹកឆ្នោត។ អ្វីដែលបានធ្វើឲ្យលោកអភិស៊ីតអស់សង្ឃឹម គឺគណបក្សអាណាខុតម៉ៃ ដែលជាគណបក្សទើបបង្កើតថ្មីឈរនៅលេខរៀងទី៣ គឺនាំមុខគណបក្សប្រជាធិបតេយ្យរបស់លោកអាភីស៊ីត ដោយគណបក្សនោះទទួលបានសម្លេង ៥លានសន្លឹក ខណៈដែលគណបក្ររបស់លោកអាភិស៊ីត ដែលជាគណបក្សដែលមានវ័យចំណាស់ជាងគេទទួលបានតែ ៣លានសន្លឹកតែប៉ុណ្ណោះ។
ការរាប់សន្លឹកឆ្នោត បានចាប់ផ្ដើមធ្វើឡើងភ្លាមៗ ក្រោយពីការបោះឆ្នោតបានបញ្ចប់នៅម៉ោង៥ល្ងាច ម៉ោងក្នុងស្រុក។
ការស្ទង់មតិក្រោយការបោះឆ្នោតដំបូងបានបង្ហាញថា គណបក្សភឿថៃរបស់អតីតនាយករដ្ឋមន្ត្រីលោក Thaksin Shinawatra បាននាំមុខ ប៉ុន្តែលទ្ធផលផ្លូវការបឋមៗ ដែលបានចេញផ្សាយកាលពីថ្ងៃអាទិត្យ បានបង្ហាញថាគណបក្ស Phalang Pracharat ដែលមានក្រុមយោធានៅពីក្រោយនោះ បាននាំមុខទៅវិញ។
យុទ្ធនាការឃោសនាបោះឆ្នោត ត្រូវបានញាំញីដោយការចោទប្រកាន់អំពីការទិញសន្លឹកឆ្នោត ប៉ុន្តែ មានការតវ៉ាតិចតួចប៉ុណ្ណោះនៅក្នុងថ្ងៃបោះឆ្នោត ដោយមានការចូលរួមពីក្រុមអ្នកសង្កេតការណ៍បោះឆ្នោតមកពីប្រទេសអូស្ត្រាលី កាណាដា សហរដ្ឋអាមេរិក និងប្រទេសសមាជិកទាំង១០នៃសមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ានផងដែរ។
សន្លឹកឆ្នោត ៩៤ភាគរយត្រូវបានរាប់នៅយប់ថ្ងៃអាទិត្យ គណបក្សដែលគាំទ្រយោធា ផាឡាង ប្រាឆារ៉ាត ទទួលបានសន្លឹកឆ្នោត ៧លាន ៦៩ម៉ឺនសម្លេង រីឯគណបក្សភឿថៃ ដែលមានទំនាក់ទំនងជាមួយលោកថាក់ស៊ីនទទួលបាន ៧លាន ២០ម៉ឺនសម្លេងតែប៉ុណ្ណោះ។
លោកថាក់ស៊ីន ឬមេដឹកនាំថៃដែលមានទំនាក់ទំនងជាមួយលោកថាក់ស៊ីន តែងឈ្នះរាល់ការបោះឆ្នោតលើកមុនៗ ចាប់តាំងពីឆ្នាំ ២០០១មក។ ប៉ុន្តែសម្រាប់ការបង្ហាញលទ្ធផលចុងក្រោយនេះ អាចបង្ហាញពីក្តីប្រាថ្នារបស់អ្នកបោះឆ្នោតឲ្យលោកថាក់ស៊ី ចាកចេញពីឆាកនយោបាយ ដែលធ្លាប់មានប្រជាប្រិយភាពកាលពីអតីតកាល។
គណៈកម្មាធិការបោះឆ្នោតរបស់ប្រទេសថៃបាននិយាយថា ខ្លួននឹងប្រកាសលទ្ធផលបឋមនៅថ្ងៃចន្ទនេះ ប៉ុន្តែបានផ្អាកការសន្យាជាផ្លូវការចុងក្រោយរបស់ខ្លួនវិញ ដែលការផ្អាកនេះញ៉ាំងឲ្យមានការរិះគន់ពីមជ្ឈដ្ឋានក្រុមអ្នកសង្កេតការណ៍។
ក្រុមអ្នករិះគន់បានចង្អុរបង្ហាញទៅកាន់សន្លឹកឆ្នោតដែលត្រូវរាប់ថាមានភាពមិនប្រក្រតី រួមទាំងសន្លឹកឆ្នោតជិត ២លានសន្លឹកគ្មានបានការ។
ការបោះឆ្នោតនេះគឺជាលើកទីមួយហើយ ចាប់តាំងពីពួកយោធាបានកាន់អំណាចនៅក្នុងការធ្វើរដ្ឋប្រហារមួយ កាលពីឆ្នាំ ២០១៤។
គណៈកម្មាធិការបោះឆ្នោតបានដាក់អត្រាអ្នកទៅបោះឆ្នោតក្នុងអត្រាប្រហែល ៦៦ភាគរយនៃអ្នកបោះឆ្នោតជិត ៥២លាននាក់ ដែលអត្រានេះមានចំនួនតិចជាងការរំពឹងទុក។
អគ្គលេខាធិការភឿថៃ លោក Poomtham Wecchayachai បានបង្ហាញថា គណបក្សនឹងទទួលយកលទ្ធផលនៃការបោះឆ្នោតនេះ។
ក្រុមអ្នករិះគន់បាននិយាយថា ច្បាប់បោះឆ្នោតថ្មីត្រូវបានបង្កើតឡើង ដើម្បីធ្វើឱ្យប៉ះពាល់ដល់គណបក្សធំ ៗ ដូចជាគណបក្សភឿថៃ ហើយធ្វើឲ្យយោធាអាចបន្តកាន់អំណាចតទៅទៀត៕
