សារព័ត៌មាន Defense News បានចេញផ្សាយនៅថ្ងៃទី0២ មេសានេះថា ក្រុមមន្ត្រីអង្គការណាតូកំពុងធ្វើការរួមគ្នាលើគម្រោងសាងសង់មូលដ្ឋានដ៏ធំនៅក្នុងប្រទេសប៉ូឡូញ ដើម្បីដាក់រថពាសដែករបស់អាមេរិកនៅប្រទេសនេះ។
មូលដ្ឋានយោធានៅប្រទេសប៉ូឡូញនេះមានន័យថា គឺដើម្បីស្តុកទុកនូវគ្រឿងបរិក្ខាយោធាសហរដ្ឋអាមេរិកនៅក្នុងប្រទេសអ៊ឺរ៉ុបខាងកើតមួយនេះ ក្នុងករណីដែលមានការប្រឈមមុខដាក់គ្នាជាមួយប្រទេសរុស្ស៊ី។ ក្រុមមន្ត្រីមន្ទីរប៉ង់តាហ្គោនបានពិចារណាលើការតាំងមូលដ្ឋាននាពេលអនាគតនៅក្នុងតំបន់ Powidz ដែលស្ថិតនៅប៉ែកខាងលិចនៃប្រទេសប៉ូឡូញ។
អគ្គលេខាធិការអង្គការណាតូលោក Jens Stoltenberg បានប្រាប់កាសែត Wall Street Journal នៅក្នុងបទសម្ភាសន៍កាលពីដើមខែនេះថាការស្ថាបនាមូលដ្ឋានយោធានេះ នឹងចាប់ផ្តើមនៅរដូវក្តៅនេះ។ ការសម្រេចចិត្តដើម្បីសាងសង់ឃ្លាំងផ្ទុកភស្តុភានេះ ត្រូវបានធ្វើឡើងដោយសម្ព័ន្ធមិត្តកាលពីប៉ុន្មានឆ្នាំមុន ឬសំណើរបង្កើតមូលដ្ឋានយោធាពីសំណាក់សម្ព័ន្ធមិត្តនេះ បានកើតឡើងមុនប៉ូឡូញស្នើបង្កើតបន្ទាយត្រាំទៅទៀត។ ប៉ូឡូញស្នើបង្កើតបន្ទាយត្រាំ ដើម្បីដាក់ទ័ពអាមេរិកនៅលើទឹកដីរបស់ខ្លួន ដោយសារតែប៉ូឡូញខ្លាចមានវាសនាដូចអ៊ុយក្រែន ក្រោយរុស្ស៊ីបានលេបត្របាក់ទឹកដីអ៊ុយក្រែន។
មូលដ្ឋានយោធា Powidz នេះធ្វើឡើងក្រោមកម្មវិធីវិនិយោគសន្តិសុខរបស់អង្គការណាតូ ក្នុងទំហំទឹកប្រាក់ ២៦០លានដុល្លារ ដោយសមាជិកចំនួន ២៩ប្រទេសធ្វើការបរាច្ចាកតាមរយៈផលិតផលក្នុងស្រុកសរុបរបស់ខ្លួន។
សហរដ្ឋអាមេរិកចំណាយលើផលិតផលក្នុងស្រុកសរុបដល់ទៅ ២០ ទៅ ២៥ភាគរយលើមូលដ្ឋានយោធានេះ។ រដ្ឋបាលលោកត្រាំបានស្នើសុំថវិកាចំនួន ១៤៤លានដុល្លាសម្រាប់កម្មវិធីវិនិយោគសន្តិសុខអង្គការណាតូ NATO Security Investment Program ឬ NSIP សម្រាប់ឆ្នាំសារពើរពន្ធ ២០២០ បើប្រៀបធៀបទៅនឹងសំណើសម្រាប់ឆ្នាំ ២០១៩គឺមានទំហំ ១៧១លានដុល្លារ៕
