នៅថ្ងៃព្រហស្បតិ៍ទី២៥ មេសា នេះ លោកប្រធានាធិបតីរុស្ស៊ី វ្ល៉ាឌីមៀរ ពូទីន និងប្រមុខដឹកនាំកូរ៉េខាងជើង លោក គីម ជុងអ៊ុននឹងជួបគ្នានៅក្នុងជំនួបកំពូលជាលើកដំបូង។
មន្ត្រីវិមានក្រិមឡាំងនិយាយថា ជំនួបកំពូលនេះនឹងប្រព្រឹត្តទៅនៅថ្ងៃព្រហស្បតិ៍នៅកំពង់ផែប៉ាស៊ីហ្វិកនៃទីក្រុង Vladivostok។ ចំពោះរបៀបវីរដែលនឹងត្រូវលើកមកនិយាយនៅក្នុងជំនួបកំពូលនោះ គឺការបញ្ចប់ភាពតានតឹងជុំវិញកម្មវិធីអាវុធនុយក្លេអ៊ែររបស់ទីក្រុងព្យុងយ៉ាង។
ការស្ទុះម្នីម្នាស្វែងរកការជួយអន្តរាគមន៍ខាងការទូតពីសំណាក់រុស្ស៊ីដោយកូរ៉េខាងជើងនាពេលនេះ បានធ្វើឡើងក្រោយពេលដែលប្រទេសកូរ៉េខាងជើងបានទទួលបរាជ័យ ក្នុងការរកដំណោះស្រាយជុំវិញការរំសាយអាវុធនុយក្លេអ៊ែរ។ កូរ៉េខាងជើងស្នើឲ្យលោកត្រាំដកទណ្ឌកម្មទាំងអស់សិន ទើបខ្លួនបញ្ឈប់កម្មវិធីអាវុធនុយក្លេអ៊ែររបស់ខ្លួនទាំងស្រុង។ ឃើញដូច្នេះហើយ លោកត្រាំក៏បានដើរចេញពីកិច្ចប្រជុំនោះដោយមិនបាននិយាយវែងឆ្ងាយ។ អ្នកវិភាគមើលឃើញថា កូរ៉េខាងជើងកំពុងបោះដៃទៅរករុស្ស៊ីឲ្យប្រទេសនេះជួយបន្ធូរបន្ថយទណ្ឌកម្មអាមេរិកមកលើខ្លួន៕