លោក Terry Gou ប្រធានក្រុមហ៊ុន Foxconn ដែលផ្គត់ផ្គង់សម្ភារៈអេឡិចត្រូនិចដល់ក្រុមហ៊ុនអេភល ដែលបានចូលរួមឈរឈ្មោះប្រជែងជាប្រធានាធិបតីតៃវ៉ាន់បានថ្លែងថា ចិនត្រូវតែទទួលស្គាល់ឯករាជ្យរបស់តៃវ៉ាន់។
លោកហ្គូបានប្រាប់អ្នកយកព័ត៌មានកាលពីថ្ងៃចន្ទថា «ចិនត្រូវតែទទួលស្គាល់វត្តមាននៃសាធារណៈរដ្ឋចិន»។ លោកបានបន្ថែមថា លោកនឹងមិនពិចារណាជួបជាមួយប្រធានាធិបតីចិន លោក ស៊ីជីនពីងនោះទេ លុះត្រាតែលោកទទួលបានការបំភ្លឺពីរដ្ឋាភិបាលក្រុងប៉េកាំងអំពីគោលនយោបាយរបស់ខ្លួន ចំពោះទីក្រុងតៃប៉ិ និងទាល់តែលោកបានក្លាយជាប្រធានាធិបតីតៃវ៉ាន់។
សាធារណៈរដ្ឋចិន ឬតៃវ៉ាន់ ត្រូវបានបង្កើតឡើងនៅលើទឹកដីចិន មុនការធ្វើបដិវត្តន៍ចិនទៅទៀត គឺនៅឆ្នាំ ១៩១១។ ក្រោយការធ្វើបដិវត្ត សាធារណរដ្ឋចិន ឬហៅថា តៃវ៉ាន់ដែលដឹកនាំដោយគួមីងតាងបានចាញ់សង្គ្រាម និងបានភៀសខ្លួនទៅតាំងមូលដ្ឋាននៅលើកោះតៃវ៉ាន់នៅឆ្នាំ ១៩៤៩។ ទោះបីជាយ៉ាងនេះក្តី តៃវ៉ាន់នៅតែប្រើច្បាប់ និងគោលការណ៍ដែលខ្លួនបានប្រើកាលខ្លួនមានមូលដ្ឋាននៅចិនដដែល ដូចជារដ្ឋធម្មនុញ្ញជាដើម។
ដោយមានឥទ្ធិពលយោធាដ៏ខ្លាំងក្លា គណបក្សកុម្មុយនីស្តចិនបានអះអាងថា តៃវ៉ាន់គឺជាខេត្តមួយរបស់ខ្លួន និងគម្រាមចូលឈ្លានពាន ប្រសិនបើកោះនេះនៅតែបន្តប្រឆាំងនឹងការបង្រួបបង្រួមរបស់ខ្លួន។ យោងតាមការធ្វើប្រជាមតិ ភាគច្រើនលើសលុបនៃប្រជាជនតៃវ៉ាន់ចង់រក្សាភាពឯករាជ្យរបស់ខ្លួន។
លោកហ្គូមិនទាន់ទទួលបានការតែងតាំងដឹកនាំគណបក្សគួមីងតាន ដែលជាគណបក្សប្រឆាំងតៃវ៉ាន់ ដើម្បីឈរឈ្មោះសម្រាប់ការបោះឆ្នោតនៅខែមករានៅឡើយទេ។ ប៉ុន្តែចាប់តាំងពីក្រុមហ៊ុន Foxconn មានមូលដ្ឋាននៅចិនមក អ្នកវិភាគមើលឃើញថា លោកគឺជាហានិភ័យសន្តិសុខដ៏ខ្លាំងក្លា។ អ្នកវិភាគបង្ហាញទឡ្ហិករណ៍ថា ផលប្រយោជន៍ជំនួញរបស់គាត់អាចបង្កជម្លោះជាមួយផលប្រយោជន៍ជាតិរបស់ទីក្រុងតៃប៉ិ។
ការអត្ថាធិប្បាយរបស់លោក Gou បានធ្វើឡើងត្រឹមតែពីរ បីថ្ងៃប៉ុណ្ណោះ ក្រោយពេលដែលលោកបានបញ្ចេញប្រតិកម្មយ៉ាងខ្លាំងប្រឆាំងការហៅតៃវ៉ាន់ជាទឹកដីរបស់ចិន។
ការលើកឡើងរបស់លោកក៏ជាការលើកឡើងមួយ ដែលបន្ទរតាមសន្ទរកថា លោកស្រី Tsai Ing-wen ផងដែរ។ លោកស្រីសៃបាននិយាយពីមុនហើយថា តៃវ៉ាន់និងមិនឱនក្បាលដាក់ចិនជាដាច់ខាត៕
