ទីភ្នាក់ងារសារព័ត៌មានរុស្ស៊ីបាននិយាយនៅថ្ងៃទី១៤ ឧសភានេះថា ប្រធានាធិបតីរុស្ស៊ី លោក វ្ល៉ាឌីមៀរ ពូទីនបានបញ្ជាឲ្យមានការបង្កើតកងកម្លាំងអវកាសឡើង ដើម្បីប្រឆាំងទៅនឹងអាវុធល្បឿនលឿនជាងសម្លេងរបស់គូសត្រូវ។ នេះគឺការចម្លងតាមសហរដ្ឋអាមេរិកសុទ្ធសាធ ដែលរុស្ស៊ីសម្រេចបង្កើតកងកម្លាំងនេះឡើង។ ការបង្កើតកម្លាំងអវកាសនេះ សហរដ្ឋអាមេរិកគឺជាអ្នកចាប់ផ្តើមបង្កើតមុនរុស្ស៊ី ដោយមានកម្លាំងប្រមាណជាង ១ម៉ឺននាក់។
ចាប់តាំងពីការបង្កើតកងកម្លាំងអវកាសសហរដ្ឋអាមេរិកមក គ្រាប់មីស៊ីលល្បឿនលឿនជាងសម្លេងរុស្ស៊ីអស់ឥទ្ធិពលហើយ ដែលធ្វើឲ្យលោកពូទីនមានការព្រួយបារម្ភយ៉ាងខ្លាំង ដោយខ្លាចឥទ្ធិពលយោធាសហរដ្ឋអាមេរិក។ កាលពីពេលថ្មីៗនេះ រុស្ស៊ីបានសម្តែងក្តីទុក្ខកង្វល់អំពីគ្រាប់មីស៊ីលសហរដ្ឋអាមេរិក បន្ទាប់ពីកូរ៉េខាងជើងបានបាញ់គ្រាប់មីស៊ីល ហើយអាមេរិកបាញ់បញ្ជូនសាគម្រាមទៅប្រទេសនេះវិញ។
លោកប្រធានាធិបតីរុស្ស៊ីបានណែនាំយ៉ាងជាក់លាក់ថា ប្រព័ន្ធការពារបែបនេះ ត្រូវបានបង្កើត និងអនុម័ត មុនពេលដែលប្រទេសមួយទៀតនឹងបំពាក់អាវុធល្បឿនលឿនជាងសម្លេង។ លោកបានបន្ថែមថា សារៈសំខាន់នៃត្រូវកងកម្លាំងអវកាសនឹងត្រូវបង្កើននាពេលអនាគត។
ការបង្កើតកងកម្លាំងអវកាសរុស្ស៊ីនេះឡើង បញ្ជាក់យ៉ាងច្បាស់ថា រុស្ស៊ីពិតជាមានការភ័យខ្លាចពីការសម្រុកធ្វើមីស៊ីលពីសំណាក់សហរដ្ឋអាមេរិក។ សហរដ្ឋអាមេរិកប្រកាសថា ខ្លួននឹងបង្កើនការផលិតមីស៊ីលអន្តរទ្វិប និងមីស៊ីលល្បឿនលឿនជាងសម្លេងមិនឲ្យចាញ់រុស្ស៊ីឡើយ ត្បិតអាមេរិកជាអ្នកមានជាងរុស្ស៊ី។
លោកពូទីនក៏បានចង្អុលបង្ហាញអំពីសមិទ្ធផលថ្មីបំផុតនៃកងកម្លាំងអាកាសរុស្ស៊ី ដូចជាការបញ្ចប់ការធ្វើតេស្តសម្រាប់ប្រព័ន្ធការពារដែនអាកាស S-350E "Vityaz" ចុងក្រោយបំផុតដោយសង្កត់ធ្ងន់លើប្រសិទ្ធភាពរបស់ខ្លួនប្រឆាំងនឹងមីស៊ីលបាញ់ចំគោលដៅ និងសមត្ថភាពមីស៊ីលដែលត្រូវបានពង្រឹង។ លោកពូទីនក៏បានកត់សម្គាល់ផងដែរថាប្រព័ន្ធអាវុធដ៏ទំនើបមានចំនួន ៨២% នៃគ្រឿងសព្វាវុធទាំងអស់ នៅក្នុងកងកម្លាំងយុទ្ធសាស្ត្ររបស់រុស្ស៊ី។
ការប្រណាំងប្រជែងអាវុធរវាងសហរដ្ឋអាមេរិក និងរុស្ស៊ីនេះ លេចឡើងបន្ទាប់ពីលោកត្រាំប្រកាសដកខ្លួនចេញពីសន្ធិសញ្ញានុយក្លេអ៊ែរជាមួយរុស្ស៊ី ដោយសហរដ្ឋអាមេរិកចោទថា រុស្ស៊ីបានរំលោភលើសន្ធិសញ្ញានោះ ដោយសារតែរុស្ស៊ីលួចផលិតមីស៊ីលហួសការកំណត់៕
