(រដ្ឋធានីវ៉ាស៊ីងតោន)៖ សារព័ត៌មានរ៉យទ័របានចេញផ្សាយនៅថ្ងៃទី២០ ឧសភានេះថា កងកម្លាំងយោធាសហរដ្ឋអាមេរិកបាននិយាយថា កាលពីថ្ងៃអាទិត្យ នាវាចម្បាំងរបស់ខ្លួនមួយគ្រឿងបានបើកទៅជិតតំបន់ Scarborough Shoal ក្នុងតំបន់សមុទ្រចិនខាងត្បូង ដែលតំបន់នេះត្រូវបានវ៉ាងទីដោយចិនកាន់តែខ្លាំង។
វត្តមាននាវាចម្បាំងសហរដ្ឋអាមេរិកនាពេលនេះលេចឡើងចំពេលដែលសហរដ្ឋអាមេរិក និងចិនកំពុងមានភាពតានតឹងកាន់តែខ្លាំងក្នុងសំណុំរឿងសង្គ្រាមពាណិជ្ជកម្ម ដែលថ្មីៗនេះសហរដ្ឋអាមេរិកបានបង្កើនការយកពន្ធបន្ថែមទៀតលើចិន។ ប្រទេសទាំងពីរកំពុងស្ថិតក្នុងភាពជាប់គាំង ខណៈដែលកិច្ចចរចាបានទទួលបរាជ័យ។
អ្នកនាំពាក្យកងកម្លាំងយោធាសហរដ្ឋអាមេរិកនិយាយថា នាវាចម្បាំង USS Preble បានធ្វើប្រតិបត្តិការនៅក្នុងតំបន់នេះ។
អ្នកនាំពាក្យប្រចាំកងនាវាចម្បាំងទី៧ លោកក្លេដូសបាននិយាយថា «នាវាចម្បាំង Preble បានបើកក្នុងចម្ងាយ ១៩គីឡូម៉ែត្រពីតំបន់ថ្មប៉ប្រះទឹក Scarborough Shoal ដើម្បីប្រជែងទៅនឹងការអះអាងហួសហេតុ លើដែនទឹកដែលស្ថិតក្រោមការគ្រប់គ្រងច្បាប់អន្តរជាតិ»។
ច្រើនលើកមកហើយ ដែលសហរដ្ឋអាមេរិកបានធ្វើសកម្មភាពនាវាចរណ៍ដោយសេរីនៅក្នុងតំបន់ដែនទឹកអន្តរជាតិបែបនេះ។ ក្នុងរយៈពេលមួយខែ សហរដ្ឋអាមេរិកបានធ្វើនាវាចរណ៍ដោយសេរី ៤ ទៅ ៥ដង ដើម្បីបញ្ជាក់ឲ្យពិភពលោកដឹងថា តំបន់នេះមែនជារបស់ដែលដែនតាចិនបន្សល់ទុកឲ្យនោះទេ ប៉ុន្តែតំបន់នេះ គឺជាតំបន់អន្តរជាតិសុទ្ធសាធ។ ក្រោមលក្ខណ្ឌណាក៏ដោយ តំបន់សមុទ្រចិនខាងត្បូង ត្រូវតែជាដែនទឹកអន្តរជាតិ។
បច្ចុប្បន្ននេះ ចិនកំពុងតែវ៉ាងទីផ្តាច់មុខក្នុងតំបន់នេះ ជាកម្មសិទ្ធរបស់ខ្លួនតែម្នាក់ឯង ដោយអាងកម្លាំងយោធារបស់ខ្លួននៅអាស៊ី។ ចិនកំពុងដេកយល់សប្តិអាក្រក់ថា ខ្លួននឹងអាចក្រសោបយកកោះតៃវ៉ាន់មកវិញ និងកំពុងរវើរវាយថា ខ្លួននឹងក្លាយជាមហាអំណាចដ៏ធំជាងគេនៅលើពិភពលោក តាមរយៈឥទ្ធិពលយោធា។ យ៉ាងណាមិញ នេះសុបិន្តអាក្រក់របស់ចិននេះ ទំនងជាមិនអាចក្លាយជាការពិតនោះទេ ល្គិកណាមានវត្តមានយោធាសហរដ្ឋអាមេរិក ដែលនៅចាំជួយបណ្តាប្រទេសដែលត្រូវចិនរំលោភលើដែនអធិបតេយ្យភាពយ៉ាងអយុត្តធម៌ដូចជា វៀតណាម ហ្វីលីពីន កោះតៃវ៉ាន់ ម៉ាឡេស៊ី ឥណ្ឌូនេស៊ី និងប្រ៊ុយណេជាដើម៕
Home ព្រឹត្តិការណ៍ថ្មីៗ សហរដ្ឋអាមេរិកបញ្ជូននាវាចម្បាំងមួយគ្រឿងទៅកាន់សមុទ្រចិនខាងត្បូង ដើម្បីបំបាក់ស្មារតីចិន