ជាថ្មីម្តងទៀតរដ្ឋមន្ត្រីក្រសួងការបរទេសអ៊ីរ៉ង់បានគូសបញ្ជាក់ពីការប្តេជ្ញាចិត្តរបស់ប្រទេសនេះ ក្នុងការមិនឱនក្បាលដាក់សម្ពាធសហរដ្ឋអាមេរិក ខណៈដែលភាពតានតឹងបានឡើងកម្តៅកាន់តែខ្លាំង។
ការថ្លែងបែបនេះបានធ្វើឡើងខណៈដែលលោករដ្ឋមន្ត្រីបានថ្លែងនៅឯសន្និសីទសារព័ត៌មានមួយនៅក្នុងប្រទេសអ៊ីរ៉ាក់ជាមួយលោករដ្ឋមន្ត្រីការបរទេស Mohamed Alhakim។
លោក Zarif បាននិយាយថា ប្រទេសអ៊ីរ៉ង់នឹងការពារខ្លួនប្រឆាំងនឹងការខិតខំប្រឹងប្រែងធ្វើសង្គ្រាមណាមួយប្រឆាំងមកលើអ៊ីរ៉ង់ មិនថាសង្គ្រាមសេដ្ឋកិច្ច ឬសង្គ្រាមយោធានោះទេ។
លោក Zarif បាននិយាយថា ប្រទេសអ៊ីរ៉ង់បានស្នើឱ្យមានការចុះហត្ថលេខាលើកតិកាសញ្ញាមិនឈ្លានពានជាមួយប្រទេសជិតខាងឈូងសមុទ្រអារ៉ាប់។ លោកបាននិយាយថា អ៊ីរ៉ង់ចង់កសាងទំនាក់ទំនងប្រកបដោយតុល្យភាពជាមួយពួកគេ។ ទំនាក់ទំនងរវាងអ៊ីរ៉ង់ និងប្រទេសឈូងសមុទ្រមួយចំនួនរួមមានអារ៉ាប៊ីសាអូឌីត និងប្រទេសឈូងសមុទ្រពែក្ស ដែលជាសម្ព័ន្ធមិត្តអាមេរិកមួយចំនួនផ្សេងទៀត។
រដ្ឋបាលលោកត្រាំបាននិយាយកាលពីថ្ងៃសុក្រថា ខ្លួននឹងលក់អាវុធទៅកាន់អារ៉ាប់ប៊ីសាអូឌីត អេមីរ៉ាត់អារ៉ាប់រួម និងហ្សកដានី។
កាលពីប៉ុន្មានសប្តាហ៍មុន សហរដ្ឋអាមេរិកបានបញ្ជូនក្រុមអ្នកប្រយុទ្ធកងទ័ពជើងទឹកនាវាផ្ទុកយន្តហោះ USS Abraham Lincoln ទៅកាន់តំបន់មជ្ឈឹមបូព៌ា រួមមានទាំងក្រុមយន្តហោះទម្លាក់គ្រាប់បែក B-52 ផង ដើម្បីត្រៀមកម្លាំងវាយអ៊ីរ៉ង់បើសិនជាមានការបង្កហេតុណាមួយពីសំណាក់ប្រទេសនេះ។ មកទល់ចុងសប្តាហ៍មុន លោកត្រាំបានអនុម័តលើការបញ្ជូនទ័ពប្រមាណ ១ ៥០០នាក់ទៅកាន់តំបន់នេះបន្ថែមទៀត៕
Home Uncategorized រដ្ឋមន្ត្រីការបរទេសអ៊ីរ៉ង់៖ អ៊ីរ់ង់នឹងការពារខ្លួនប្រឆាំងនឹងការធ្វើសង្គ្រាមប្រឆាំងមកលើខ្លួន