(រដ្ឋធានីវ៉ាស៊ីងតោន)៖ យោងតាមសារព័ត៌មាន USA News Today នៅថ្ងៃទី២៧ ឧសភានេះបានឲ្យដឹងថា លោកប្រធានាធិបតីសហរដ្ឋអាមេរិកដូ ណលត្រាំបាននិយាយកាលពីថ្ងៃសុក្រថា មន្ទីរប៉ង់តាហ្គោននឹងបង្កើនគ្រឿងសព្វាវុធបន្ថែមទៀតទៅកាន់ឈូងសមុទ្រពែក្ស ដើម្បីប្រឆាំងទៅនឹងអ្វីដែលសហរដ្ឋអាមេរិកហៅថា ជាការគម្រាមដ៏ពិតប្រាកដពីសំណាក់អ៊ីរ៉ង់។
លោកត្រាំបាននិយាយថា លោកគ្រោងនឹងបញ្ជូនទ័ព ១ ៥០០នាក់បន្ថែមទៀតទៅកាន់តំបន់មជ្ឈឹមបូព៌ា។ មន្ត្រីសហរដ្ឋអាមេរិកមួយរូបបាននិយាយកាលពីព្រឹកថ្ងៃសុក្រថា កងកម្លាំងប្រមាណ ៣ ០០០នាក់កំពុងស្ថិតក្រោមការពិចារណាបញ្ជូនបន្ថែមទៀត។
ថ្លែងទៅកាន់អ្នករាយការណ៍ព័ត៌មាន ខណៈដែលលោកចាកចេញពីសេតវិមាន ដើម្បីធ្វើដំណើរទស្សនកិច្ចចុងសប្តាហ៍ទៅកាន់ជប៉ុន លោកប្រធានាធិបតីសហត្រាំបានពិពណ៌នាកងទ័ពថា បានបំពេញកាតព្វកិច្ចការពារជាតិបានយ៉ាងល្អ។ មន្ត្រីសហរដ្ឋអាមេរិកមួយរូបបាននិយាយថា កងទ័ពភាគច្រើននឹងត្រូវប្រមូលយកព័ត៌មានសម្ងាត់ និងតម្លើងយានបាញ់មីស៊ីល។
លោក Patrick M. Shanahan រដ្ឋមន្ត្រីការពារជាតិស្តីទីបាននិយាយកាលពីថ្ងៃសុក្រថា លោកបានឯកភាពលើការដាក់ពង្រាយគ្រឿងសព្វាវុធ និងកងទ័ពបន្ថែមទៀតទៅកាន់តំបន់មជ្ឈឹមបូព៌ា ដើម្បីការពារសុវត្ថិភាពកងកម្លាំងសហរដ្ឋអាមេរិក ក្រែងមានការគម្រាមកំហែងណាមួយធ្វើឡើងពីសំណាក់កងកម្លាំងអ៊ីរ៉ង់ រួមទាំងកងកម្លាំងឆ្មាំបដិវត្តន៍ឥស្លាម និងកងកម្លាំងតំណាងអ៊ីរ៉ង់។
លោកបន្តថា «ការដាក់ពង្រាយនេះ នឹងរួមបញ្ចូលទាំងបុគ្គលិកយោធាអាមេរិកប្រហែល ១ ៥០០នាក់និងមានកងវរសេនាកាំជ្រួចមីស៊ីលប៉ាទ្រីយ៉ូត ដើម្បីការពារប្រឆាំងនឹងការគំរាមកំហែងដោយមីស៊ីល ក៏ដូចជាក្រុមអ្នកស៊ើបការណ៍ ក្រុមអ្នកតាមដាន យន្តហោះឈ្លបយកការណ៍សម្ងាត់ និងក្រុមយន្តហោះចម្បាំងមួយក្រុមធំ។
ទង្វើនេះបានលេចឡើង ចំពេលដែលរដ្ឋបាលលោកត្រាំបានស្វែងរកការដាក់សម្ពាធទៅលើរបបអ៊ីរ៉ង់កាន់តែខ្លាំង។
មន្ទីរប៉ង់តាហ្គោនបានពិចារណ៍បន្ថែមកម្លាំងប្រមាណ ៥ ពាន់នាក់បន្ថែមទៀតទៅកាន់តំបន់មជ្ឈឹមបូព៌ា។ នេះបើតាមមន្ត្រីសហរដ្ឋអាមេរិក។ នៅថ្ងៃព្រហស្បតិ៍ ចំនួនទ័ពដែលគ្រោងនឹងបញ្ជូនធ្លាក់មកនៅត្រឹម ៣ពាន់នាក់ ហើយការសម្រេចចិត្តចុងក្រោយធ្លាក់មកនៅត្រឹម ១ ៥០០នាក់ដែលបានសម្រេចធ្វើឡើងនៅថ្ងៃសុក្រ។ កងទ័ព ១ ៥០០នាក់ទាំងនេះមានឯកទេសខាងការការពារខ្លួនខ្លាំងណាស់ រួមមានទាំងប្រព័ន្ធការពារមីស៊ីល និងប្រព័ន្ធប្រឆាំងយន្តហោះចម្បាំងផងដែរ។
មកទល់ពេលបច្ចុប្បន្ននេះ កងទ័ពសហរដ្ឋអាមេរិកជាច្រើនពាន់នាក់ត្រូវបានដាក់បញ្ឈរជើងរួចជាស្រេចនៅត្រង់ឈូងសមុទ្រពែក្ស ដោយមានក្រុមអ្នកប្រយុទ្ធនាវាផ្ទុកយន្តហោះ USS Abraham Lincoln ដោយមានការហែរហមអមដំណើរពីក្រុមយន្តហោះចម្បាំង និងយន្តហោះទម្លាក់គ្រាប់បែក B-52 ប្រព័ន្ធមីស៊ីលប៉ាទ្រីយ៉ូត និងនាវាចម្បាំងខ្នាតយក្ស USS Arlington ដែលផ្ទុករថក្រោះបើកលើទឹក និងក្រុមឧសទ្ធម្ភាគចក្រឆ្មាពិឃាតជាច្រើនគ្រឿង។
វត្តមាននេះ គឺដើម្បីត្រៀមវាយប្រហារទៅលើអ៊ីរ៉ង់ ខណៈដែលមានការព្រមានថា អ៊ីរ៉ង់កំពុងត្រៀមបើកការវាយប្រហារមកលើសហរដ្ឋអាមេរិក និងកំពុងត្រៀមបង្កហេតុយ៉ាងធ្ងន់ធ្ងរនៅក្នុងតំបន់៕
