នៅទីបំផុត យិន ម៉ាណា ត្រូវបានដោះលែងឲ្យមានសេរីភាពវិញហើយ នៅថ្ងៃទី២៨ ខែឧសភា ឆ្នាំ២០១៩នេះ ក្រោយជាប់ពន្ធនាគារត្រឹមតែ២ខែ ពីបទ «បើកបរដោយធ្វេសប្រហែសបណ្តាលឲ្យអ្នកដៃទស្លាប់»។
បើយោងតាមមន្ត្រីជាន់ខ្ពស់ នៃសាលាដំបូងរាជធានីភ្នំពេញកញ្ញា យិន ម៉ាណា ត្រូវបានដោះលែងនៅរសៀល ម៉ោង៥៖០០នាទី ថ្ងៃទី២៧ ខែឧសភា ឆ្នាំ២០១៩ម្សិលមិញ។
សូមបញ្ជាក់ថាជនរងគ្រោះឈ្មោះ ឌុំ រីដា ភេទស្រី វ័យ២២ឆ្នាំ គឺជានិស្សិតអាហារូបករណ៍ឆ្នាំទី៤ ជំនាញវិទ្យាសាស្ត្រនយោបាយ និងទំនាក់ទំនងអន្តរជាតិនៃសាកលវិទ្យាល័យផារ៉ាហ្គន និងធ្លាប់ជាសិស្សពូកែអក្សរសាស្ត្រខ្មែរទូទាំងប្រទេស។ ជនរងគ្រោះមានទីលំនៅស្រុកខ្សាច់កណ្ដាលខេត្តកណ្ដាល។
បើតាមម្ដាយជនរងគ្រោះរៀបរាប់ថា កាលពីថ្ងៃទី២៦ ខែមីនា ជនបង្កឈ្មោះ យិន ម៉ាណា បានបើករថយន្ត ម៉ាក Rang Rover ផ្លាកលេខភ្នំពេញ 2AF-7777 យ៉ាងលឿន ទៅបុកម៉ូតូកូនស្រីរបស់ខ្លួនទាំងកម្រោលបណ្ដាលឱ្យប៉ើងផ្ទប់នឹងរបងផ្ទះនៅក្បែរនោះ ស្លាប់ភ្លាមៗនៅនឹងកន្លែងកើតហេតុ ស្ថិតនៅសង្កាត់បឹងកក់១ ខណ្ឌទួលគោក។ បន្ទាប់ពីកើតហេតុជនបង្កមិនបានចុះមើល ឬជួយសង្គ្រោះជនរងគ្រោះទេ ប៉ុន្តែបានបន្ថែមល្បឿនរត់គេចបាត់ស្រមោលតែម្ដង។
គួររម្លឹកដែរថា សាលាដំបូងរាជធានីភ្នំពេញចោទប្រកាន់អ្នកបើករថយន្តទៅបុកនិស្សិតស្រីម្នាក់បណ្ដាលឱ្យស្លាប់កាលពីថ្ងៃទី២៦ ខែមីនា ពីបទបើកបរដោយធ្វេសប្រហែលបណ្ដាលឱ្យអ្នកដទៃស្លាប់ ត្រូវបានតុលាការ សម្រេចផ្តន្ទាទោសដាក់ពន្ធនាគារចំនួន ១ឆ្នាំ ប៉ុន្តែទោសនេះ ត្រូវបានអនុវត្តន៍ត្រឹមតែ ២ខែប៉ុណ្ណោះ។ សាលក្រមនោះ ត្រូវបានប្រកាសដោយលោក អ៊ុក សុវណ្ណារិទ្ធ ប្រធានក្រុមប្រឹក្សារជំនុំជម្រះ និងមានអ្នកស្រី ស៊ឺ វណ្ណនី ជាតំណាងអយ្យការ។
Home ព្រឹត្តិការណ៍ថ្មីៗ យិន ម៉ាណា ក្រោយជាប់ពន្ធនាគារត្រឹមតែ២ខែរួចមក ត្រូវបានដោះលែងឲ្យមានសេរីភាពវិញហើយ!