ស្ត្រីជាម្តាយវ័យ៣៤ឆ្នាំម្នាក់ឈ្មោះ Sarah Barrass បានឡើងតុលាការរដ្ឋអាជ្ញារស្រុក Sheffieldដោយរងការចោទប្រកាន់ថាបានធ្វើឃាតកូនប្រុសបង្កើតរបស់នាង២នាក់ គឺក្មេងប្រុស Blake Barrass អាយុ១៤ឆ្នាំ និងក្មេងប្រុស Tristan Barrass អាយុ១៣ឆ្នាំ។
ដោយឡែក បុរសវ័យ៣៧ឆ្នាំម្នាក់ទៀតឈ្មោះ Brandon Machin បានឡើងតុលាការផងដែរ ដោយរងការចោទប្រកាន់ពីបទឃាតកម្មដូចគ្នា។
លោកស្រី Barrass ដែលរងការចោទប្រកាន់៣ករណីនៃឃាតកម្មគ្រោងទុកជាមុននោះ បានយំ ពេលរូបគាត់ដើរចូលតុលាការនៅព្រឹកនេះ រយៈពេល៣ថ្ងៃប៉ុណ្ណោះ ក្រោយឧប្បត្តិហេតុបានកើតឡើងនៅក្នុងផ្ទះរបស់គាត់កាលពីថ្ងៃសុក្រ។
ពួកគេបានប្រកាសឈ្មោះរបស់ពួកគេ ថ្ងៃខែឆ្នាំកំណើត អាស័យដ្ឋាន និងសញ្ជាតិរបស់ពួកគេអំឡុងសវនាការរយៈពេល១០នាទី។
អ្នកស្រី និងបុរសម្នាកដែលស្លៀកពាក់ឯកសណ្ឋានអ្នកទោស និងអមដំណើរដោយមន្ត្រីសន្តិសុខ៣នាក់ ត្រូវបានគេបញ្ជូនឲ្យត្រឡប់ចូលគុកវិញ រង់ចាំឡើងតុលាការម្តងទៀតនៅថ្ងៃស្អែក។ អ្នកស្រី Barrass បានស្អែកខ្លាំងៗពេលដែលគាត់ដើរចេញពីបន្ទប់សវនាការ។
ក្រុមនគរបាល ត្រូវបានគេទូរស័ព្ទហៅទៅកាន់គេហដ្ឋានមួយកន្លែងស្ថិតនៅក្នុងសង្កាត់ Shiregreen កាលពីវេលាម៉ោង៧ និង៣០នាទី ថ្ងៃសុក្រ ក្រោយគេរកឃើញក្មេងប្រុស២នាក់ ត្រូវបានគេសម្លាប់យ៉ាងព្រៃផ្សៃរួចមកនោះ។
ទោះបីជាយ៉ាងណាក៏ដោយ រឿងរ៉ាវលំអិតនៅពីក្រោយឃាតកម្មកូនខ្លួនឯងនេះ មិនត្រូវបានគេទម្លាយឲ្យដឹងនោះទេ ប៉ុន្តែក្រុមនគរបាល បានអះអាងថា វាមិនមែនជាករណីបាញ់ប្រហារ ដោយក្មេងប្រុសទាំង២នាក់នេះ ត្រូវបានគេបង្ខាំងទុកចោលនៅក្នុងផ្ទះមួយខ្នង។
អ្នកនាំពាក្យម្នាក់ បាននិយាយថា ក្រុមស៊ើបអង្កេតមិនយល់ឃើញថា មានអ្នកផ្សេងជាប់ពាក់ព័ន្ធនឹងករណីឃាតកម្មនេះឡើយ។
អ្នកដែលរស់នៅក្បែរនោះ បានឃើញរថយន្តនគរបាលរាប់សិបគ្រឿង និងឡានពេទ្យ៤គ្រឿង បានធ្វើដំណើរមកដល់កន្លែងកើតហេតុ ៕
