កាលពីពេលថ្មីៗនេះ ប្រធានការិយាល័យគយនៅច្រកព្រែកចាក ខេត្តកំពតម្នាក់បានដាក់ពាក្យបណ្តឹងប្តឹងអ្នកកាសែតជិត ១០ នាក់ ទៅតុលាការពីបទជេរប្រមាថ និងជ្រៀតជ្រែកដោយខុសច្បាប់ ទៅក្នុងការបំពេញមុខងាររបស់ខ្លួន បន្ទាប់ពីវីដេអូមួយដែលបង្ហាញពីសកម្មភាពទំនាស់ពាក្យសម្តីរវាងមន្ត្រីគយរូបនេះ និងក្រុមអ្នកកាសែតបង្កឲ្យមានការរិះគន់យ៉ាងខ្លាំង។
បើតាមពាក្យបណ្តឹងនេះ បានចោទប្រកាន់ទៅលើអ្នកយកព័ត៌មានទាំងនោះ ពីបទជេរប្រមាថចំពោះអ្នករាជការសាធារណៈ, បទប៉ះពាល់ដល់ សិទ្ធិខាងរូបភាព នៃបុគ្គល និងបទជ្រៀតជ្រែកដោយខុសច្បាប់ ទៅក្នុងការបំពេញមុខងារសាធារណៈ។ មន្ត្រីគយរូបនេះ បានទាមទារសំណងពីក្រុមអ្នកយកព័ត៌មានទាំងនោះចំនួន ១០ម៉ឺនដុល្លារ។ ក្នុងពាក្យបណ្តឹងបានបញ្ជាក់ថា ក្រុមអ្នកសារព័ត៌មានខាងលើ បានចូលមកលួចថតជាវីដេអូ ពាសពេញបរិវេណទីតាំងត្រួតពិនិត្យទំនិញ ដែនសមត្ថកិច្ចគយនិងរដ្ឋាករព្រែកចាក ដោយបានថត និងចូលឆែកឆេរទំនិញ ដែលស្តុកទុកនៅក្នុងទីលានត្រួតពិនិត្យទំនិញ ដែនសមត្ថកិច្ចគយ ។
គួរបញ្ជាក់ដែរថា ករណីប្តឹងផ្តល់នេះ បានធ្វើឡើងបន្ទាប់ពីមានហេតុការណ៍កើតឡើងនាថ្ងៃទី២៨ ខែឧសភា ឆ្នាំ២០១៩ នៅបរិវេណប៉ុស្ដិ៍គយព្រែកចាក ព្រំប្រទល់កម្ពុជា-វៀតណាម ស្ថិតក្នុងខេត្តកំពត រវាងមន្ដ្រីគយ និងអ្នកសារព័ត៌មាន Online មួយក្រុម ដែលបានចុះយកព័ត៌មានពាក់ព័ន្ធការដឹកទំនិញឆ្លងកាត់ប៉ុស្ដិ៍គយព្រែកចាក ខេត្តកំពត។