លោកប្រធានាធិបតីសហរដ្ឋអាមេរិក ដូ ណលត្រាំបាននិយាយនៅថ្ងៃពុធនេះមុនជំនួបកំពូលជាមួយប្រមុខដឹកនាំកូរ៉េខាងជើង លោក គីម ជុងអុននៅក្នុងទីក្រុងហាណូយថា ទីក្រុងព្យុងយ៉ាងមានឱកាសល្អជាងគេបំផុតមិនធ្លាប់មានក្នុងប្រវត្តិសាស្ត្រ។ លោកបាននិយាយថា ប្រសិនបើប្រទេសនេះរក្សាបាននូវការសន្យារំសាយអាវុធនុយក្លេអ៊ែរកាលពីឆ្នាំមុននៅក្នុងប្រទេសសិង្ហបុរី ប្រទេសនេះអាចមានសេដ្ឋកិច្ចប្រៀបជាមួយវៀតណាមបាន។
លោកបាននិយាយថា «ប្រទេសវៀតណាមកំពុងរីកចម្រើនដូចកន្លែងមួយចំនួននៅលើភពផែនដីនេះ។ កូរ៉េខាងជើងនឹងដូចគ្នាទៅនឹងប្រទេសនេះ ប្រសិនបើប្រទេសនេះរំសាយអាវុធនុយក្លេអ៊ែរឲ្យបានកាន់តែឆាប់។ សក្កដានុពលគឺល្អមែនទែន ល្អជាងប្រទេសដទៃក្នុងប្រវត្តិសាស្ត្រ»។
មេដឹកនាំកូរ៉េខាងជើងបានទៅដល់ប្រទេសវៀតណាមកាលពីថ្ងៃអង្គារ ដោយការជិះរថភ្លើង ដែលបានទៅដល់ស្ថានីយ៍នៅជាប់ព្រំដែនចិន។ លោកគីមបានបន្តដំណើរឆ្ពោះទៅកាន់ទីក្រុងហាណូយ ក្រោយពេលទៅដល់ស្ថានីយ៍។ បើតាមផែនការ លោកត្រាំនិងលោកជុងអ៊ុននឹងជួបប្រជុំគ្នានៅល្ងាចថ្ងៃពុធ ក្រោយការទទួលទានអាហារពេលល្ងាច។
បន្ទាប់ពីការចរចាលក្ខណៈឯកជនហើយ មេដឹកនាំទាំងពីរនឹងចូលរួមនៅក្នុងការទទួលទានអាហារពេលល្ងាច ដែលប្រើពេលអស់មួយម៉ោងកន្លះ។ យោងតាមប្រព័ន្ធផ្សព្វផ្សាយ មេដឹកនាំទាំងពីត្រូវបានគេរំពឹងថា នឹងពិភាក្សាគ្នាអំពីជំហានជាក់លាក់ស្តីពីការរំសាយអាវុធនុយក្លេអ៊ែរនៅឧបទ្វីបកូរ៉េ។
ស្ថានភាពនៅឧបទ្វីបកូរ៉េត្រូវបានគេមើលឃើញថា កំពុងបោះជំហានទៅរកភាពល្អប្រសើរចាប់តាំងពីជំនួបកំពូលរវាងមេដឹកនាំទាំងពី ប៉ុន្តែយ៉ាងណាក៏ដោយ ក៏ក្រុមតំណាងរាស្ត្រសហរដ្ឋអាមេរិកមួយចំនួនបាននិយាយថា កូរ៉េខាងជើងល្អបានតែនៅមុខលោកត្រាំ ដោយសារតែប្រទេសនេះកំពុងតែបន្តផលិតនុយក្លេអ៊ែរ និងកំពុងលាក់មូលដ្ឋានគ្រាប់មីស៊ីលរបស់ខ្លួនចំនួន ១៦កន្លែងឯណោះ៕
