យោងតាមសារព័ត៌មាន CNN នៅថ្ងៃទី៤ មិថុនានេះបានឲ្យដឹងថា មន្ត្រីការទូតកូរ៉េខាងជើងដែលត្រូវបានគេរាយការណ៍ថា ត្រូវគេបាញ់ចោល គឺនៅរស់ទេ ប៉ុន្តែកំពុងស្ថិតក្រោមការឃុំឃាំងរបស់រដ្ឋ។ នេះបើតាមប្រភពជាច្រើន ដែលបានដឹងពីស្ថានការណ៍នេះ។
ប្រភពព័ត៌មានបាននិយាយថា បេសកជនពិសេសរបស់កូរ៉េខាងជើងប្រចាំសហរដ្ឋអាមេរិក គឺលោក Kim Hyok Chol កំពុងត្រូវបានគេស៊ើបអង្កេតចំពោះតួនាទីរបស់លោក នៅក្នុងជំនួបកំពូលហាណូយ ដែលបានទទួលបរាជ័យ រវាងលោកប្រធានាធិបតីអាមេរិកដូ ណលត្រាំ និងមេដឹកនាំកូរ៉េខាងជើងលោក គីម ជុងអ៊ុន កាលពីខែកុម្ភៈ។
តាមពិត កិច្ចចរចាដែលទទួលបរាជ័យនោះ គឺមកពីជុងអ៊ុនទាំងស្រុង។ ជុងអ៊ុនចេញក្រឡាមក ចង់ឲ្យលោកត្រាំដកទណ្ឌកម្មទាំងអស់ជាមុនសិន ទើបខ្លួនយល់ព្រមរំសាយអាវុធនុយក្លេអ៊ែរទាំងស្រុង។ ធ្វើបែបនេះលោកត្រាំម្តេចនឹងព្រម។ គ្រាន់តែឮបែបនេះ លោកត្រាំបានដើរចេញពីកិច្ចប្រជុំនោះដោយឥតស្រណោះ ដែលធ្វើឲ្យកិច្ចចរចារំសាយអាវុធនុយក្លេអ៊ែរនោះនៅជាប់គាំងរហូតដល់សព្វថ្ងៃនេះ។
ប្រភពព័ត៌មានបាននិយាយថា សូម្បីតែអ្នកបកប្រែរបស់លោកជុងអ៊ុននៅទីក្រុងហាណូយ គឺលោកSin Hye Yong ក៏ត្រូវបានគេឃុំឃាំង និងស្ថិតក្រោមការស៊ើបអង្កេតផងដែរ។
កាសែតកូរ៉េខាងត្បូង Chosun Ilbo បានរាយការណ៍កាលពីថ្ងៃសុក្រថា លោក Kim Yong Chol មន្ត្រីជាន់ខ្ពស់បំផុតម្នាក់របស់កូរ៉េខាងជើង ដែលបានអង្គុយចរចាជាមួយលោកត្រាំកាលពីជាងមួយឆ្នាំមុន ត្រូវបានសម្លេះចោលដោយការបាញ់ចោល ដើម្បីជាការដាក់ទណ្ឌកម្មសម្រាប់ការបរាជ័យនៃកិច្ចចរចា។
ប្រភពមួយបាននិយាយថា ជោគវាសនារបស់លោក Kim Hyok Chol ដែលជាបេសកជនពិសេសមិនត្រូវបានកំណត់ទេ ប៉ុន្តែគាត់នៅតែអាចប្រឈមនឹងការដាក់ទណ្ឌកម្មយ៉ាងធ្ងន់ធ្ងរ។
ប្រភពព័ត៌មានបាននិយាយថា មន្ត្រីកូរ៉េខាងជើង លោក Kim Song Hye ដែលជាមន្ត្រីកូរ៉េខាងជើងក្នុងការចរចាជាមួយសហរដ្ឋអាមេរិកត្រូវបានឃុំឃាំង និងស្ថិតក្រោមការស៊ើបអង្កេតផងដែរ។
គីម ជុងអ៊ុនត្រូវបានគេចាត់ទុកថា ជាកំពូលមេដឹកនាំផ្តាក់ការម្នាក់ ដែលចូលចិត្តប្រើអំពើព្រៃផ្សៃអាក្រក់ជួរជាតិ។
កាលពីប៉ុន្មានឆ្នាំមុន លោក ចាង សុងថេក ដែលត្រូវជាប្តីរបស់ម្តាយមីងបង្កើត ត្រូវលោកគីម ជុងអ៊ុនបញ្ជាឲ្យតុលាការយោធាកាត់ទោសបាញ់ចោល ដោយសារតែហ៊ានរិះគន់ពីប្រព័ន្ធគ្រប់គ្រងផ្នែកសេដ្ឋកិច្ចមកលើលោកគីម ជុងអ៊ុន។ ក្រោយមក នាយអគ្គសេនាធិការកងទ័ពម្នាក់ក៏ត្រូវបានគីម ជុងអ៊ុនបាញ់ចោលផងដែរ ដោយសារតែរូបគេបានដេកលក់ក្នុងអង្គប្រជុំ។ រឿងដ៏សាហាវនេះ នៅមានទៀត គឺមេបញ្ជាការកងពលមួយរូប ដែលបានផឹកស្រានៅក្នុងបម្រាម ដែលបានដាក់ចេញនៅទូទាំងប្រទេស ដែលហាមមិនឲ្យកម្មវិធីផឹកស៊ីក្នុងពិធីរំលឹកខួបមរណភាពរបស់លោកគីម ជុងអ៊ីល ដែលត្រូវជាឱពុករបស់លោកគីម ជុងអ៊ុន ក៏ត្រូវលោកគីម ជុងអ៊ុនបញ្ជាយកទៅបាញ់ចោលផងដែរ។ ចំពោះការសម្លាប់មេបញ្ជាការកងពលរូបនោះ គឺព្រៃផ្សៃអស្ចារ្យ គឺពិជឃាតយកមេបញ្ជាការរូបនោះទៅចងផ្អោបនឹងបង្គោលដែលបោះនៅលើកណ្តាលវាលស្រែ រួចហើយឲ្យពិជឃាតប្រើកាំភ្លើងត្បាល់ ដើម្បីសម្លាប់មេបញ្ជាការរូបនោះ។ មានគេនិយាយថា ក្រុមអ្នកបាញ់កាំភ្លើងត្បាល់ម្នាក់ៗបែកញើសប៉ុនៗគ្រាប់ពោតព្រោះខ្លាចគ្រាប់កាំភ្លើងត្បាល់ហោះមិនចំគោលដៅអាចត្រូវគេចោទថា មានបំណងបាញ់មិនឲ្យចំគោលដៅដែលត្រូវកម្ទេច៕