ក្រុមរដ្ឋអាជ្ញាកូរ៉េខាងត្បូង ចង់កាត់ទោសឲ្យជាប់ពន្ធនាគាររយៈពេល២ឆ្នាំសម្រាប់បុរសម្នាក់ ដែលបានលួចបំពាក់កាមេរ៉ាចារកម្មនៅក្នុងបន្ទប់ដែលតារាសម្តែងស្រីកូរ៉េ Shin Sae-kyeong និងតារាចម្រៀងស្រី Yoon Bo-mi របស់ផលិតកម្ម K-pop ស្នាក់នៅរួមគ្នា កាលពីខែកញ្ញា ឆ្នាំកន្លងទៅ ក្នុងប្រទេសបារាំង។
អំឡុងសវនាការកាលពីថ្ងៃចន្ទមុននេះ នៅឯតុលាការស្រុកក្រុងសេអ៊ូល ក្រុមរដ្ឋអាជ្ញា បានស្នើសុំឲ្យកាត់ទោសបុរសម្នាក់ ដែលបានបំពានលើច្បាប់ពិសេស ពាក់ព័ន្ធនឹងឧក្រិដ្ឋកម្មផ្លូវភេទ។ ពួកគេបានទាមទារឲ្យតុលាការបញ្ចេញព័ត៌មានផ្ទាល់ខ្លួនរបស់គាត់ នឹងដាក់កំហិតការងាររបស់គាត់ផងដែរ។
ក្រុមរដ្ឋអាជ្ញា បាននិយាយថា ការធ្វើចារកម្ម បានក្លាយជាបញ្ហាសង្គមដ៏ធ្ងន់ធ្ងរមួយ ហើយជនរងគ្រោះ ត្រូវតែមានអារម្មណ៍ភ័យខ្លាច ពិសេសពេលដែលពួកគេគឺជាតារាល្បីនោះ។
បុរសវ័យ៣០ឆ្នាំម្នាក់ ដែលមាននាមត្រកូល Kim គឺជាកម្មករមកពីក្រុមហ៊ុនខាងក្រៅ ដែលបានចូលរួមកម្មវិធីទូរទស្សន៍ "Pocha Beyond Borders" ក្នុងនាមជាបុគ្គលិក។ កម្មវិធីនេះ មានការសម្តែងដោយនាង Shin និងនាង Yoon ជាជនល្បីកូរ៉េខាងត្បូង ធ្វើដំណើរទៅកាន់ប្រទេសបារាំង ដើម្បីបង្ហាញមុខម្ហូបតាមចិញ្ចើមផ្លូវរបស់កូរ៉េខាងត្បូង។
លោក Kim ត្រូវបានគេចោទប្រកាន់ថា បានបន្លំកាមេរ៉ាជាឆ្នាំងសាកទូរស័ព្ទ ហើយលួចដាក់វានៅក្នុងបន្ទប់ដេករបស់អ្នកទាំង២ ប៉ុន្តែត្រូវបាននាង Shinប្រទះឃើញនៅរយៈពេល១ម៉ោងក្រោយមក។
លោក Kimស្ម័គ្រចិត្តសារភាពទោសប្រាប់ដល់ក្រុមនគរបាល ក្រោយវិលត្រឡប់មកកាន់កូរ៉េខាងត្បូងវិញ។ លោកបានអះអាងថា លោកបានធ្វើខុស ព្រោះតែចង់ដឹងចង់ឮពីរឿងរបស់គេ។ ចំណែកឯសវនាការចុងក្រោយ នឹងធ្វើឡើងនៅថ្ងៃទី១០ ខែកក្កដា ខាងមុខនេះ៕
Home សិល្បៈកម្សាន្ត បុរសសង្ស័យលួចបង្កប់កាមេរ៉ាក្នុងបន្ទប់ដេករបស់តារសម្តែងស្រីកូរ៉េ Shin Sae-kyeong និង Yoon Bo-miប្រឈមនឹងការជាប់ទោស២ឆ្នាំ