លោក Jean-Jacques Savin គឺជាបុរសជនជាតិបារាំងម្នាក់ ដែលបានសម្រេចមហិច្ឆិតាឆ្លងកាត់មហាសមុទ្រអាត្លង់ទិករបស់លោកតាមធុងបារ៉ែល។
អតីតយុទ្ធជនវ័យ៧១ឆ្នាំរូបនេះ បានចេញដំណើរពីកោះកាណារី (Canary Islands) នៅឆ្នេរអាហ្វ្រិកភាគខាងលិច កាលពីថ្ងៃទី២៦ ខែធ្នូ ឆ្នាំ២០១៨ តាមធុងបារ៉ែលពណ៌ទឹកក្រូចកែច្នៃដែលមានទទឹង ២,១៤ ម៉ែត្រ និងបណ្ដោយ ៣,០៥ ម៉ែត្រ ហើយនៅទីបញ្ចប់ លោកបានធ្វើដំណើរមកដល់កោះ St. Eustatius របស់ហូឡង់ ស្ថិតក្នុងតំបន់ការ៉ាអ៊ីប អាមេរិកកណ្តាល ក្រោយពេលធ្វើដំណើរត្រាច់ចរគ្មានទិសដៅក្នុងសមុទ្រអស់រយៈពេលជាង៤ខែ។
ដោយធុងបារ៉ែលមួយនេះ បំពាក់ដោយកូនគ្រែ ចង្ក្រានបាយ ចន្លោះស្តុកឥវ៉ាន់ និងចន្លោះមើលទេសភាពនៅខាងបាតសម្រាប់ការមើលមច្ឆា ធុងបារ៉ែលរបស់លោក គ្មានម៉ាស៊ីន គ្មានច្រវាអុំនោះទេ ពោលគឺពឹងផ្អែកលើខ្យល់ជំនោររុញច្រានវាទាំងស្រុង។
លោក Savin បានសង្ឃឹមថា នឹងអាចមកដល់គោលដៅរបស់លោកនៅខែមីនា ប៉ុន្តែចុងក្រោយលោកត្រូវការចំណាយពេលយូរជាងនេះជា១ខែទៀត ទើបអាចទៅដល់គោលដៅ ដោយឆ្លងកាត់ផ្ទៃសមុទ្រចម្ងាយ២.៩៣០ម៉ៃល៍ ដែលស្មើនឹងជាង៤៧០០គ.ម។
នៅពេលគាត់មកដល់គោលដៅ គាត់បានសរសេរបង្ហោះតាមបណ្តាញទំនាក់ទំនងសង្គមហ្វេសប៊ុកថា “អ្វីៗបានដល់ទីបញ្ចប់ហើយ… ទីបំផុតខ្ញុំបានបញ្ចប់ដំណើរផ្សងព្រេងដ៏គ្រោះថ្នាក់មួយនេះ”៕
