មេដឹកនាំកូរ៉េខាងជើង លោកគីម ជុងអ៊ុន ទទួលបានសារលិខិតផ្ទាល់ខ្លួនមួយច្បាប់ ពីប្រធានាធិបតីសហរដ្ឋអាមេរិកលោកដូណាល់ ត្រាំ ជាហេតុធ្វើឲ្យមេដឹកនាំទាំង២ ចាប់ផ្តើមល្អូកល្អឺនត្រូវរ៉ូវគ្នាវិញ ក្រោយជាប់គាំងទៅក្នុងកិច្ចព្រមព្រៀងរំសាយអាវុធនុយក្លេអ៊ែរនៅក្នុងតំបន់ឧបទ្វីបកូរ៉េ។
ទីភ្នាក់ងារដ្ឋកូរ៉េខាងជើង KCNA បានរាយការណ៍ថា លោកគីម បានចាត់ទុកសារលិខិតមួយច្បាប់នោះថាល្អប្រសើរខ្លាំងណាស់ ហើយលោកបាននិយាយថា លោកនឹងពិចារណាលើខ្លឹមសារដ៏គួរឲ្យចាប់អារម្មណ៍មួយនេះ។
លោកគីម បានស្ងើចសរសើរផងដែរពីទឹកចិត្តដ៏វិសេសវិសាលរបស់លោកត្រាំ ។ ទោះបីជាយ៉ាងណាក៏ដោយ រឿងរ៉ាវលំអិតនៃខ្លឹមសារក្នុងសារលិខិតមួយច្បាប់នេះ មិនត្រូវបានបង្ហាញនោះទេ។
សេតវិមានបានអះអាងពីអត្តិភាពនៃសារលិខិតមួយច្បាប់នេះ តាមអ៊ីម៉ែលផ្ញើទៅកាន់ទីភ្នាក់ងារព័ត៌មានរ៉យទ័រ។
អ្នកនាំពាក្យសេតវិមាន លោកស្រី សារ៉ា ស៊ែនដឺ បាននិយាយថា សារលិខិតមួយច្បាប់ ត្រូវបានផ្ញើជូនដោយលោកត្រាំ ហើយការឆ្លើយឆ្លងគ្នារវាងមេដឹកនាំទាំង២ នៅតែបន្តកើតឡើង។
កាលពីដើមខែនេះ លោកត្រាំ បាននិយាយថា សារលិខិតដ៏មានអត្ថន័យមួយច្បាប់ ត្រូវបានផ្ញើមកកាន់លោក ដោយមេដឹកនាំកូរ៉េខាងជើង។
ប៉ុន្តែ គេក៏មិនបានបញ្ចេញនោះទេពីពេលវេលា ឬវិធីណាដែលសារលិខិតរបស់លោកត្រាំ ត្រូវបានផ្ញើជូនលោកគីម។
សូមបញ្ជាក់ថា កិច្ចប្រជុំរវាងសហរដ្ឋអាមេរិក និងកូរ៉េខាងជើង បានជាប់គាំងនៅកិច្ចប្រជុំកំពូលនៅក្នុងទីក្រុងហាណូយ ប្រទេសវៀតណាម រវាងលោកគីម និងលោកត្រាំ កាលពីខែកុម្ភះ៕
Home ព្រឹត្តិការណ៍ថ្មីៗ លោកត្រាំ និងលោកគីម ចាប់ផ្តើមល្អូកល្អឺននឹងគ្នាវិញក្រោយឆ្លើយឆ្លងពាក្យសម្តីតាមសារលិខិត