ក្រុមបាតុកររាប់ម៉ឺននាក់ ដែលភាគច្រើនគឺជានិស្សិត និងក្រុមនគរបាល នៅក្នុងទីក្រុងហុងកុង បានជាប់ផុងទៅក្នុងភាពទាល់ច្រក ពេលដែលកំហឹងបានកើនឡើងចំពោះសេចក្តីព្រាងច្បាប់ដែលនឹងអនុញ្ញាតឲ្យមានការធ្វើបត្យាប័នដល់ចិនដីគោក។
នៅព្រឹកថ្ងៃពុធនេះ ក្រុមបាតុករដោយពួកគេនាំគ្នាពាក់ម៉ាស់ ទទួលឆ័ត្រ និងពាក់មួកសុវត្ថិភាពនោះ បានបិទផ្លូវសំខាន់ៗជុំវញអគាររដ្ឋាភិបាល។
ក្រុមនគរបាលបង្ក្រាបកុប្បកម្ម បានឆ្លើយតបវិញជាមួយនឹងការបាញ់ទឹកម្រេចមកលើក្រុមបាតុករ ដើម្បីបំបែកហ្វូងមនុស្ស ហើយពួកគេបាននិយាយថា ពួកគេបានត្រៀមខ្លួនរួចរាល់ក្នុងការប្រើប្រាស់កម្លាំង។
ក្រុមប្រឹក្សានីតិបញ្ញត្តិបច្ចុប្បន្ន បានពន្យាពេលការអានលើកទី២លើសេចក្តីព្រាងច្បាប់នេះ។
ក្រុមប្រឹក្សានីតិបញ្ញត្តិដែលគាំទ្រទីក្រុងប៉េកាំង បានចេញនូវសេចក្តីថ្លែងការណ៍មួយនាថ្ងៃពុធនេះ ដោយអះអាងថា ជំនួបដែលនឹងគ្រោងធ្វើឡើងនៅវេលាម៉ោង១១ព្រឹកនេះ នឹងត្រូវលើកពេល ហើយពួកគេនឹងជូនដំណឹងនៅពេលក្រោយ។
ទោះបីជាមានការជំទាស់ជាសកលយ៉ាងណាក្តី រដ្ឋបាលទីក្រុងហុងកុង នៅតែនិយាយយ៉ាងទទួចថា ពួកគេនឹងបន្តជំរុញការធ្វើបត្យាប័នមួយនេះ។
សារព័ត៌មានហុងកុង បានរាយការណ៍ថា ការបោះឆ្នោតផ្តាច់ព្រ័ត្រ គ្រោងនឹងធ្វើឡើងនៅថ្ងៃទី២០ ខែមិថុនា ខាងមុខនេះ ក្នុងនោះគេរំពឹងថា ក្រុមប្រឹក្សានីតិបញ្ញត្តិនឹងអនុម័តលើពង្រាងច្បាប់មួយនេះ។នៅក្នុងស្ថានភាពស្រដៀងគ្នានឹងចលនាឆ័ត្រគាំទ្រលទ្ធិប្រជាធិបតេយ្យកាលពីឆ្នាំ២០១៤នោះ ក្រុមបាតុកររាប់ម៉ឺននាក់ដែលសុទ្ធិតែក្មេងៗនោះ បានដើរដង្ហែរតាមផ្លូវ និងព្យាយាមបិទផ្លូវចូលទៅកាន់អគាររដ្ឋាភិបាល មុនពេលកិច្ចពិភាក្សាតាមការកំណត់ពីសេចក្តីព្រាងច្បាប់នេះ។
ក្រុមអ្នករិះគន់ លើការធ្វើវិសោធនកម្មលើសេចក្តីព្រាងច្បាប់ចំពោះច្បាប់ធ្វើបត្យាប័ននេះ បានលើកឡើងពីការធ្វើទារុណកម្ម ការឃុំខ្លួនដោយបំពាន និងបង្ខំឲ្យសារភាពនៅក្នុងប្រព័ន្ធយុត្តិធម៌ចិន។
រដ្ឋបាលហុងកុង បានសន្យាថានឹងការពារស្របច្បាប់សិទ្ធិមនុស្ស និងវិធានការផ្សេងទៀត ដើម្បីបន្ធូបន្ថយក្តីកង្វល់ទាំងអស់នេះ។
ទោះបីជាយ៉ាងណាក៏ដោយ វារឹតតែនាំឲ្យមានការតវ៉ាទ្រង់ទ្រាយធំជាងមុនមិនធ្លាប់ដែលមាននៅក្នុងដែនដីមួយនេះ ចាប់តាំងពីវាត្រូវបានប្រគល់ជូនប្រទេសចិនវិញ ដោយអាណានិគមន៍អង់គ្លេស កាលពីឆ្នាំ១៩៩៧។
ក្រុមនគរបាល បាននិយាយថា ពួកគេកំពុងតែស៊ើបអង្កេតផងដែរលើការគំរាមកំហែងដល់អាយុជីវិត ប្រឆាំងនឹងប្រធានប្រតិបត្តិទីក្រុងហុងកុង គឺលោក ការី ឡាម និងសមាជិកផ្សេងទៀតនៃក្រសួងយុត្តិធម៌ ពាក់ព័ន្ធនឹងសេចក្តីព្រាងច្បាប់នេះ៕
