កូរ៉េខាងត្បូង គ្រោងបញ្ជូនស្រូវអង្ក៥ម៉ឺនតោនទៅកាន់កូរ៉េខាងជើង ដែលកំពុងញាំញីដោយគ្រោះរាំងស្ងួត និងក្រោយពេលទទួលដំណឹងថា ពលរដ្ឋជិត១០លាននាក់នៅក្នុងរដ្ឋឯកកោមួយនេះ កំពុងជួបគ្រោះទុរ្ភិក្ស ដែលនេះគឺជាការបរិច្ចាកស្បៀងអាហារលើកដំបូងរបស់ពួកគេទៅកាន់កូរ៉េខាងជើង ក្នុងរយៈពេលជិត១ទសវត្សរ៍។
គួរឲ្យដឹងថា គ្រោះរាំងស្ងួតដ៏ធ្ងន់ធ្ងរ គួបផ្សំនឹងទណ្ឌកម្មសេដ្ឋកិច្ច បានធ្វើឲ្យមានកង្វះខាតស្បៀងអាហារដ៏រ៉ាំរ៉ៃនៅកូរ៉េខាងជើង។
ក្រសួងបង្រួបបង្រួមកូរ៉េខាងត្បូង បាននិយាយថា ស្រូវអង្កទាំងនេះ នឹងត្រូវចែកចាយក្នុងពេលដ៏ខ្លីខាងមុខ តាមដែលអាចធ្វើទៅបាន។
កម្មវិធីស្បៀងអាហារពិភពលោករបស់អង្គការសហប្រជាជាតិ នឹងទទួលខុសត្រូវរាល់ការត្រួតពិនិត្យការបរិច្ចាកស្បៀងអាហារទាំងនេះ។
លោកគីម យ៉ុនឆុល គឺជារដ្ឋមន្ត្រីក្រសួងបង្រួបបង្រួមកូរ៉េខាងត្បូង បាននិយាយថា រដ្ឋាភិបាលរបស់លោកមិនអាចថាមិនអើពើចំពោះស្ថានភាពដ៏លំបាកនៅក្នុងចំណោមប្រជាជនកូរ៉េខាងជើងបាននោះទេ។
ការបរិច្ចាកស្បៀងអាហារចុងក្រោយគេរបស់កូរ៉េខាងត្បូងទៅកាន់កូរ៉េខាងជើង ត្រូវបានធ្វើឡើងកាលពីឆ្នាំ២០១០ ពេលដែលពួកគេបញ្ជូនស្រូវអង្ក៥ពាន់តោនឆ្លងកាត់ព្រំដែន ពោលគឺស្មើនឹង១ភាគ១០ប៉ុណ្ណោះ នៃការបរិច្ចាកតាមការគ្រោងទុកនាពេលបច្ចុប្បន្ន។
ស្របពេលមានទំនាក់ទំនងកាន់តែល្អប្រសើររវាងប្រទេសបងប្អូនទាំង២ ទីក្រុងសេអ៊ូលកាលពីពេលថ្មីៗនេះ បានបរិច្ចាកថវិកា៨លានដុល្លារដល់កម្មវិធីស្បៀងអាហារពិភពលោកអង្គការសហប្រជាជាតិ ដើម្បីផ្តល់ការគាំទ្រផ្នែកថ្នាំពេទ្យ និងអាហារូបត្ថម្ភ ទៅកាន់ស្ត្រី និងកុមារ នៅក្នុងប្រទេសកូរ៉េខាងជើង។
កាលពីខែមុន របាយការណ៍មួយដោយអង្គការសហប្រជាជាតិ បានឲ្យដឹងថា ពលរដ្ឋកូរ៉េខាងជើងជិត១០លាននាក់ កំពុងត្រូវការជំនួយស្បៀងអាហារបន្ទាន់ ដោយសារតែពួកគេជួបគ្រោះទុរ្ភិក្សធ្ងន់ធ្ងរ។
របាយការណ៍អង្គការសហប្រជាជាតិ បានរកឃើញផងដែរថា ពលរដ្ឋកូរ៉េខាងជើងរស់រានទៅបានដោយសារការទទួលទានអាហារ៣០០ក្រាមប៉ុណ្ណោះ ក្នុង១ថ្ងៃ គិតមកទល់នឹងពេលនេះ ក្នុងឆ្នាំនេះ។
ភាពក្រក្សត់នៃស្បៀងអាហារទាំងនេះ គឺបង្កឡើងដោយសារតែគ្រោះរាំងស្ងួតដ៏អាក្រក់បំផុតកើតមាននៅក្នុងប្រទេសកូរ៉េខាងជើង នារយៈពេល៣៧ឆ្នាំកន្លងមកនេះ ដែលធ្វើឲ្យការប្រមូលផលធ្លាក់ចុះ និងការខូចខាតផលដំណាំនៅទូទាំងប្រទេស។
របាយការណ៍របស់អង្គការសហប្រជាជាតិ បានបង្ហាញទៀតថា កាលពីឆ្នាំ២០១៨កន្លងទៅ ទិន្នផលដំណាំកូរ៉េខាងជើង បានធ្លាក់ចុះដល់កម្រិតទាបបំផុត ចាប់តាំងពីឆ្នាំ២០០៨មក៕
Home ព្រឹត្តិការណ៍ថ្មីៗ កូរ៉េខាងត្បូងគ្រោងបញ្ជូនស្រូវអង្ក៥ម៉ឺនតោនទៅជួយសង្គ្រោះពលរដ្ឋ១០លាននាក់ដែលកំពុងជួបគ្រោះទុរ្ភិក្សធ្ងន់ធ្ងរនៅកូរ៉េខាងជើង