ប្រធានាធិបតីម៉ិកស៊ិក លោក Andres Manuel Lopez Obradorបានសន្យាថា នឹងប្រើប្រាស់ប្រាក់ចំណេញទាំងអស់ពីការលក់យន្តហោះប្រធានាធិបតី ដើម្បីផ្តល់មូលនិធិដល់សហគមន៍ក្រីក្រ និងកិច្ចខិតខំ ក្នុងការទប់ស្កាត់ការធ្វើអន្តោប្រវេសន៍ខុសច្បាប់។
ដំណើរវិវត្តន៍ចុងក្រោយនេះ បានកើតមានឡើង ក្រោយម៉ិកស៊ិក និងសហរដ្ឋអាមេរិក បានឈានដល់កិច្ចព្រមព្រៀងមួយ ដើម្បីបញ្ចៀសផុតពីការដំឡើងពន្ធសហរដ្ឋអាមេរិក ជាការដោះដូរឲ្យម៉ិកស៊ិក ធ្វើអ្វីបន្ថែមទៀត ក្នុងការបញ្ឈប់ការធ្វើអន្តោប្រវេសន៍មកពីអាមេរិកកណ្តាល ចូលទៅកាន់ទឹកដីសហរដ្ឋអាមេរិក។
អំឡុងយុទ្ធនាការរបស់លោក មេដឹកនាំឆ្វេងនិយមរូបនេះ បានសន្យាលក់យន្តហោះមួយគ្រឿងនេះ ហើយនិងប្រើប្រាស់លុយទាំងអស់ ដើម្បីជួយដល់សហគមន៍ក្រីក្រ។
លោកបាននិយាយថា យន្តហោះ Boeing 787 Dreamliner នេះ មានតម្លៃប្រហែលជា១៥០លានដុល្លារដែរ។
គួររំឭកថា អំឡុងយុទ្ធនាការនៃការស្វែងរកសំឡេងឆ្នោតរបស់លោកកាលពីឆ្នាំ២០១៨ លោក Lopez Obrador បានសន្យាថា នឹងលក់យន្តហោះប្រធានាធិបតី ដែលកាលពីដំបូងឡើយ គេទិញវាក្នុងតម្លៃ២១៨លានដុល្លារ។
លោកបាននិយាយប្រាប់ក្រុមអ្នកគាំទ្រថា លោកនឹងជិះយន្តហោះឯកជនជំនួសវិញ ហើយលោកធ្វើតាមពាក្យសន្យាមួយនេះ រយៈពេលប៉ុន្មានថ្ងៃប៉ុណ្ណោះ ក្រោយលោកឡើងកាន់តំណែង។
យន្តហោះមួយគ្រឿងនេះ បានដាក់លក់អស់រយៈពេលជាច្រើនខែមកហើយ ហើយវាកំពុងតែចតចោលនៅក្នុងឃ្លាំងយន្តហោះ ស្ថិតនៅក្នុងរដ្ឋកាលីហ្វ័រញ៉ា សហរដ្ឋអាមេរិក។
បច្ចុប្បន្ន ប្រទេសម៉ិកស៊ិក កំពុងស្វះស្វែងលក់យន្តហោះ៦០គ្រឿង និងឧទ្ធម្ភាគចក្រ៧០គ្រឿងបន្ថែមទៀតផងដែរ ដែលគ្រប់គ្រងដោយរដ្ឋាភិបាល។
អំឡុងសន្និសីទកាសែតកាលពីថ្ងៃពុធ លោក Lopez Obrador ត្រូវបានអ្នកសារព័ត៌មានចោទសួរដល់កិច្ចព្រមព្រៀងរបស់លោកជាមួយសហរដ្ឋអាមេរិក ដែលរួមទាំងការដាក់ពង្រាយកងកម្លាំងការពារជាតិម៉ិកស៊ិក ទៅកាន់តំបន់ព្រំដែនភាគខាងត្បូងជាប់នឹងប្រទេសក្វាតេម៉ាឡា។
លោក Lopez Obrador បាននិយាយប្រាប់សន្និសីទកាសែទថា បើនិយាយពីការចំណាយលើគម្រោងការមួយនេះ ចាំលោកប្រាប់ថា ចាំយើងមានលុយសិន។
លោកបន្តថា វានឹងលេចចេញជារូបរាងឡើង ពេលដែលយើងបានលុយពីការលក់យន្តហោះដ៏ប្រណីតរបស់ប្រធានាធិបតី។
សូមបញ្ជាក់ថា យន្តហោះប្រធានាធិបតីម៉ិកស៊ិក ត្រូវបានគេទិញកាលពីឆ្នាំ២០១៦ ហើយត្រូវបានគេដាក់ឈ្មោះ "José María Morelos y Pavón" ៕
