ប្រធានអង្គការសប្បុរសធម៌ស្រាវជ្រាវសុខាភិបាល បានចាត់ទុកការរីករាលចុងក្រោយនៃជំងឺអេបូឡា នៅភាគកណ្តាលអាហ្វ្រិកថា “ពិតជាគួរឲ្យខ្លាចបំផុត”។
គួរឲ្យដឹងថា មនុស្សជិត១.៤០០នាក់បានស្លាប់នៅក្នុងសាធារណរដ្ឋប្រជាធិបតេយ្យកុងហ្គោ។
លោកវេជ្ជបណ្ឌិត Jeremy Farrar គឺជាប្រធានអង្គការ Wellcome Trust បាននិយាយថា នេះគឺជាការរីករាលដ៏អាក្រក់បំផុត ចាប់តាំងពីការរីករាលដាលឆ្នាំ២០១៣-១៦ ហើយវាមិនបានបង្ហាញសញ្ញាណាមួយនៃការបញ្ឈប់នោះទេ។
ក្មេងប្រុសអាយុ៥ឆ្នាំម្នាក់ បានស្លាប់ផងដែរនៅក្នុងប្រទេសជិតខាងអ៊ុយហ្គង់ដា គឺជាករណីជំងឺអេបូឡាលើកដំបូងគេមាននៅក្នុងប្រទេសមួយនេះ។
បច្ចុប្បន្នរដ្ឋាភិបាលអ៊ុយហ្គង់ដា កំពុងរាយការណ៍ពីករណីសង្ស័យ៧ផ្សេងទៀតនៃវីរុសមួយនេះ។
នៅក្នុងសេចក្តីថ្លែងការណ៍មួយ លោកវេជ្ជបណ្ឌិត Farrar បាននិយាយថា ការរីករាលដាលនេះ គឺជាសោកនាដកម្ម ថ្វីត្បិតតែវាមិនជាការភ្ញាក់ផ្អើលខ្លាំងក៏ដោយ។ លោកបានប្រកាសអាសន្នថា ករណីឆ្លងវីរុសច្រើនទៀត នឹងរំពឹងកើតមានឡើង ហើយការឆ្លើយតបថ្នាក់ជាតិ និងអន្តរជាតិ ត្រូវការជាចាំបាច់ក្នុងការពារអាយុជីវិតមនុស្ស។
លោក Jeremy Farrar បន្តថា កុងហ្គោ មិនមែនជាប្រទេសតែមួយគត់ ដែលប្រឈមនឹងការរីករាលដាលខ្លាំងនៃជំងឺអេបូឡានោះទេ។
ការរីករាលដាលនេះដែរ គឺជាការរីករាលដាល់ទ្រង់ទ្រាយធំបំផុតនៅក្នុងប្រវត្តិសាស្ត្រនៃជំងឺអេបូឡា ក្នុងនោះករណីថ្មីនៃការឆ្លងវីរុស បានកើតមានឡើងកាលពីរយៈពេលប៉ុន្មានសប្តាហ៍ចុងក្រោយនេះ។
កាលពីលើកមុន ការរីករាលដាលបានបន្តអូសបន្លាយពេលជាង៨ខែ ក្រោយផ្ទុះជំងឺមួយនេះ ដែលវាបានរីករាលដាលខ្លាំងនៅអាហ្វ្រិកខាងលិច ចន្លោះឆ្នាំ២០១៣ និងឆ្នាំ២០១៦ ដោយបានសម្លាប់មនុស្ស១១.៣១០នាក់។
ដោយឡែក កិច្ចខិតខំប្រឹងប្រែងទប់ស្កាត់ការរីករាលនៃជំងឺនេះ ត្រូវបានរាំងស្ទះដោយសារតែអំពើហិង្សារបស់ក្រុមជីវពល និងការពន្យាពេលផ្តល់ជំនួយសុខាភិបាលបរទេស។
មន្ទីរពេទ្យជិត២០០កន្លែង រងការវាយប្រហារក្នុងឆ្នាំនេះ នៅក្នុងប្រទេសកុងហ្គោ ជាហេតុបង្ខំឲ្យក្រុមមន្ត្រីសុខាភិបាល ពន្យាពេលការព្យាបាល និងការចាក់វ៉ាក់សាំងការពារ។
នៅក្នុងខែកុម្ភះ ក្រុមគ្រូពេទ្យគ្មានព្រំដែន បានផ្អាកសកម្មភាពព្យាបាលរបស់ពួកគេ នៅក្នុងទីក្រុង Butembo និងទីក្រុង Katwa ស្ថិតនៅភាគខាងកើតប្រទេសកុងហ្គោ ជាកន្លែងដែលមានការរីករាលខ្លាំងតែម្តងនៃវីរុសអេបូឡា។
តើអ្វីទៅជាគឺជំងឺអេបូឡា?
-អេបូឡា គឺជាវីរុសមួយប្រភេទដែលបណ្តាលឲ្យមានជំងឺគ្រុនក្តៅភ្លាមៗ ចុះខ្សោយកម្លាំង ឈឺចាប់ពេញសាច់ដុំ និងឈឺបំពង់ក
-ពេលកើតជំងឺនេះ នឹងនាំឲ្យក្អួតចង្អោរ រាគរួស និងចេញឈាមតាមស្បែក និងក្នុងខ្លួន
-មនុស្សនឹងឆ្លងជំងឺមួយនេះ ពេលដែលពួកគេប៉ះដោយផ្ទាល់ជាមួយអ្នកជំងឺ តាមរយៈស្បែក មាត់ ច្រមុះ ហើយអ្នកជំងឺនឹងត្រូវស្លាប់ ដោយសារការខះជាតិទឹកនិងការបាត់បង់សរីរាង្គជាច្រើនទៀត៕
Home ព្រឹត្តិការណ៍ថ្មីៗ ការរីករាលដ៏អាក្រក់បំផុតនៃជំងឺអេបូឡាបានសម្លាប់មនុស្ស១.៤០០នាក់នៅសាធារណរដ្ឋប្រជាធិបតេយ្យកុងហ្គោ