កាលពីពេលកន្លងទៅនេះ មនុស្សរាប់ពាន់នាក់បាននាំគ្នាធ្វើបាតុកម្មនៅតាមដងផ្លូវក្នុងទីក្រុងហុងកុង នៅថ្ងៃអាទិត្យនេះ ដោយស្លៀកសម្លៀកបំពាក់ពណ៌ខ្មៅ ដើម្បីទាមទារឲ្យមេដឹកនាំទីក្រុងនេះចុះចេញពីតំណែង។ ហេតុការណ៍នេះបានកើតឡើងមួយថ្ងៃបន្ទាប់ពីអ្នកស្រី Carrie Lam មេដឹកនាំទីក្រុងហុងកុង បានព្យួរច្បាប់ធ្វើបត្យាប័ន ក្រោយពីមានការតវ៉ាយ៉ាងហិង្សាបំផុតក្នុងរយៈពេលប៉ុន្មានទសវត្សរ៍ចុងក្រោយនេះ។
អ្នករៀបចំ បាតុកម្ម អះអាងថា នឹងមានមនុស្សច្រើនជាង១លាននាក់ ចូលរួមធ្វើបាតុកម្ម ហើយចូលរួមក្នុងការតវ៉ា ដែលនេះជាការប្រមូលផ្ដុំដ៏ធំមួយក្នុងប្រវត្តិសាស្ត្រហុងកុង ជាទីតែមួយគត់ក្នុងទឹកដីចិនដែលការធ្វើបាតុម្មបញ្ចេញមតិអាចធ្វើបានដោយសេរី។ ប៉ុន្តែបាតុកម្មអហិង្សាប្រែទៅជាហិង្សាវិញនៅពេលយប់ ដោយបាតុករបានប៉ះទង្គិចជាមួយក្រុមប៉ូលិសយ៉ាងខ្លាំងក្លាបំផុត។
ជាមួយគ្នានោះក្រុមថ្នាក់ដឹកនាំបានសម្រេចចិត្តផ្អាក មិនធ្វើកំណែទម្រង់ ច្បាប់បត្យាប័ន ទៅប្រទេសចិន ប្រមុខដឹកនាំហុងកុង មានបំណង ចង់បន្ថយកំហឹងតវ៉ារបស់ប្រជាជនហុងកុង ដើម្បីស្តារភាពស្ងប់ស្ងាត់ឡើងវិញ ឲ្យហុងកុង។ ប៉ុន្តែ លោកស្រី ការី ឡាំគិតខុសទាំងស្រុង។ ការសម្រេចចិត្តផ្អាក ដោយគ្មានកាលកំណត់ ប៉ុន្តែ មិនលុបចោលទាំងស្រុង សេចក្តីព្រាងច្បាប់ ធ្វើបត្យាប័ន មានតែទៅដុតកំហឹងបន្ថែម ផ្តល់ថាមពលថ្មី ជំរុញ ឲ្យប្រជាជនហុងកុងកាន់តែច្រើន រឹតតែមានចិត្ត ចុះថ្នល់ ធ្វើបាតុកម្មប្រឆាំង នៅថ្ងៃអាទិត្យ។
គួរបញ្ជាក់ដែរថា ជុំវិញគម្រោងច្បាប់ថ្មីនេះ មេដឹកនាំហុងកុងធ្លាប់បកស្រាយថា ជាការបំពេញចន្លោះបន្ថែមលើច្បាប់ដែលមានស្រាប់ ហើយមានគោលដៅបញ្ចប់ការយកហុងកុងជាឋានសួគ៌ដោយឧក្រិដ្ឋជនដីគោក ព្រោះចិន និងហុងកុងមិនមែនកិច្ចព្រមព្រៀងធ្វើបត្យាប័នពីមុនមកឡើយ។ លើសពីនោះ រដ្ឋាភិបាលហុងកុង ក៏ធ្លាប់អះអាងថា អ្នករិះគន់ដីគោក ឬក្រុមប្រឆាំងនៅហុងកុង នឹងមិនត្រូវបានធ្វើបត្យាប័នឡើយ។ គម្រោងធ្វើបត្យាប័ននេះ ក៏មិនមែនអនុវត្តតែជាមួយចិននោះដែរ។
