នៅពេលនេះ ក្រុមអ្នកវិទ្យាសាស្ត្រ មានជំនឿថា ព្រះអាទិត្យ នឹងអាចបង្កើតពន្លឺរំខានដ៏មហាអស្ចារ្យមួយប្រភេទនាពេលអនាគត។
ការស្រាវជ្រាវកាលពីមុន បានលើកឡើងថា ការផ្ទុះចេញនូវថាមពលពន្លឺដ៏គ្រោះថ្នាក់ទាំងនេះ ត្រូវបានកំណត់ត្រឹមតារាសកម្មជាងគេ និងតារាអាយុកាលតិចជាងគេ ប៉ុន្តែបច្ចុប្បន្ន យោងតាមការសិក្សាថ្មី បានឲ្យដឹងថា ថ្វីត្បិតតែព្រះអាទិត្យ កាន់តែមានវ័យចំណាស់ ហើយនិងមានស្ថិរភាពជាងមុនយ៉ាងណាក្តី ក៏វាអាចនឹងបង្កើតពន្លឺដ៏មហាគ្រោះថ្នាក់មួយដល់ផែនដី ដែរ។
បើសិនជាពន្លឺស្ថិតនៅក្នុងចំណោមពន្លឺមហាអស្ចារ្យទាំងនេះ ត្រូវចំផែនដី នោះវានឹងធ្វើឲ្យមានវិនាសកម្មសកលមួយ ដោយវានឹងបំផ្លិចបំផ្លាញផ្កាយរណប ក៏ដូចជាឧបករណ៍អេឡិចត្រូនិក ប្រព័ន្ធខ្សែកាប និងប្រព័ន្ធទូរគមនាគមន៍ជាដើម។
ទោះបីជាយ៉ាងណាក៏ដោយ ការព្យាករណ៍ពីពេលវេលាពិតប្រាកដនៃការកើតឡើងរបស់ពន្លឺមហាអស្ចារ្យរបស់ព្រះអាទិត្យ មិនទាន់ដឹងច្បាស់នោះទេ។ វាអាចនឹងកើតមានឡើងនៅក្នុងរយៈពេលរាប់ពាន់ឆ្នាំទៀត ឬវាអាចនឹងកើតឡើងនៅសប្តាហ៍ក្រោយក៏ថាបាន ដោយសារភាពមិនប្រាកដប្រជារបស់វា។
លោក Yuta Notsu គឺជាអ្នកវិទ្យាសាស្ត្រដឹកនាំការស្រាវជ្រាវនេះ បាននិយាយថា ការសិក្សារបស់ពួកយើង បានបង្ហាញថា ពន្លឺដ៏មហាអស្ចារ្យរបស់ព្រះអាទិត្យ គឺជាព្រឹត្តការណ៍ដ៏កម្រមួយ ប៉ុន្តែមាននូវលទ្ធភាពមួយចំនួនដែលយើងអាចនឹងជួបព្រឹត្តការណ៍បែបនេះ នៅក្នុងរយៈពេល១០០ឆ្នាំទៀត ឬក៏យូរជាងនេះ។
លោកបន្តថា បើសិនជាពន្លឺដ៏មហាអស្ចារ្យបានកើតឡើងកាលពីរយៈពេល១ពាន់ឆ្នាំមុន នោះក៏ប្រហែលជាមិនមែនជាបញ្ហាធំនោះដែរ ពីព្រោះថា អ្នករាល់គ្នា អាចត្រឹមមើលឃើញនូវពន្លឺដ៏ធំមួយប៉ុណ្ណោះ ប៉ុន្តែបច្ចុប្បន្ន វានឹងក្លាយជាបញ្ហាធំ ដោយសារតែប្រព័ន្ធអេឡិចត្រូនិករបស់ពួកយើង៕
Home ព្រឹត្តិការណ៍ថ្មីៗ ការស្រាវជ្រាវថ្មី៖ ផែនដីអាចនឹងងាយរងគ្រោះថ្នាក់ខ្លាំងដោយសារពន្លឺមហាអស្ចារ្យរបស់ព្រះអាទិត្យ