ជប៉ុន៖ ទីភ្នាក់ងារឧតុនិយមជប៉ុន បានចេញនូវការប្រកាសអាសន្នពីរលកយក្សស៊ូណាមិ ក្រោយការរញ្ជួយដីកម្រិត៦.៨រ៉ិចទ័រ បានអង្រួនប្រទេសមួយនេះ នៅវេលាម៉ោង១០ និង២២នាទីយប់ថ្ងៃអង្គារ នៅជិតតំបន់ឆ្នេរខេត្តយ៉ាម៉ាហ្គាតា ស្ថិតនៅភាគខាងជើងប្រទេស។
ទីភ្នាក់ងារនេះ បាននិយាយថា រលកយក្សស៊ូណាមិ ត្រូវបានគេរំពឹងថា នឹងជិតកើតមាននៅតាមតំបន់ឆ្នេរនៃខេត្តយ៉ាម៉ាហ្គាតា ទីក្រុងនីហ្គាតា និងទីក្រុងអ៊ីស៊ីកាវ៉ា ហើយការប្រកាសអាសន្ន ត្រូវបានធ្វើឡើងនៅតាមតំបន់ឆ្នេរចំនួន៤។
ទីភ្នាក់ងារឧតុនិយមជប៉ុន បានណែនាំឲ្យក្រុមអ្នកស្រុក ជម្លៀសចេញពីតំបន់ឆ្នេរទាំងអស់នោះជាបន្ទាន់ ហើយមិនត្រូវចូលលេងសមុទ្រ ឬនៅជិតតំបន់ឆ្នេរជាដាច់ខាត រហូតដល់ការណែនាំត្រូវបានដកចេញវិញ។
ពួកគេបានបន្តថា ការផ្លាស់ប្តូរកម្រិតទឹកសមុទ្រ អាចនឹងកើតមាននៅតាមតំបន់ឆ្នេរ ប៉ុន្តែគេមិនរំពឹងថា នឹងកើតមានផលខូចខាតបង្កឡើងដោយរលកយក្សស៊ូណាមិនោះទេ។
ជាមួយគ្នានោះដែរ ស្ថានទូតខ្មែរ បានអំពាវនាវដល់ប្រជាពលរដ្ឋខ្មែររស់នៅក្នុងខេត្តយ៉ាម៉ាហ្គាតា ដែលជាខេត្តជួបគ្រោះរញ្ជួយដីក្នុងកម្រិតខ្ពស់រហូតដល់ ៦.៨រិកទ័រ ប្រញាប់ទាក់ទងទៅកាន់ស្ថានក្នុងករណីពួកគេរងនូវផលប៉ះពាល់ផ្សេងៗនោះ។
ប្រជាពលរដ្ឋខ្មែររស់នៅក្នុងខេត្តជួបគ្រោះរញ្ជួយដីនេះ អាចទាក់ទងស្ថានទូតតាមរយៈទំព័រ Facebook របស់ស្ថានទូត (Royal Embassy of Cambodia in Japan 在日本国カンボジア王国大使館) ឬតាមទូរសព្ទលេខ៖ 090 4689 9374 ឬ 08034597889។
ក្នុងសេចក្តីជូនដំណឹងរបស់ស្ថានទូតខ្មែរនៅជប៉ុនធ្វើឡើងនៅយប់ថ្ងៃទី១៨ ខែមិថុនា ឆ្នាំ២០១៩ ស្ថានទូតខ្មែរ ក៏បានអំពាវនាវដល់ប្រជាពលរដ្ឋខ្មែរនៅជប៉ុន កុំធ្វើដំណើរទៅលេងកម្សាន្តនៅតាមតំបន់ឆ្នេរនៃខេត្ត Yamagata, Niigata និង Ishikawa ព្រោះថាតំបន់ឆ្នេរទាំង៣នេះ ប្រឈមនឹងការកើតមានរលកយក្សស៊ូណាមិ។
