ក្រុមមន្ត្រីសហរដ្ឋអាមេរិកបាននិយាយកាលពីថ្ងៃអាទិត្យថា ភ្លើងឆេះព្រៃដ៏ខ្លាំងក្លា ដែលមិនអាចគ្រប់គ្រងបាននភក្នុងរដ្ឋកាលីហ្វញ៉ា ដែលបានបំផ្លាញផ្ទះសម្បែងជាង ៧០ខ្នងបានក្លាយជាភ្លើងឆេះព្រៃដ៏ធំទី ៥នៅក្នុងប្រវត្តិសាស្ត្រប្រចាំនៅរដ្ឋនេះ។
កាលពីសប្ដាហ៍មុន អភិបាលរដ្ឋកាលីហ្វ័រនីញ៉ាលោក Jerry Brown បានប្រកាសដាក់រដ្ឋនេះឲ្យស្ថិតនៅក្នុងការប្រកាសអាសន្ន ដើម្បីឲ្យមានការចូលជួយជ្រុំជ្រែង នៅក្នុងការប្រយុទ្ធប្រឆាំងទៅនឹងភ្លើងឆេះព្រៃនេះ។
នាយកដ្ឋានព្រៃឈើ និងអគ្គីភ័យនៅរដ្ឋកាលីហ្វ័រនីញ៉ា បាននិយាយថា ភ្លើងឆេះនៅភាគខាងជើងនៃទីប្រជុំជន Sacramento គឺជាភ្លើងឆេះព្រៃដ៏ខ្លាំងក្លាមួយក្នុងចំណោមភ្លើងឆេះព្រៃធំៗ ១៧ផ្សេងទៀត នៅទូទាំងរដ្ឋនេះ ហើយវាបានពង្រីកទំហំឆេះដល់ទៅ ២៥ភាគរយបន្ថែមទៀតកាលពីយប់មិញ និងបានដុតកម្លោចតំបន់នេះ ក្នុងទំហំ ១ពាន់គីឡូម៉ែត្រការ៉េ នៅព្រឹកថ្ងៃអាទិត្យ។
អាជ្ញាធរកាលីហ្វ័រនីញ៉ាបាននិយាយថា បុរសម្នាក់អាយុ ២១ឆ្នាំម្នាក់ឈ្មោះ Jay Ayeta បានស្លាប់ នៅពេលដែលរថយន្តរបស់គាត់បានប៉ះទង្គិច នៅភាគខាងលិចនៃតំបន់ Shasta ខណៈដែលរូបលោកបានធ្វើការជាមួយមិត្តរួមការងាររបស់លោក នៅក្នុងការប្រយុទ្ធទប់ទល់ទៅនឹងភ្លើងឆេះព្រៃ។
Ayeta គឺជាមនុស្សទី ៧ហើយ ដែលស្លាប់នៅក្នុងភ្លើងដែលបានឆាបឆេះជាង ១៥៤.០០០ ហិចតា នៅក្នុងតំបន់ Shasta-Trinity ដែលរួមមានកូនក្មេង ២នាក់ និងជីដូនជីតារបស់ពួកគេ ដែលផ្ទះរបស់ពួកគេត្រូវបានឆាបឆេះដោយអណ្តាតភ្លើង ហើយមានអ្នកស្រុកម្នាក់ទៀតក៏បានស្លាប់នៅក្នុងហេតុការណ៍ភ្លើងឆេះព្រៃនេះដែរ ដោយអ្នកស្រុកម្នាក់នោះមិនព្រមចាកចេញពីផ្ទះរបស់ខ្លួន ទៅបីមានបទបញ្ជាជម្លៀសក៏ដោយ។ អ្នកពន្លត់អគ្គិភ័យពីរនាក់ក៏បានស្លាប់ផងដែរ។
ប្រធានាធិបតីអាមេរិក លោក ត្រាំ បានធ្វើការស្តីបន្ទោសភ្លើងឆេះព្រៃនេះ ថាមកពីច្បាប់បរិស្ថានសម័យលោកអូនបាម៉ា ហើយលោកត្រាំជម្រុញឲ្យមានការកាប់ដើមឈើចេញខ្លះ ដើម្បីទប់ស្កាត់គ្រោះមហាន្តរាយធម្មជាតិនេះ។ យោងតាមនាយកដ្ឋានព្រៃឈើ និងអគ្គីភ័យនៃរដ្ឋកាលីហ្វ័រញ៉ាកាលពីសប្តាហ៍មុន អគ្គីភ័យនៅរដ្ឋកាលីហ្វ័រនីញ៉ាបានឆេះព្រៃប្រហែល ២៩០.០០អា ច្រើនជាងទ្វេដងកាលពី ៥ឆ្នាំមុន៕
ដោយ៖ DNT-NEWS
