មូស្គូ៖ ក្រុមអន្តរជាតិមួយដែលដឹកនាំដោយប្រទេសហូឡង់ ដែលស៊ើបអង្កេតការបាញ់ទម្លាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ីនៅប្រទេសអ៊ុយក្រែននៅឆ្នាំ២០១៤ បានប្រាប់ឈ្មោះជនជាតិរុស្ស៊ី៣នាក់ និងជនជាតិអ៊ុយក្រែនម្នាក់ជាជនសង្ស័យជាឃាតករ។
ជុំវិញបញ្ហានេះ ក្រសួងបរទេសរុស្ស៊ី ក៏បានឱ្យដឹងក្នុងសេចក្តីថ្លែងការណ៍មួយថា ការចោទប្រកាន់ដោយគ្មានមូលដ្ឋានច្បាស់លាស់នេះ គ្រាន់តែចង់បង្ខូច កេរ្ត៍ឈ្មោះរុស្ស៊ីទៅកាន់សហគមន៍អន្តរជាតិតែប៉ុណ្ណោះ។
នៅព្រឹកថ្ងៃព្រហស្បតិ៍នេះ ក្រុមការងារស៊ើបអង្កេតរួមគ្នាអន្តរជាតិ (JIT) បានប្រកាសនៅក្នុងសន្និសីទសារព័ត៌មាន មួយនៅក្នុងប្រទេស ហូឡង់ថា ជនជាតិរុស្ស៊ីបីនាក់ និងអ៊ុយក្រែនម្នាក់នឹងត្រូវកាត់ទោសចំពោះការផ្តល់ប្រព័ន្ធមីស៊ីល Buk ទៅភាគខាងកើតប្រទេសអ៊ុយក្រែន ។
យន្តហោះ MH17 បានធ្លាក់នៅភាគខាងកើតអ៊ុយក្រែន តាមខ្សែបន្ទាត់ហោះហើរពីទីក្រុង Amsterdam ទៅកាន់ Kuala Lumpur កាលពីថ្ងៃទី ១៧ ខែកក្កដាឆ្នាំ ២០១៤ ។ JIT ជឿជាក់ថាមីស៊ីល Buk ដែលផលិតដោយរុស្ស៊ី បានបាញ់ទម្លាក់យន្តហោះនេះ បណ្តាលអោយមនុស្ស ២៩៨ នាក់នៅលើយន្តហោះស្លាប់ទាំងអស់។
ក្រសួងការបរទេសរុស្ស៊ីបាននិយាយថា គ្មានភ័ស្តុតាងច្បាស់លាស់ត្រូវបានបង្ហាញ ដើម្បីគាំទ្រសេចក្តីថ្លែងការណ៍ដែលចោទប្រកាន់យើង នោះទេ ខណៈដែលទិន្នន័យដែលផ្តល់ដោយរុស្ស៊ីទៅឱ្យ JIT ត្រូវបានគេមិនអើពើ។ យ៉ាងណាក៏ដោយ ប្រទេសរុស្ស៊ីនៅតែត្រៀមខ្លួន ដើម្បីជួយក្នុងការស៊ើបអង្កេត ដើម្បីការពិតអំពីសោកនាដកម្មធ្លាក់យន្តហោះ MH17 និងនាំអ្នកទោសពិតប្រាកដទៅកាត់ទោស៕
