នាពេលកន្លងទៅនេះ មជ្ឈមណ្ឌលជាតិប្រយុទ្ធជម្ងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ បានព្យាករណ៍ថា នៅក្នុងឆ្នាំ២០១៩នេះ ជម្ងឺគ្រុនឈាមនៅក្នុងប្រទេសកម្ពុជា នឹងកើតឡើងជាង៥ម៉ឺនករណី។ បើគិតត្រឹមខែមិថុនានេះ ករណីជម្ងឺគ្រុនឈាមនៅកម្ពុជា បានកើតឡើងប្រមាណជា១ម៉ឺនករណីហើយ ក្នុងនោះអ្នកជម្ងឺ២៤នាក់បានស្លាប់។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានចេញសេចក្ដីប្រកាសព័ត៌មានកាលពី ខែមីនា បានឲ្យដឹងថា ករណីជំងឺគ្រុនឈាមនៅទូទាំងប្រទេសក្នុងដើមឆ្នាំ ២០១៩ នេះ មានការកើនឡើងគួរឲ្យកត់សម្គាល់ច្រើនជាងឆ្នាំ ២០១៨ បើប្រៀបធៀបទៅនឹងពេលវេលាដូចគ្នា។
សេចក្ដីប្រកាសព័ត៌មាននេះបានឲ្យដឹងថា៖ «កត្តាមួយក្នុងចំណោមកត្តាជាច្រើនដែលបង្កឲ្យមានជំងឺគ្រុនឈាមនោះ គឺការប្រែប្រួលអាកាសធាតុ និងវត្ថុមានជម្រកមូសខ្លា នៅតាមផ្ទះសំបែង ឬទីធ្លាសាធារណៈ។ តាមការវិភាគអេពីដេមីសាស្ត្រ និងការប៉ាន់ប្រមើលលើស្ថានភាពជំងឺគ្រុនឈាមរបស់អង្គការសុខភាពពិភពលោក បានបង្ហាញថា ជំងឺគ្រុនឈាមប្រហែលជាអាចនឹងផ្ទុះឡើងវិញនៅក្នុងឆ្នាំ ២០១៩ នេះ ដែលតម្រូវឲ្យប្រជាពលរដ្ឋ និងអាជ្ញាធរមូលដ្ឋានគ្រប់លំដាប់ថ្នាក់ មានការប្រុងប្រយ័ត្នយកចិត្តទុកដាក់ចូលរួមយ៉ាងសកម្ម ក្នុងការអនុវត្តវិធានការមានដូចខាងក្រោម ដើម្បីចៀសផុតពីភាព អាចមានការផ្ទុះឡើងនូវជំងឺ គ្រុនឈាម នៅក្នុងឆ្នាំនេះ និងឆ្នាំបន្ទាប់ទៀត»។
សេចក្ដីប្រកាសនេះបានឲ្យដឹងថា ជំងឺគ្រុនឈាមជាជំងឺអាចកើតឡើងលើមនុស្សគ្រប់វ័យ ដែលបង្កឡើងដោយមូសខ្លាញីខាំបឺតឈាមអ្នកដែលមានវីរុសគ្រុនឈាមចម្លងពីមនុស្សម្នាក់ទៅម្នាក់ទៀត។ មូសខ្លា កកើតកូនចៅនៅក្នុងទឹកថ្លាស្អាត និងចូលចិត្តរស់នៅជិតមនុស្ស ហើយហើរក្នុងចម្ងាយមិនលើសពី ១៥០ ម៉ែត្រពីជម្រកកកើតមូសទេ។
ជំងឺគ្រុនឈាមមានរោគសញ្ញាដូចជា ២ ទៅ ៣ ថ្ងៃក្រោយពីមូសខ្លាញីខាំ អ្នកជំងឺមានក្ដៅខ្លួនពី ៣៩ ទៅ ៤០ អង្សាសេ អមដោយរោគសញ្ញាផ្សេងៗទៀតដូចជា មុខក្រហម ឈឺអុចៗក្រហម ឈឺប្រឡង់កែវភ្នែកចាក់ទៅក្រោយ ឈឺក្បាល ចង់ក្អួត ឬក្អួត ឈឺពោះ ឈឺសាច់ដុំ ឈឺសន្លាក់ដៃជើង ស្នាមអុចៗក្រហមលើស្បែក ឬមានហូរឈាមតាមអញ្ចាញធ្មេញជាដើម។ ដូច្នេះឪពុកម្តាយ ឫអាណាព្យាលទាំងឡាយប្រសិនសង្ស័យថាកូនមានអាការ:មិនស្រួលត្រូវនាំ កូនទៅមន្ទីរពេទ្យជាបន្ទាន់ សូមកុំបង្អង់យូរឲ្យសោះ ៕