ត្បូងឃ្មុំ៖ជំងឺប៉េស្ត្រជ្រូកអាហ្វ្រិកកំពុងតែផ្ទុះនៅតំបន់មួយចំនួនក្នុងខេត្តត្បូងឃ្មុំ ដែលពេលនេះមន្ត្រីជំនាញ និងបសុព្យាបាលខេត្ត កំពុងដុតដៃដុតជើងចាត់វិធានការដើម្បីការពារ។
យោងតាមសេចក្តីប្រកាសរបស់ ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី២ ខែកក្កដា ម្សិលមិញនេះ បានអោយដឹងថា ជំងឺប៉េស្ត្រជ្រូកអាហ្វ្រិកបានផ្ទុះចំនួន ២កន្លែង គឺស្ថិតនៅភូមិកំពង់សេរី និងភូមិសោយ ឃុំមាន ស្រុកអូររាំងឪ ក្នុងខេត្តត្បូងឃ្មុំ ។
ជាមួយគ្នានេះ ក្រសួងក៏បានស្នើរអោយមន្ត្រីពាក់ព័ន្ធចាត់វិធានការ ជាបន្ទាន់នៅក្នុងតំបន់ផ្ទុះជំងឺនេះ ដែលមានដូចខាងក្រោម ៖
បំផ្លាញចោលចំពោះសត្វជ្រូកគ្រប់ប្រភេទក្នុងតំបន់ផ្ទុះជំងឺ ទៅតាមវិធានការបសុព្យាបាល
ផ្អាកលើការទិញ ការលក់ និងការដឹកជញ្ជូនសត្វជ្រូក សាច់ជ្រូក និងផលិតផលមានដើមកំណើតពីសត្វជ្រូកគ្រប់ប្រភេទ ចូល និងចេញ ឬឆ្លងកាត់ក្នុងរង្វង់កាំប្រវែង ៣គីឡូម៉ែត្រ ពីចំណុចផ្ទិតនៃតំបន់ផ្ទុះជំងឺនិងដាក់តំបន់នេះជាតំបន់ត្រួតពិនិត្យនិងតាមដាន
សិក្សាស្រាវជ្រាវប្រភពជំងឺប៉េស្ត្រជ្រូកអាហ្វ្រិក និងត្រួតពិនិត្យឃ្លាំមើលចលនាសត្វជ្រូក សាច់ជ្រូក និងផលិតផលមានដើមកំណើតពីសត្វជ្រូកជាប្រចាំ ៕