កាលពីពេលថ្មីៗនេះ មានព័ត៌មានដ៏គួរឲ្យរំភើបមួយសម្រាប់ពលរដ្ឋខ្មែរ ដោយមានស្ត្រីជនជាតិជប៉ុនម្នាក់បានស្ម័គ្រចិត្តយល់ព្រមប្រគល់វត្ថុបុរាណខ្មែរចំនួន ៨៥មុខ/បំណែក ជូនរាជរដ្ឋាភិបាលកម្ពុជា និងប្រជាជនកម្ពុជាវិញ។
បើយោងតាម ក្រសួងវប្បធម៌ និងវិចិត្រសិល្បៈ បានជូនដំណឹងថា នៅថ្ងៃទី៥ ខែកក្កដា ឆ្នាំ២០១៩ ក្រសួងនឹងរៀបចំពិធីទទួលអំណោយវត្ថបុរាណខ្មែរចំនួន៨៥មុខ/បំណែក ពីលោកស្រីបណ្ឌិត ហ្វូមីកូ តាកាកុវ៉ា Fumiko Takakuwa ជនជាតិជប៉ុន ដែលបានស្ម័គ្រចិត្តប្រគល់ជូនមករាជរដ្ឋាភិបាល និងប្រជាជនកម្ពុជាវិញ ដើម្បីឧទ្ទិសដល់វិញ្ញាណខ័ន្ធស្វាមីរបស់លោកស្រី។
ក្នុងសេចក្តីជូនដំណឹងរបស់ក្រសួងបានឱ្យដឹងថា វត្ថុបុរាណទាំងនេះ ជាបដិមាព្រហ្មញ្ញសាសនា ព្រះពុទ្ធសាសនា គ្រឿងលំអ ត្រាមានលំអរូបសត្វធ្វើពីសំរិទ្ធ បំណែកតុបតែង ខ្សែកធ្វើពីមាស កុលាលភាជន៍ និងអកកំបោរធ្វើពីស្ពាន់ ដែលមានអាយុកាលក្នុងសម័យបុរេប្រវត្តិសាស្ត្រ សម័យមុនអង្គរ សម័យអង្គរ និងសម័យក្រោយអង្គរ។ អំណោយវត្ថុបុរាណទាំង៨៥មុខនេះ ត្រូវបាននាំ យកមកតាមរយៈលោក ម៉ាសាម៉ូតូ ហូស៊ីណូ និងភរិយា កាលពីថ្ងៃទី២៨ ខែឧសភា ឆ្នាំ២០១៩។
ជាមួយគ្នានោះដែរ ក្រសួងវប្បធម៌បានបញ្ជាក់ថា ក្នុងនាមរាជរដ្ឋាភិបាល និងប្រជាជនកម្ពុជា សូមសម្ដែងការកោតសសើរ និងថ្លែងអំណរគុណយ៉ាងជ្រាលជ្រៅ ចំពោះលោកស្រីបណ្ឌិត ហ្វូមីកូ តាកាកុវ៉ា មានចិត្តសប្បុរសប្រគល់វត្ថុបុរាណទាំងនេះ ជូនមករាជរដ្ឋាភិបាល និងប្រជាជនកម្ពុជា និងថ្លែងអំណរគុណចំពោះលោក ម៉ាសាម៉ូតូ ហ្វូស៊ីណូ និងភរិយា ដែលបាសម្របសម្រួល និងដឹកនាំវត្ថុបុរាណនេះមក៕
Home ព្រឹត្តិការណ៍ថ្មីៗ ស្ត្រីជនជាតិជប៉ុនម្នាក់បានស្ម័គ្រចិត្ត ប្រគល់វត្ថុមានតម្លៃមកឲ្យកម្ពុជា