រដ្ឋាភិបាលជប៉ុនបានអះអាងថា យ៉ាងហោចណាស់ មនុស្សជាង១លាននាក់បានទទួលរងការវាយ ប្រហារក្នុងគ្រោះមហន្តរាយទឹកជំនន់នៅភាគខាងត្បូងប្រទេសជប៉ុន។ តួលេខនេះនឹងអាចកើនឡើង ច្រើនជាងនេះ ព្រោះថា នៅមានមនុស្សច្រើនទៀត ដែលកំពុងនៅបាត់ខ្លួននៅឡើយ។ តាមអ្នកនាំពាក្យរបស់រដ្ឋាភិបាលជប៉ុន ក្រុមជួយសង្គ្រោះប្រមាណ ៧៣ ០០០នាក់ ដែលមានតាំងប៉ូលិស ក្រុមពន្លត់អគ្គិភ័យ ហើយនិងកងទ័ពជប៉ុន កំពុងស្វែង រុករក មនុស្សដែលបាត់ខ្លួន នៅតំបន់លិចទឹក ។
យោងតាមការចុះផ្សាយរបស់ទីភ្នាក់ងារព័ត៌មាន AFP បានឲ្យដឹងថាការធ្លាក់ភ្លៀងមិនដាច់ក្នុងរយៈពេលប៉ុន្មានថ្ងៃមក ធ្វើឲ្យតំបន់ភាគត្បូងជប៉ុនប្រឈមមុខកាន់តែខ្លាំងនឹងគ្រោះថ្នាក់បង្កដោយសារការបាក់ដី និងទឹកជំនន់។ អាជ្ញាធរខេត្ត Kagoshima នៃកោះ Kyushu បានចេញបញ្ជាឲ្យប្រជាជនច្រើនជាងមួយលាននាក់ ភៀសខ្លួនទៅកាន់ជម្រកសុវត្ថិភាព ខណៈលទ្ធភាពនៃគ្រោះថ្នាក់កើនឡើងកាន់តែខ្ពស់។ ប៉ុន្តែរបាយការណ៍អាជ្ញាធរបង្ហាញថា មនុស្សបីពាន់នាក់ប៉ុណ្ណោះដែលបានស្នាក់នៅទីសុវត្ថិភាព។
ជាមួយគ្នានោះដែរ អភិបាលខេត្ត Kagoshima លោក Satoshi Mitazono នៅថ្ងៃទី៣ ខែកក្កដា និយាយថា ស្ថានភាពស្ថិតក្នុងកម្រិតគ្រោះថ្នាក់ខ្លាំង ហើយគ្រោះមហន្តរាយធ្ងន់ធ្ងរអាចកើតឡើងគ្រប់ពេលវេលា គ្រប់ទីកន្លែងដដែល។ ជាមួយនឹងស្ថានភាពអាសន្នបែបនេះ លោក Mitazono ក៏ស្នើសុំជំនួយពីយោធាផងដែរ ខណៈអាជ្ញាធរបានទទូចឲ្យប្រជាជនរត់រកទីជម្រកសុវត្ថិភាពឲ្យបានលឿន កុំរង់ចាំដល់គ្រាអាសន្នទើបម្នីម្នានោះ។ ទីភ្នាក់ងារឧតុនិយមជប៉ុន បានព្រមានហើយថា ការបាក់ដីដែលបង្កគ្រោះថ្នាក់ នៅតែអាចកើតឡើង។
គួរបញ្ជាក់ដែរថា គិតត្រឹមពេលនេះអាជ្ញាធរបានចេញការព្រមានឲ្យប្រជាជនរង់នៅក្នុងតំបន់រងគ្រោះ ចាកចេញពីផ្ទះទៅជ្រកនៅកន្លែងមានសុវត្ថិភាពបណ្ដោះអាសន្នរហូតដល់ជាង១លាននាក់ហើយ។ យ៉ាងណាមិញនៅមិនទាន់មានរបាយការណ៍ បញ្ជាក់ពីការខូចខាតនៅឡើយទេ៕
