បាល់ទាត់ៈ ក្លិប Atletico Madridបានប្រតិកម្មយ៉ាងខ្លាំងទៅនឹងបរិមាណលុយដែល ក្លិប Barcelona បានចំណាយសម្រាប់កីឡាករ Antoine Griezmann ១២០លានអឺរ៉ូ ។
នៅក្នុងសេចក្តីថ្លែងការណ៍មួយ ក្លិប Barcelona បានប្រកាសឲ្យដឹងថា ពួកគេបានចំណាយលុយ១២០លានអឺរ៉ូ ដើម្បីទូទាត់លើប្រការដោះលែងរបស់កីឡាករបារាំងម្នាក់នេះ ដោយពួកគេបានបន្តទៀតថា កីឡាករឈ្នះជើងឯក World Cupម្នាក់នេះ នឹងចុះហត្ថលេខាលើកិច្ចព្រមព្រៀងរយៈពេល៥ឆ្នាំ ដែលរួមទាំងប្រការទិញផ្តាច់៨០០លានអឺរ៉ូ។
កីឡាករ Griezmann ស្ទើរតែចុះហត្ថលេខាចូលលេងជាមួយក្លិប Barcelonaទៅហើយកាលពីរយៈពេល១២ខែមុន តែផ្ទុយទៅវិញ លោកក៏បានសម្រេចចិត្តបន្តនៅលេងជាមួយក្លិប Atletico Madrid ។
ទោះបីជាយ៉ាងណាក៏ដោយ ត្រឹមរយៈពេលប៉ុន្មាននាទីប៉ុណ្ណោះនៃការប្រកាសរបស់ក្លិប Barcelona ក្លិប Atletico Madridបាននិយាយថា ពួកគេជឿថា បរិមាណលុយដែលពួកគេបានចំណាយ គឺមិនគ្រប់គ្រាន់នោះទេ ក្នុងការឈានដល់ប្រការដោះលែង ពីព្រោះថា កិច្ចព្រមព្រៀងរវាងកីឡាករ និងក្លិប Barcelonaត្រូវបានបញ្ចប់ មុនពេលដែលប្រការដោះលែងចុះពី២០០លានអឺរ៉ូ មកនោះ១២០លានអឺរ៉ូវិញ កាលពីដើមខែនេះ៕
