ក្រុមអ្នកគាំទ្រក្រុមតារាចម្រៀងស្រីកូរ៉េខាងត្បូង Twice នឹងមិនអាចជួបជាមួយនឹងនាង Minaនោះទេ ពេលដែលពួកគេសម្តែងនៅក្នុងពហុកីឡដ្ឋាន Singapore Indoor Stadium ប្រទេសសិង្ហបុរីនាថ្ងៃសៅរ៍នេះ។
សេចក្តីថ្លែងការណ៍មួយពីទីភ្នាក់ងាររបស់នាង បានឲ្យដឹងថា តារាចម្រៀង Mina មានអារម្មណ៍ថប់ដង្ហើមខ្លាំងភ្លាមៗ ហើយនិងគ្មានសុវត្ថិភាពនោះទេចំពោះការសម្តែងនៅលើឆាក។
សេចក្តីថ្លែងការណ៍នោះបន្តទៀតថា ក្រោយការពិភាក្សាយ៉ាងល្អិតល្អន់ ជាមួយនឹងនាង Minaនិងសមាជិកក្នុងក្រុម Twice យើងក៏បានសម្រេចចិត្តថា ស្ថានភាពសុខភាពបច្ចុប្បន្នរបស់នាង Mina ត្រូវការការព្យាបាលបន្ថែមទៀត ក៏ដូចជាត្រូវការពេលសម្រាកឲ្យបានគ្រប់គ្រាន់។
ទោះបីជាយ៉ាងណាក៏ដោយ ក្រុមតារាចម្រៀងស្រីកូរ៉េ Twiceនៅតែបន្តដំណើរទស្សនាចរណ៍តន្ត្រីពិភពលោករបស់ពួកគេតាមការគ្រោងទុកដដែល។
ការប្រកាសដោយបើកចំហពីស្ថានភាពសុខភាពរបស់នាង Mina ត្រូវបានឱបក្រសោបយ៉ាងកក់ក្តៅដោយក្រុមអ្នកលេងអ៊ីនធឺណេត។
អ្នកលេងអ៊ីនធឺណេតម្នាក់ បានសរសេរថា “រាល់លើកយើងនិយាយពីផលលំបាករបស់ពួកយើង ជាមួយនឹងសុខភាពផ្លូវចិត្ត គឺយើងដើរមួយជំហានខិតទៅរកការដកខ្លួនចេញពីស្លាកស្នាមអាក្រក់”។
សូមបញ្ជាក់ថា ឧស្សាហកម្មសិល្បះកូរ៉េខាងត្បូង គឺជាទីផ្សារប្រកួតប្រជែងខ្លាំងបំផុត ហើយទីភ្នាក់ងារគ្រប់គ្រង ត្រូវបានគេថ្កោលទោសសម្រាប់ការមិនចេះមើលថែសុខភាពក្រុមសិល្បកររបស់ពួកគេឲ្យបានដិតដល់៕
