នៅពេលនេះ សហរដ្ឋអាមេរិកទ្រាំ លែងបានទៀតហើយ និងទង្វើរជិះសេះលែងដៃរបស់ក្រុមមេដឹកនាំយោធាសហភាពមីយ៉ាន់ មកលើជនមូស្លីមរ៉ូហ៊ីងយ៉ា ដោយពួកគេបានដាក់ទណ្ឌកម្មមកមេដឹកនាំយោធាមីយ៉ាន់ម៉ាកំពូលៗចំនួន៤រូប។
កាលពីថ្ងៃអង្គារម្សិលមិញនេះ សហរដ្ឋអាមេរិក បានប្រកាសទណ្ឌកម្មមកលើមេបញ្ជាការកងទ័ពសហភាពមីយ៉ាន់ម៉ា លោកមីន ឱង លាំង និងមេដឹកនាំយោធា៣នាក់ផ្សេងទៀត ដែលទទួលខុសត្រូវការសម្លាប់ក្រៅសំណាញ់ច្បាប់មកលើជនមូស្លីមរ៉ូហ៊ីងយ៉ា ដោយហាមប្រាមពួកគេពីការជាន់ទឹកដីសហរដ្ឋអាមេរិក។
ទណ្ឌកម្មនេះដែរ ដែលធ្វើមកលើមេបញ្ជាការរងរបស់លោកមីន ឱង លាំង គឺលោកឧត្តមសេនីយ៍ សូ វីន និងមេបញ្ជាការជាន់ខ្ពស់២នាក់ផ្សេងទៀត ទៀត គឺលោកឧត្តមសេនីយ៍ ថាន់ អូ និងលោកឧត្តមសេនីយ៍ ឱង ឱងហើយនិងក្រុមគ្រួសាររបស់ពួកគេផងដែរនោះ គឺជាវិធានការខ្លាំងក្លាបំផុតដែលសហរដ្ឋអាមេរិកធ្វើឡើង ដើម្បីឆ្លើយតបនឹងការសម្លាប់រង្គាលជនភាគតិចរ៉ូហ៊ីងយ៉ា នៅសហភាពមីយ៉ាន់ម៉ា។
លោកម៉ៃ ផមផ្យូ គឺជារដ្ឋមន្ត្រីការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍ថា យើងនៅតែមានការព្រួយបារម្ភថា រដ្ឋាភិបាលសហភាពមីយ៉ាន់ម៉ា នឹងគ្មានវិធានការទទួលខុសត្រូវចំពោះការបំពានសិទ្ធិមនុស្ស និងរំពានរាងកាយនោះទេ ហើយនៅតែមានសេចក្តីរាយការណ៍ថា យោធាមីយ៉ាន់ម៉ា កំពុងតែបំពានសិទ្ធិមនុស្ស និងបំពានរាងកាយពេញផ្ទៃប្រទេស។
លោកផមផ្យូ បាននិយាយពីការទម្លាយព័ត៌មានកាលពីពេលថ្មីៗនេះ ដែលដំបូងឡើយត្រូវបានចេញផ្សាយដោយទីភ្នាក់ងារព័ត៌មានរ៉យទ័រកាលពីខែឧសភាថា លោកមីន ឱង លាំង បញ្ជាឲ្យដោះលែងទាហានដែលត្រូវបានកាត់ទោសពីបិទសម្លាប់មនុស្សក្រៅប្រព័ន្ធតុលាការ នៅក្នុងភូមិអ៊ីន ឌីន អំឡុងការបោសសំអាតជនភាគតិចរ៉ូហ៊ីងយ៉ា កាលពីឆ្នាំ២០១៧ ដែលវាគឺជាគំរូដ៏អាក្រក់មួយ និងកង្វះខាតយ៉ាងធ្ងន់ធ្ងរក្នុងការទទួលខុសត្រូវរបស់យោធា និងថ្នាក់ដឹកនាំជាន់ខ្ពស់របស់ពួកគេ។
លោកផមផ្យូ បានបន្តទៀតថា អគ្គមេបញ្ជាការរូបនេះ បានដោះលែងឧក្រិដ្ឋជនទាំងអស់នេះឲ្យមានសេរីភាពឡើងវិញ ក្រោយជាប់គុកបានប៉ុន្មានខែប៉ុណ្ណោះ ខណៈដែលក្រុមអ្នកកាសែតដែលនិយាយប្រាប់ពិភពលោកពីការសម្លាប់នៅក្នុងភូមិអ៊ីន ឌីន បែរជាត្រូវជាប់ពន្ធនាគាររយៈពេលជាង៥០០ថ្ងៃទៅវិញ។
សូមបញ្ជាក់ថា ការសម្លាប់រង្គាលនៅក្នុងភូមិអ៊ីន ឌីន ត្រូវបានលាតត្រដាងការពិតដោយអ្នកកាសែត២រូបរបស់ទីភ្នាក់ងារព័ត៌មានរ៉យទ័រ គឺ លោកវ៉ា ឡូន និងលោក ច ស៊ូ អ៊ូ ។ អ្នកកាសែតទាំង២នាក់នេះ ត្រូវបានដោះលែងវិញ ដោយការលើកលែងទោស កាលពីថ្ងៃទី៦ ខែឧសភា កន្លងទៅ៕
