តារាសម្តែងហុងកុង Andy Lau (លីតៅហួ) បានដឹងច្បាស់ថា ក្រុមអ្នកវិនិយោគទុនលើគម្រោងរបស់គាត់ មិនបានខ្វាយខ្វល់ពីសុខភាពរបស់គាត់នោះឡើយ។
អំឡុងកម្មវិធីជជែកកម្សាន្ត “A Date With Luyu” លោកបានកត់សំគាល់ឃើញថា ប្រតិកម្មរបស់ពួកគេចំពោះបញ្ហាសុខភាពចុះខ្សោយរបស់គាត់ គឺខុសគ្នាស្រឡះនឹងការខ្វាយខ្វល់ពីក្រុមអ្នកគាំទ្ររបស់គាត់។
លោកលីតៅហួ វ័យ៥៧ឆ្នាំ បាននិយាយប្រាប់ម្ចាស់កម្មវិធីថា ក្រុមវិនិយោគិនទាំងអស់នោះ ខ្វាយខ្វល់ម្យ៉ាងប៉ុណ្ណោះ រឿងប្រមូលលុយរបស់ពួកគេមកវិញ ហើយអ្នកខ្លះថែមទាំងនិយាយប្រាប់លោកថា ពួកគេមិនធ្លាប់ដែលគិតទាល់តែសោះថាគម្រោងរបស់គាត់ ត្រូវខាតលុយបែបនេះ។
គួរឲ្យដឹងថា លោកលីតៅហួ បានបាត់មុខពីសិល្បះអស់រយៈពេលជាច្រើនខែ ក្រោយឧប្បត្តិហេតុជិះសេះនៅប្រទេសថៃ កាលពីឆ្នាំ២០១៧ អំឡុងពេលដែលលោកថតស្ប៉តពាណិជ្ជកម្ម។
កាលពីពេលថ្មីៗនេះ លោកបានលប់ចោលកម្មវិធីប្រគុំតន្ត្រីជាច្រើនលើកនៅទីក្រុងហុងកុង ដោយសារតែលោកធ្លាក់ខ្លួនឈឺ និងចុះខ្សោយកម្លាំង ជាហេតុនាំឲ្យប្រគល់ថ្លៃសំបុត្រទៅវិញ និងខាតបង់លុយយ៉ាងច្រើនលើការរៀបចំការប្រគុំតន្ត្រីឡើងវិញ។
លោកលីតៅហួ យល់ឃើញថា បញ្ហាសុខភាពទាំងនេះ បានធ្វើឲ្យលោកធ្លាក់ក្នុងរណ្តៅមួយទៅហើយ តែបញ្ហាអ្នកដែលគិតតែពីប្រយោជន៍នោះ គឺកាន់តែធ្វើឲ្យលោកឈឺចាប់ថែមមួយកម្រិតទៀត។
លោកបានប្រកាសឲ្យដឹងថា ពេលវេលាចំណាយលើការព្យាបាលឲ្យសះស្បើយឡើងវិញ ប្រៀបបាននឹងសុបិនដ៏អាក្រក់មួយ។
លោកមានការភ័យខ្លាចខ្លាំងណាស់ថា លោកច្បាស់ជាមិនអាចជាសះស្បើយឡើងវិញនោះទេ ហើយសូម្បីតែទៅហាត់ប្រាណក៏អត់ដែរ បើលោកនៅតែអង្គុយលើរទេះរុញបែបនេះ៕
