សក្ខីកម្មអ្នកជំនាញ និងផែនទីទម្លាក់គ្រាប់បែកចាស់ៗសល់ពីសង្គ្រាមលោកលើកទី២ បានបញ្ជាក់ថា នៅមានគ្រាប់បែកមិនទាន់ផ្ទុះច្រើនទៀត នៅក្នុងដីក្រោមទីក្រុងបុរាណ Pompeii របស់ប្រទេសអ៊ីតាលី។
សង្គ្រាមលោកលើកទី២ បានបញ្ចប់ទៅកាលពីរយៈពេលជិត៧៥ឆ្នាំមុន ប៉ុន្តែពិភពលោកនៅតែមានកាកសំណល់ពីការបង្ហូរឈាមគ្នានេះ។ នៅអឺរ៉ុប គ្រាប់បែកមិនទាន់ផ្ទុះជាច្រើន នៅគ្របដណ្តប់លើកោះរបស់ពួកគេ គ្រាប់បែកខ្លះស្ថិតនៅក្រោមដីក្នុងទីវាល ក្នុងទីក្រុង និងនៅតាមសំណង់អគារបុរាណ។
នៅក្នុងរបកគំហើញចុងក្រោយគេនៃគ្រាប់បែកមិនទាន់ផ្ទុះនៅអឺរ៉ុប បានរកឃើញថាមានគ្រាប់បែកមិនទាន់ផ្ទុះចំនួន១០គ្រាប់ស្ថិតនៅក្រោមសំណង់អគារទីក្រុងបុរាណ Pompeii។
កាសែតអ៊ីតាលី Il Fatto Quotidianoធ្លាប់បានរាយការណ៍រួចមកហើយថា កងកម្លាំងសម្ព័ន្ធមិត្ត បានទម្លាក់គ្រាប់បែក១៦៥គ្រាប់មកលើទីក្រុងបុរាណ Pompeii អំឡុងការវាយឆ្មក់តាមអាកាស៩លើកផ្សេងៗគ្នា ក្នុងសង្គ្រាមលោកលើកទី២ ដែលការទម្លាក់គ្រាប់បែកទាំងអស់នោះ បានធ្វើឡើងនៅក្នុងខែសីហា ឆ្នាំ១៩៤៣។
ចាប់តាំងពីពេលនោះមក គ្រាប់បែក៩៦គ្រាប់ ត្រូវបានរកឃើញ និងបានកម្ទេចចោល ខណៈដែលគ្រាប់បែកផ្សេងទៀត កប់បាត់ក្រោមទីតាំងតំបន់បុរាណវិទ្យា ដែលមិនទាន់ត្រូវបានគេធ្វើកំណាយប្រវត្តិសាស្ត្រ។
ទីក្រុងបុរាណ Pompeii គ្របដណ្តប់លើផ្ទៃដីជិត៦៩ហិចតា ហើយ២ភាគ៣នៃតំបន់នោះ ត្រូវបានធ្វើកំណាយប្រវត្តិសាស្ត្ររួចហើយ។ គ្រាប់បែកដែលបានផ្ទុះមួយចំនួននៅកន្លែងដែលមិនទាន់ធ្វើកំណាយ ត្រូវបានបំផ្ទុះរួចអស់ដែរ ឬក៏ត្រូវបានដោះចេញ ប៉ុន្តែសម្រាប់គ្រាប់បែក១០គ្រាប់មិនទាន់ផ្ទុះផ្សេងទៀត ក្រុមបុរាណវិទូនៅពេលនេះ ចាប់ផ្តើមទាល់គំនិតហើយ ដោយពួកគេមិនដឹងថាវានៅទីកន្លែងណាឲ្យពិតប្រាកដនោះទេ៕
