កាលពីរយៈពេល៥០ឆ្នាំមុន ក្រុមអវកាសចរអាមេរិករបស់ Apollo 11 បានក្លាយជាមនុស្សលើកដំបូងគេឡើងដល់ឋានព្រះចន្ទ័ ខណៈដែលចិននៅមិនទាន់បង្ហោះផ្កាយរណបណាមួយឡើយទៅកាន់ទីនោះ។
នៅថ្ងៃទី២០ ខែកក្កដានេះ គឺជាខួបលើកទី៥០នៃការឡើងទៅដល់ឋានព្រះចន្ទ័ ហើយការប្រកួតប្រជែងទីអវកាសរវាងសហរដ្ឋអាមេរិក និងអតីតសហភាពសូវៀត បានទុកចោលទីក្រុងប៉េកាំង ដែលបានបាញ់បង្ហោះយានមានមនុស្សលើកដំបូងរបស់ខ្លួនកាលពីឆ្នាំ២០០៣ រយៈពេលជាង៤០ឆ្នាំក្រោយជោគជ័យរបស់អង្គការ NASA។
ប៉ុន្តែក្នុងរយៈពេលប៉ុន្មានទសវត្សរ៍ចុងក្រោយនេះ ចិនកាន់តែមានបាន និងមានអំណាចខ្លាំងជាងមុន ហើយកម្មវិធីអវកាសរបស់ពួកគេក៏បានរីកចម្រើនទៅតាមនោះដែរ។
ដោយមានការឧបត្ថម្ភថវិការរាប់ពាន់លានដុល្លារលើការវិនិយោគទុនរដ្ឋាភិបាល ទីក្រុងប៉េកាំង បានបាញ់ផ្កាយរណប និងបន្ទប់ពិសោធន៍ទីអវកាស ទៅកាន់គន្លងតារាវិថី ហើយថែមទាំងបានក្លាយជាប្រទេសលើកដំបូងគេ បញ្ជូនរូបយន្តគ្មានមនុស្សបើកទៅកាន់គន្លងតារាវិថីមិនឆ្ងាយប៉ុន្មានពីភពព្រះចន្ទ័។
ដោយឡែក ក្រុមហ៊ុនឯកជនចិនវិញក៏បានវិនិយោគទុនផងដែរលើការស្រាវជ្រាវទីអវកាស និងបច្ចេកវិទ្យា ក្នុងនោះការបាញ់រ៉ុក្កែតឯកជនដោយជោគជ័យលើកដំបូងរបស់ប្រទេសមួយនេះ បានធ្វើឡើងកាលពីខែឧសភា ឆ្នាំ២០១៨។
ជាមួយនឹងមហិច្ឆិតាអស្ចារ្យជាងនេះ ទីក្រុងប៉េកាំងកំពុងធ្វើការបញ្ជូនក្រុមអវកាសចរទៅកាន់ឋានព្រះចន្ទ័ ហើយចុងក្រោយគឺភពព្រះអង្គារ។
លោក Blaine Curcio គឺជាស្ថាបនិកបង្កើតក្រុមហ៊ុនអវកាស Orbital Gateway Consulting ដែលមានមូលដ្ឋាននៅទីក្រុងហុងកុង បាននិយាយថា ចិនគឺជាប្រទេសដែលធំជាងគេ ពួកគេមានប្រជាជនច្រើនជាងគេ ពួកគេមានវិស្វករច្រើនច្រើនជាងគេ ពួកគេមានក្រុមអ្នកវិទ្យាសាស្ត្រច្រើនជាងគេ។
សូមបញ្ចាក់ថា ក្រុមអវកាសចរអាមេរិក Neil Armstrong, Buzz Aldrin និង Michael Collins បានរួមចំណែកក្នុងបេសកកម្ម Apollo 11 ដែលបានជាន់ដីឋានព្រះច័ន្ទ កាលពីថ្ងៃទី២០ ខែកក្កដា ឆ្នាំ១៩៦៩ ហើយអង្គការ NASAកំពុងតែត្រៀមខ្លួនបញ្ជូនមនុស្សទៅកាន់ឋានព្រះចន្ទ័ជាថ្មីម្តងទៀត នៅឆ្នាំ២០២៤ ខាងមុខ ក្រោយពីមានមូលនិធិប្ថែមទៀតពី ប្រធានាធីបតីសហរដ្ឋអាមេរិក លោកដូណាល់ ត្រាំ៕
