អ្នកនាំពាក្យក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានបដិសេធជុំវិញព័ត៌មានក្លែងក្លាយដែលថា លោកជំទាវ កិត្តិសង្គហបណ្ឌិត ម៉ែន សំអន មានបញ្ហាសុខភាពធ្ងន់ធ្ងរ គឺជាព័ត៌មានមិនពិត ពោលគឺលោកជំទាវ មានសុខភាពល្អធម្មតាទេ។ នេះបើយោងតាមសេចក្តីបំភ្លឺចុះថ្ងៃទី២៣ ខែកក្កដា ឆ្នាំ២០១៩។
ជាក់ស្តែងនៅដើមសប្តាហ៍នេះ ម្ចាស់គណនី Facebook ឈ្មោះ «Tor Nimol » និងម្ចាស់គណនី Facebook «ឈ្មោះ ប៉ាង សុខឿន» បានផ្សព្វផ្សាយចោទប្រកាន់មកលើលោកជំទាវ និងថ្នាក់ដឹកនាំរាជរដ្ឋាភិបាល ក្នុងចេតនាបំបែកបំបាក់ផ្ទៃក្នុង រាជរដ្ឋាភិបាលកម្ពុជា និងថ្នាក់ដឹកនាំគណបក្សប្រជាជនកម្ពុជា។
អ្នកនាំពាក្យ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច សូមបញ្ជាក់ប្រាប់ថា លោកស្រី កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច នៅមានសុខភាពល្អបរិបូរណ៍ ហើយបច្ចុប្បន្ន លោកជំទាវ កំពុងបំពេញការងារយ៉ាងសកម្មជាមួយរាជរដ្ឋាភិបាលកម្ពុជា និងចុះជាប់ជាមួយប្រជាជននៅតាមមូលដ្ឋាន៕
