សហគមន៍អន្តរជាតិ ពិសេសគឺអង្គការសហប្រជាតិគួរតែបើកភ្នែកបើកច្រមុះខ្លះផង ក្រោយគេទម្លាយរបាយការណ៍ថា សហភាពមីយ៉ាន់ម៉ា បានត្រៀមខ្លួនតិចតួចបំផុតក្នុងការធ្វើមាតុភូមិនិវត្តន៍ជនភាគតិចរ៉ូហ៊ីងយ៉ា ដែលកំពុងជ្រកកោនយ៉ាងវេទនានៅជំរំខុកបាសា របស់ប្រទេសបង់ក្លាដែស។
យោងតាមការអះអាងរបស់វិទ្យាស្ថានគោលនយោបាយយុទ្ធសាស្ត្រអូស្ត្រាលី(ASPI) បានឲ្យដឹងថា សហភាពមីយ៉ាន់ម៉ា បានត្រៀមខ្លួនក្នុងកម្រិតអប្បបរមាប៉ុណ្ណោះ សម្រាប់ការវិលត្រឡប់មកវិញរបស់ជនភៀសខ្លួនមូស្លីមរ៉ូហ៊ីងយ៉ា ដែលកំពុងបោះជំរំនៅក្នុងប្រទេសជិតខាងបង់ក្លាដែស ថ្វីត្បិតតែប្រទេសមួយនេះ បាននិយាយថា ពួកគេត្រៀមខ្លួនរួចរាល់ក្នុងការធ្វើមាតុភូមិននិវត្តន៍សម្រាប់ជនភាគតិចទាំងនេះក៏ដោយ។
ជនភាគតិចរ៉ូហ៊ីងយ៉ា ជាង៧០ម៉ឺននាក់ ត្រូវបានបង្ខំចិត្តរត់ភៀសខ្លួនចេញពីរដ្ឋភាគខាងជើងរ៉ាឃីន ស្ថិតនៅក្នុងប្រទេសមីយ៉ាន់ម៉ា អំឡុងការបង្ក្រាបយ៉ាងចាស់ដៃពីយោធាកាលពីឆ្នាំ២០១៧ ដែលអង្គការសហប្រជាជាតិ បានចាត់ទុកថាជាការសម្លាប់រង្គាលទ្រង់ទ្រាយធំ និងការចាប់រំលោភ ក្នុងគោលបំណងប្រល័យពូជសាសន៍នោះ។
ភូមិស្ថានជនភាគតិចរ៉ូហ៊ីងយ៉ាជាង៤០០កន្លែង ត្រូវបានដុតកម្ទេចចោលក្លាយជាផេះផង់ អំឡុងអំពើហិង្សាដ៏អាក្រក់បំផុតនេះ។
វិទ្យាស្ថាន ASPI បានសរសេរនៅក្នុងរបាយការណ៍ដែលបានចេញផ្សាយកាលពីថ្ងៃអង្គារថា ស្របពេលដែលក្រុមអាជ្ញាធរ បានសន្យាផ្តល់ទីជម្រកឡើងវិញដល់ជនភៀសខ្លួនទាំងអស់នេះ ការវិភាគតាមរូបភាពផ្កាយរណប បង្ហាញថា គ្មានសញ្ញាណាមួយនៃការកសាងភូមិដ្ឋានឡើងវិញនោះទេនៅតំបន់ដែលជនភាគតិចទាំងនេះធ្លាប់បានស្នាក់អាស្រ័យ ហើយមិនត្រឹមតែប៉ុណ្ណោះនោះទេ ការបំផ្លិចបំផ្លាញផ្ទះអ្នកស្រុក នៅតែបន្តកើតមានឡើងថែមទៀតផង។
របាយការណ៍នោះ បានបញ្ជាក់ទៀតថា តាមរយៈការវិភាគយ៉ាងច្បាស់លើរូបភាពផ្កាយរណបរបស់ពួកយើង បញ្ជាក់ឲ្យឃើញថា ការបំផ្លិចបំផ្លាញនៅតែបន្តកើតមានមកលើតំបន់រស់នៅរបស់ជនភាគតិចរ៉ូហ៊ីងយ៉ានៅក្នុងឆ្នាំ២០១៨ និងឆ្នាំ២០១៩នេះ ជាហេតុធ្វើឲ្យមានការចោទសួរដល់ឆន្ទៈរបស់រដ្ឋាភិបាលមីយ៉ាន់ម៉ា ក្នុងការសម្របសម្រួលដំណើរការធ្វើមាតុភូមិនិវត្តន៍ប្រកដោយសុវត្ថិភាព និងសេចក្តីថ្លៃថ្នូរ។
អ្នកនាំពាក្យរដ្ឋាភិបាលមីយ៉ាន់ម៉ា មិនបានទទួលទូរស័ព្ទសុំការបំភ្លឺជុំវិញការលើកឡើងនេះទេ ខណៈដែលអនុប្រធានអគ្គនាយកដ្ឋានរដ្ឋបាលរដ្ឋរ៉ាឃីន លោក ច ស្វា ទុន បានបដិសេធន៍មិនព្រមធ្វើសេចក្តីអធិប្បាយអ្វីទាំងអស់។
ទោះបីជាយ៉ាងណាក៏ដោយ សហភាពមីយ៉ាន់ម៉ា ធ្លាប់បានអះអាងថា ពួកគេបានត្រៀមខ្លួនរួចរាល់ក្នុងការទទួលយកជនភៀសខ្លួនទាំងនេះមកវិញ ប៉ុន្តែបង់ក្លាដែសទេ ដែលខកខនក្នុងការចាប់ផ្តើមដំណើរការធ្វើមាតុភូមិនិវត្តន៍នោះ៕
Home ព្រឹត្តិការណ៍ថ្មីៗ សហភាពមីយ៉ាន់ម៉ា អត់បានធ្វើអី្វសោះតាមការសន្យារបស់ខ្លួនដើម្បីទទួលជនភាគតិចរ៉ូហ៊ីងយ៉ាមកវិញ