ក្រុមមន្ត្រីបានអះអាងថា មនុស្សយ៉ាងហោច២០នាក់បានស្លាប់ និង៥០នាក់ផ្សេងទៀតរងរបួស ក្នុងហេតុការណ៍វាយប្រហារអត្តឃាតមកលើការិយាល័យបេក្ខភាពអនុប្រធានាធិបតីអាហ្វហ្គានីស្ថាន កាលពីថ្ងៃអាទិត្យ។
ពួកគេបានអាងថា ការវាយប្រហារអត្តឃាតមួយ មានគោលដៅមកលើការិយាល័យ Green Trend ស្ថិតនៅទីក្រុងកាប៊ុលរបស់បេក្ខភាពបោះឆ្នោតឈរឈ្មោះសម្រាប់តំណែងអនុប្រធានាធិបតីអាហ្វហ្គានីស្ថាន លោក អាំរូឡា សាឡេ។
អំពើហិង្សានេះដែរ បានកើតមានឡើងនៅថ្ងៃដំបូងនៃយុទ្ធនាការបោះឆ្នោតជ្រើសរើសប្រធានាធិបតីអាហ្វហ្គានីស្ថាន ដែលគ្រោងនឹងរៀបចំឡើងនាពេលខាងមុខនេះ។
លោកសាឡេ ដែលបានរងរបួសស្រាល គឺមិត្តភ័ក្ត្ររបស់លោកប្រធានាធិបតីអាស្រាហ្វ ហ្គានី ។
អ្នកនាំពាក្យមួយរូបរបស់ក្រសួងមហាផ្ទៃអាហ្វហ្គានីស្ថាន បាននិយាយថា ការវាយប្រហារនេះ គេមើលឃើញជនបំផ្ទុះគ្រាប់បែកអត្តឃាតម្នាក់បានបំផ្ទុះរថយន្តបង្កប់ជាតិផ្ទុះនៅជិតអគារ។
ភ្លាមៗនោះក្រុមជីវពលជាច្រើននាក់ បានសម្រុកចូលអគារការិយាល័យ និងបន្តពួនសម្ងំនៅទីនោះអស់រយៈពេល៦ម៉ោង មុនពេលត្រូវបានសម្លាប់ដោយកងកម្លាំងសន្តិសុខ។
ដោយឡែក ជនស៊ីវិលប្រមាណជា១៥០នាក់ ត្រូវបានសង្គ្រោះចេញពីក្នុងអគារ ជាកន្លែង Green Trend គឺជាអង្គភាពប្រឆាំងពុករលួយមួយ ដឹកនាំដោយលោកសាឡេ។
លោកអាស្រាហ្វ ហ្គានី បាននិយាយកាលពីព្រឹកថ្ងៃអាទិត្យថា សន្តិភាពជិតកើតមានហើយចំពោះប្រទេសអាហ្វហ្គានីស្ថាន។
មកទល់នឹងពេលនេះនៅមិនទាន់មានភាគីណាមួយប្រកាសទទួលស្គាល់ការវាយប្រហារមួយនេះឡើយ។
សូមបញ្ជាក់ថា ការបោះឆ្នោតជ្រើសរើសប្រធានាធិបតីអាហ្វហ្គានីស្ថាន គ្រោងនឹងធ្វើឡើងនៅថ្ងៃទី២៨ ខែកញ្ញា ខាងមុខនេះ ប៉ុន្តែវាត្រូវបានផ្អាក២លើករួចមកហើយ៕
Home ព្រឹត្តិការណ៍ថ្មីៗ ការវាយប្រហារអត្តឃាតមកលើការិយាល័យអនុប្រធានាធិបតីអាហ្វហ្គានីស្ថានសម្លាប់មនុស្ស២០នាក់ និង៥០នាក់រងរបួស